Yowano 2 - Libuka Lya Kuyela

Shifupawenga mu Kana

¹ Oho kwapitile matena abili, kwekalile shifupawenga mu munzi wa Kana mu Ngalileya. Mandiyendi Yeshu wekalileko.

² Yeshu na bandongesha bendi nanibo babehanine ku shifupawenga.

³ Oho waine yamanine, mandiyendi Yeshu wambile kukwendi ngayi, “Waine ya bamanini.”

⁴ Yeshu wakumbwile ngayi, “Mawa, hinga muntongweza bya kutenda, shikati shami shilolo shikume.”

⁵ Mandiyendi Yeshu watongwezele bakamilimo ngayi, “Eshe nimwasho akumitongweza shitendenu.”

⁶ Kwekalile zintesho za limanya za mutanu na imo, za kutwesha kwinzala mema akukuma ku malita a mwanda, baziyakileko ngonehe ku shiheka sha Bayunda sha kuyowela.

⁷ Yeshu wambile ku bakamilimo ngayi, “Yinzalishenu zintesho na mema.” Benzalishile zintesho na ha mivumbo.

⁸ Niho abatongwezele ngayi, “Pindenumo, pe mutwale ku mukakwendesha shimbo.” Bamutwalilile mema,

⁹ mukakwendesha shimbo wayelele aya mema afutukile waine. Kaliha walimukile ngayi iya waine yinafumu kuti. (Ngoboni bakamilimo baya batekwile mema balimukile), niho mukakwendesha shimbo ehanine mukakuyeka,

¹⁰ wambile kukwendi ngayi, “Muntu nimwendi watatikanga kupana waine yayiwahe, oho bantu banwakale shikuma, ku mamaninino niho apane waine yayihamu. Ngoboni obe unaholeke waine yayiwahe kukuma na ku shikati shino!”

¹¹ Eshe nisho shikomokesho sha kutatika shiya atendele Yeshu ku Kana mu Ngalileya. Nohobene waholwele wuwahe wendi, kami bandongesha bendi bamukulupilile.

¹² Kunyima yanebye, Yeshu wayile ku Kapenauma hamo na mandiyendi na bakonzobendi na bandongesha bendi, pe bekalileko kuyo matena amashe.

Yeshu ukutanda bakakulandishila mu Litala lya Nyambi

¹³ Oho Shimbo sha Kupitilila sha Bayunda shekalile hahepi, Yeshu wayile ku Yelushalema.

¹⁴ Kuyo wakenginine mu Litala lya Nyambi, wawanine bantu bali na kulandisha zingombe na bambelele na bankilimba na bakakutambashana mali hinga bekala ku zitebulu zabo.

¹⁵ Yeshu watendele shiwepu, pe watatikile kutanda nimwabo mu Litala lya Nyambi, bambelele hamo na zingombe. Wawishilile zitebulu hanci za ba kutambashana mali, pe wapanzanishile mali wabo.

¹⁶ Watongwezele bakakulandisha bankilimba ngayi, “Fumishenu ebye muno! Hinga mufutula Litala lya Tate ngayi linge litala lya kulandishila!”

¹⁷ Bandongesha bendi banukile ebye byatikitiwa ngayi, “Obe Nyambi, shitima sha Litala lyobe, shilinakubanga mukati ngo mundilo.”

¹⁸ Niho Bayunda bambile kukwendi ngayi, “Ukutenda shikomokesho ngani, sha ku monesha ngayi uli na ngovu hanebye unatende?”

¹⁹ Yeshu waba kumbwile ngayi, “Shiwulenu elye Litala lya Nyambi, pe nikalipindula mu matena ahatu.”

²⁰ Bayunda bambile ngayi, “Elye Litala lya Nyambi balitendele mu myaka makumi anaa na mutanu na umo, kati obe ukutwesha kulipindula mu matena ahatu ndi?”

²¹ Ngoboni Litala lya Nyambi atoyelenga Yeshu lwengile lutu lwendi.

²² Munyima ya ku shanguka ku bafu, bandongesha bendi banukile ebye ambile, niho bakulupilile ebye byatikitiwile na mazu ayo ambile Yeshu.

Yeshu walimuka bya mu mutima wa muntu

²³ Oho Yeshu ekalile mu Yelushalema ku Shimbo sha Kupitilila, bantu babengi bakulupilile mumwendi, oho bamonene bilimukisho ebye atendele.

²⁴ Ngoboni Yeshu kaliha waba kulupilile ndaba wabalimukile nimwabo.

²⁵ Kaliha washingile ngayi muntu wamina apake bya minendi, ndaba niye mwine walimukile ebye byekalile mu mitima yabo.