Yowano 17 - Libuka Lya Kuyela

Yeshu ukulilombelela

¹ Yeshu oho amanishile kwamba mazu awa, wayimbwile meho wendi kuyilu, pe wambile ngayi, “Tate, shikati shinakumu. Monesha wuwahe kuli Mwanobe, ngayi Mwanobe kami akumoneshe wuwahe.

² Ndaba wamupanine ngovu ha bantu nimwabo ngayi apane wumi wa mwaya myaka ku baya nimwabo wamupanine.

³ Pe wumi owe wa mwaya myaka kunengi kukulimuka obe tuhu Nyambi wa kupwisha na kulimuka Yeshu Kilishitu ou watumine.

⁴ Namoneshe wuwahe wobe hano hanci. Namanishi mulimo wampanine ngayi niwutende.

⁵ Tate! Ngwahishe ku meho wobe, wuwahe uya nekalile nawo hamo na nobe oho kaye shilolo kalengiwe.

Yeshu ukulombelela bandongesha bendi

⁶ “Lizina lyobe nalihololo ku bantu baya wampanine mu kaye. Bengile bobe, pe wabampanine kukwami, kami banombatala lizu lyobe.

⁷ Haya banalimuku ngayi nimwabyo wampanine binafumu kukwobe.

⁸ Ndaba nabapana mazu waya wampanine, pe banawatambulu. Haya banalimuku mu kupwisha ngayi nafumine kukwobe, kami banakulupili ngayi obe wantumine.

⁹ “Nikubalombelela. Kaliha nikulombelela bakakaye nimwabo, ngoboni baya tuhu wampanine ndaba benga bobe.

¹⁰ Nimwabyo ebye nilinabyo binengi byobe, kami nimwabyo ebye ulinabyo byenga byami, pe wuwahe wami unawumoneshe mukati kabo.

¹¹ Haya nili na kwiza kukwobe. Kaliha nishili mu kaye ngoboni nibo bashili mu kaye. Obe Tate wa Kuyela! Balame na ngovu za lizina lyobe, lizina wampanine, ngayi benge umo, ngonehe obe na nami twenga umo.

¹² Oho nekalile nabo nabalamine shiwahe na ngovu za lizina lyobe, lizina wampanine. Nabakowezele, kowa umo hakati kabo nayongo kuya ku kuloba, ndele uya mwana wafwanina kunonga, ngayi byatikitiwile binge bya kupwisha.

¹³ “Ngoboni haya nili na kwiza kukwobe, nikwamba byuma ebye mu kaye, ngayi bekale na ku wahilila kwami kwa kwinzala mumwabo.

¹⁴ Nabapana lizu lyobe. Kaye kanabazimbi ndaba kaliha bakakaye, nehi ami nabula kwinga muka kaye.

¹⁵ Kaliha nikubalombelela ngayi ubafumishe mu kaye, ngoboni ngayi ubalame ku mukawubi.

¹⁶ Nibo kaliha bakakaye nehi ami nabula kwinga muka kaye.

¹⁷ Bayeleshe mu kupwisha kwobe, lizu lyobe nilyo kupwisha.

¹⁸ Ngonehi wantumine mu kaye nami kami nabatumu mu kaye.

¹⁹ Nikulipana amimwine ndaba yabo ngayi nibo kami balipanike mu kupwisha.

Yeshu ukulombelela nimwabo bakakwitabila

²⁰ “Kaliha nikulombelela aba tuhu, ngoboni na baya kami bakakulupila mumwami ndaba ya lizu lyabo.

²¹ Nikulombelela ngayi benge umo. Tate! Bekale mumwetu, ngonehe obe uli mumwami na nami mumwobe. Bakenge umo ngayi kaye mwanga kakulupile ngayi obe wantumine.

²² Nabapanine wuwahe uya wampanine ngayi benge umo, ngonehe obe na nami twenga umo.

²³ Nikale mumwabo na nobe kami wikale mumwami, ngayi mwanga benge umo mu kulunga, pe mwanga kaye kalimuke ngayi obe wantumine, kami unabahaka nehi shiya wahakile ami.

²⁴ “Tate! Aba unampana nikushinga ngayi mwanga bakekale hamo na nami oku nikekala, ngayi bakamone wuwahe wami uya wampanine. Ndaba obe wahakile ami oho kaye shilolo kalengiwe.

²⁵ “Obe Tate wakwoloka! Kaye kukulimuka kafwako, ngoboni ami ninakulimuku, kami banalimuku ngayi obe wantumine.

²⁶ Natontololo lizina lyobe kukwabo, kami nikalitontolola ngayi shishemo shiya wahakile nasho mwanga shikekale mumwabo na nami nikekale mumwabo.”