Yowano 13 - Libuka Lya Kuyela

Yeshu ukuyowesha bandongesha bendi ku mawulu

¹ Oho Shimbo sha Kupitilila shilolo shikume, Yeshu walimukile ngayi shikati shendi shinakumu sha ku shiya kano kaye na kuya kuli Tatiyendi. Niye wahakile bendi baya bekalile mu kaye, kami wabahakile kutwala na ku mamaninino.

² Yeshu na bandongesha bendi bekalile ku mulalilo. Oho Shatana wengizakale mu mutima wa Yundashi, mwana Shimoni Ishikalyote, bihanganiko bya kubeba Yeshu.

³ Yeshu ha kulimuka ngayi Tatiyendi wapanine byuma nimwabyo mu maboko wendi, walimukile ngayi wafumine kuli Nyambi, kami ukuboka kuli Nyambi.

⁴ Niho Yeshu akatukile ku tebulu, wavulile shivwalo shendi sha hayilu, watolele tawulo, pe walimangileyo mu lukanda.

⁵ Wayitilile mema ha lulonga lwa kuyowelela, pe watatikile kuyowesha mawulu a bandongesha bendi na kuwakunkumuna na tawulo iya alimangile.

⁶ Yeshu wakumine kuli Shimoni Pita, niho Pita ambile ngayi, “Mwene, kati ukuyowesha mawulu wami ndi?”

⁷ Yeshu wamukumbwile ngayi, “Wuluno kulimuka ebye nikutenda wufwako, ngoboni kumbili ukalimuka.”

⁸ Pita wambile ngayi, “Byo, nisho eze ukatange kuyowesha mawulu wami.” Yeshu wamukumbwile ngayi, “Ndi kukuyowesha nifwako, pe kaliha uli ndongesha wami.”

⁹ Shimoni Pita wambile kuli Yeshu ngayi, “Mwene, hinga uyowesha mawulu wami tuhu, ngoboni yowesha maboko wami na ku mutwe!”

¹⁰ Yeshu wambile ngayi, “Muntu nayowele, kaliha wafwanina kuyowela kami, ndele ku mawulu wendi tuhu. Enu nimwenu munayele, ndele umo.”

¹¹ (Yeshu walimukile ou ukamubeba. Niho ambile ngayi, “Enu nimwenu munayele, ndele umo.”)

¹² Oho amanishile kuyowesha mawulu a bandongesha bendi na kuvwala shivwalo sha hayilu, wabokele na kwikala ku tebulu. Pe wabepwile ngayi, “Kati mu ku yuvwishisha ebye natende kukwenu ndi?

¹³ Mukuntoya ngayi Mulongeshi na Mwene, mukwamba shiwahe ndaba nisho nili.

¹⁴ Ndi ami Mwene na Mulongeshi wenu nayoweshe mawulu wenu nanenu kami yoweshenu mawulu a umo na wamina.

¹⁵ Namimoneshe ebye munafwanini kutenda, ngayi mukatendenga ngonehe ninatende kukwenu.

¹⁶ Mwa shikuma nikwamba kukwenu ngayi, mukamulimo kupitakana hekulyendi wufwako, hinge kupitakana uya unamutumu wufwako.

¹⁷ Wuluno mwalimukakale byuma ebye, muli na mfuywezi ndi mu kubitenda!

¹⁸ “Kutoya nimwenu nifwako, nikulimuka aba nahata. Ngoboni binafwanini kutendiwa biya byatikitiwile ngayi, ‘Ou nalyanga nendi byakulya byami, unamfutulukili.’

¹⁹ Nikumitongweza ebye wuluno, oho shilolo bitendiwe, ngayi byakatendiwa mukakulupila ngayi, ‘Ami niye Ami.’

²⁰ Mwa shikuma nikwamba kukwenu ngayi, ou ukutambula uya nikutuma unantambulu, kami ou ukuntambula unatambulu uya wantumine.”

Yeshu ukulubulula kubebiwa kwendi

²¹ Oho Yeshu amanishile kwamba ebye, wakalikizile mu mutima wendi, pe wambile ngayi, “Mwa shikuma nikwamba kukwenu ngayi, umo hakati kenu ukambeba.”

²² Bandongesha balitilaminine umo na wamina, hinga babula kulimuka ngayi ukutoya yani.

²³ Umo wa bandongesha, ou Yeshu ahakile shikuma, wekalile kunkumo na Yeshu.

²⁴ Niho Shimoni Pita amulabizile ngayi, “Mwipule ukutoya yani.”

²⁵ Niho uya ndongesha wayendaminine ha kapumpo ka Yeshu, wamwipwile ngayi, “Mwene, kati ukutoya yani?”

²⁶ Yeshu wakumbwile ngayi, “Ou nikatantila linkende na kumupana.” Niho atantile linkende wapanine kuli Yundashi Ishikalyote mwana Shimoni.

²⁷ Oho Yundashi atambwile liya linkende, Shatana wenginine mumwendi. Yeshu wamutongwezele ngayi, “Ebye ukushinga kutenda, tenda wanguwangu.”

²⁸ Ngoboni baya bekalile ku tebulu kowa wayuvwishishile ngayi shumangani anamba kukwendi.

²⁹ Ndaba Yundashi walaminenga shipawupawu sha mali, pe bamo ku bandongesha bahanganikile ngayi unamutongweze kuya na kulanda byuma ebye bashingilenga ku shimbo, hinge ngayi apane shuma ku bakakushepwa.

³⁰ Yundashi watambwile liya linkende, pe hohobene watutikile. Shengile shikati shawushiku.

Ndayano zazipya

³¹ Oho Yundashi atutikile, Yeshu wambile ngayi, “Wuluno wuwahe wa Mwana Muntu unaholoko, kami mumwendi wuwahe wa Nyambi unaholoko.

³² Ndi wuwahe wa Nyambi unaholoko mumwendi na Nyambi ukaholola wuwahe wa Mwana Muntu mumwendi, kami ukatenda ebye hohobene.

³³ Bana bami, nishili nenu kashikati kakashe. Mukancingancinga, ngoboni nikwamba kukwenu nehe nambile ku bakulwane ba Bayunda ngayi, ‘Oku nikuya, enu kutwesha kuyako mufwako.’

³⁴ “Nikupana kukwenu ndayano zazipya ngayi, lihakenu umo na wamina. Ngonehe namihaka, ngayi nenu kami mulihake umo na wamina.

³⁵ Ndi mukalihaka umo na wamina, bantu nimwabo bakalimuka ngayi muli bandongesha bami.”

Yeshu ukulubulula ngayi Pita ukamukana

³⁶ Shimoni Pita wepwile Yeshu ngayi, “Mwene, uli na kuya kuti?” Yeshu wakumbwile ngayi, “Oku nikuya, kutwesha kunkonka wuluno mufwako, ngoboni kumbili mukankonka.”

³⁷ Pita wepwile Yeshu ngayi, “Mwene, shumangani nikubula kutwesha kukukonka wuluno? Naliwahishili kufwa ndaba yobe.”

³⁸ Yeshu wamukumbwile ngayi, “Kati unaliwahishili kufwa ndaba yami ndi? Mwa shikuma nikwamba kukwobe ngayi, oho likombwe shilolo likuwe ukankana kahatu.”