Yowano 12 - Libuka Lya Kuyela

Yeshu ukuwabishiwa ku Mbetani

¹ Oho kwashalile matena mutanu na umo ngayi kwikale Shimbo sha Kupitilila, Yeshu wayile ku Mbetani, oku ekalilenga Lazalo, uya ashangwile ku bafu.

² Kuya bamuwahishilile mulalilo, Mata waletelenga byakulya kami Lazalo wengile umo wabaya bekalile na Yeshu ku tebulu.

³ Niho Maliya ashimbile mushashi wakwinzala na mazi a nandi akunuka shiwahe akulingana shitika sha lita a ndando yayinene, wawabishile mawulu a Yeshu, pe wakunkumwine mawulu a Yeshu na huki zendi. Mu litala nimwamo mwanukile na livumba lya mazi.

⁴ Ngoboni Yundashi Ishikalyote umo wa bandongesha ba Yeshu ou ukamubeba wambile ngayi,

⁵ “Kati shumangani awa mazi anabulu kulandishiwa myanda yihatu ya muwayawaya wa shiliva, mwanga mali apanikiwe ku bakakushepwa?”

⁶ Yundashi Ishikalyote wambile ebye kaliha ngayi wahakile bakakushepwa, ngoboni ndaba wengile mwizi. Niye wekalile na shipawupawu sha mali, pe washimbilengamo.

⁷ Ngoboni Yeshu wambile ngayi, “Mulehenu, awa mazi awatentekele mutena wakufundiwa kwami.

⁸ Ndaba bakakushepwa muli nabo shikati nimwasho, ngoboni ami kwikala nenu shikati nimwasho nifwako.”

Bihanganiko bya kuziha Lazalo

⁹ Likunge lya Bayunda bayuvwile ngayi Yeshu uli ku Mbetani, bayileko, kaliha ndaba ya Yeshu tuhu, ngoboni bayile ngayi bakamone Lazalo, ou Yeshu ashangwile ku bafu.

¹⁰ Pe bakankombela ba bakulwane baliyuvwashanine ngayi bazihe kami na Lazalo.

¹¹ Ndaba ya ku shanguka kwa Lazalo wingi wa Bayunda babashiyile na kukulupila muli Yeshu.

Yeshu ukwingina mu Yelushalema

¹² Kwashileko, likunge lya bantu baya bezile ku Shimbo sha Kupitilila, bayuvwile ngayi Yeshu ulinakwiza ku Yelushalema.

¹³ Bashimbile myahi ya mitondo ya minkomona, pe bayile na kumushimbawila, hibabilikiza ngayi, “Hoshana! Uli na mfuywezi ou ukwiza mu lizina lya Mwene! Kuyemeziwe Mwene wa Ishalela!”

¹⁴ Yeshu wawanine mwana mbongolo, pe wakandamineho, ngonehe kwatikitiwa ngayi,

¹⁵ “Hinga utina mwana Ziyoni wa mbuyama, mona, Mwene yobe ulinakwiza hinga akandama ha mwana mbongolo.”

¹⁶ Hashikati shiyo bandongesha bendi kaliha bayuvwishishile ebye. Ngoboni oho Yeshu ashangukilile mu wuwahe, banukile ngayi byatikitiwile ndaba yendi, kami ngayi batende ebye kukwendi.

¹⁷ Likunge lya bantu baya bekalile na Yeshu oho ehanine Lazalo mu shinzimbi na kumushangula ku bafu, bayile na kwamba ebye byatendiwile.

¹⁸ Nisho shuma shatwalile bantu ngayi bakamushimbawile, ndaba bayuvwile ngayi watendele eshe shikomokesho.

¹⁹ Niho Bafwalishi balyambashanine umo na wamina ngayi, “Monenu ngayi kowa ebye tuli na kutenda! Tilaminenu bantu nimwabo bali na kumukonka!”

Bangiliki bamo bakushinga Yeshu

²⁰ Hakati ka bayo bayile mu kulemesha ku Yelushalema ku shimbo hekalile Bangiliki.

²¹ Bayile kuli Fwilipu waku Mbeteshayinda mu Ngalileya, pe bambile ngayi, “Hekulu, tukushinga tumone Yeshu.”

²² Fwilipu wayile na kutongweza Anduleu, pe Anduleu na Fwilipu bakatongwezele Yeshu.

²³ Yeshu waba kumbwile ngayi, “Shikati shinakumu Mwana Muntu ngayi atambule wuwahe.

²⁴ Mwa shikuma nikumitongweza ngayi, ndele lupeka lwa loto luwile hanci lukekala ninkayalwo. Ngoboni ndi lukufwa, lukayima mikabo yayingi.

²⁵ Muntu uku haka wumi wendi, ukawuyongesha, pe ou ukuzimba wumi wendi mu kano kaye ukawulama kutwala ku wumi wa mwaya myaka.

²⁶ Ndi muntu ukutenda mulimo wami nafwanini kunkonka. Oku nikekala niko kami akekala na mukamulimo wami. Pe Tate ukamulemeka ou nimwendi ukatenda mulimo wami.

Yeshu ukwamba bya ha lufu lwendi

²⁷ “Wuluno mutima wami unakalikizi. Kati nikamba bishini? Kati nikambe ngayi, ‘Tate, ndamwine ku shikati shino ndi?’ Byo, ndaba yanebye nezilile shikati eshe.

²⁸ Tate, monesha wuwahe ku lizina lyobe.” Niho kwayuvwanikile lizu lyafumine kuyilu ngayi, “Ninalimoneshe shiwahe, pe kami nikaliwahisha.”

²⁹ Likunge lya bantu baya bemanine kuyo bayuvwile lizu, pe bamo bambile ngayi mushika, bamina ngayi, “Lingeloyi linamba kukwendi!”

³⁰ Yeshu wabatongwezele ngayi, “Lizu lyayuvwaniki kaliha ndaba yami, ngoboni ndaba yanenu.

³¹ Wuluno nisho shikati sha kuyata kano kaye, wuluno mwene wa kano kaye ukayumbiwila ha munkanda.

³² Oho ami bakankoleka hano hanci, nikakokela bantu nimwabo kukwami.”

³³ (Yeshu wambile ebye ku monesha lufu olu akafwa.)

³⁴ Likunge lya bantu bambile ngayi, “Tunayuvwu ku ndayano ngayi Kilishitu ukekala mwaya myaka, pe obe ukwamba nahiti ngayi Mwana Muntu unafwanini kukolekiwa? Kati ou Mwana Muntu yani?”

³⁵ Yeshu wabatongwezele ngayi, “Lumuni lukekala mukati kenu kashikati kakashe tuhu. Endenu oho mushili na lumuni kutina mincimpwe yimiwana. Muntu ukwenda mu mincimpwe kulimuka oku akuya wufwako.

³⁶ Oho mushili na lumuni, kulupilenu olu lumuni, ngayi mufutuke kwinga bana ba lumuni.” Oho Yeshu amanishile kwamba, wakatukileho niho akaliholekele.

Kubula kukulupila kwa Bayunda

³⁷ Hinge ndi Yeshu watendele bikomokesho byabingi mukati kabo, ngoboni babulile kumukulupila.

³⁸ Ebye byatendiwile ngonehe ambile muluwe Ishaya ngayi, “Mwene, kati yani unetabili ncango zetu? Kati Mwene unahololo ngovu zendi kuli yani?”

³⁹ Nohobene babulile kukulupila, ndaba Ishaya wambile kami ngayi,

⁴⁰ “Unashipishi meho wabo na kukaluhisha mitima yabo, Kutina bamona na meho wabo, na kuyuvwa na matu wabo, na ku yuvwishisha mu mitima yabo, na kutengulukila kukwami ngayi ni ba nyongomanishe.”

⁴¹ Ishaya wambile ebye ndaba wamonene wuwahe wa Yeshu.

⁴² Hinge noho, bakulwane ba Bayunda bakulupilile Yeshu, ngoboni ndaba ya Bafwalishi babulile kulimonekesha ngayi banakulupili. Batinine ngayi ba kubafumisha mu shinangonge.

⁴³ Ndaba bahakile ngayi bantu babayemeze kupitakana ngayi Nyambi abayemeze.

Kuyatiwa na mazu a Yeshu

⁴⁴ Yeshu wakangokele ngayi, “Muntu nimwendi ukukulupila mumwami, kukulupila mumwami tuhu wufwako, ngoboni ukukulupila mumwendi uya wantumine.

⁴⁵ Kami muntu unamono ami, unamono kami nou wantumine.

⁴⁶ Ami lumuni lunezi muno mu kaye, nohobene muntu nimwendi ukukulupila mumwami kukekala mu mincimpwe wufwako.

⁴⁷ “Muntu ukuyuvwa mazu wami na kubula kuwalama, kukamuyata nifwako, ndaba kaliha nezile na kuyata kaye, ngoboni na kupulwisha kaye.

⁴⁸ Muntu ukunkana na kubula kutambula mazu wami, uli na mukakumuyata. Lizu elye ninamba nilyo likamuyata ha mutena wa kukotoka.

⁴⁹ Ndaba kaliha nambile na ngovu zami, ngoboni Tate wantumine, niye wantongwezele bya kwamba na neshe nafwanini kubyamba.

⁵⁰ Nikulimuka ngayi ndayano zendi zikutwaminina ku wumi wa mwaya myaka. Nohobene ebye nikwamba, nibyo Tate antongwezele ngayi nibyambe.”