Yowano 11 - Libuka Lya Kuyela

Lufu lwa Lazalo

¹ Kwekalile muntu umo wakolelenga, lizina lyendi Lazalo waku Mbetani mu munzi wa Maliya na Mata.

² Ou Maliya niye wayitilile mazi a lukumba ha mawulu a Mwene na kuwakunkumuna na huki zendi. Mpanzendi Lazalo niye wakolele.

³ Niho bampanzendi batumine mazu kuli Yeshu na kumutongweza ngayi, “Mwene, muhoni wobe uya wahaka uli na kukola.”

⁴ Oho Yeshu ayuvwile ebye, wambile ngayi, “Ou wulweli kumuziha wufwako, ngoboni wakupana maleema kuli Nyambi, ngayi Mwana Nyambi mwanga ayemeziwe.”

⁵ Yeshu wahakile Mata na mukonzo wendi na Lazalo.

⁶ Ngoboni oho ayuvwile ngayi Lazalo ukukola, wonzele matena abili ku mwanya ekalile.

⁷ Oho aya matena apitile wambile ku bandongesha bendi ngayi, “Tuyenunga tuboke ku Yundeya.”

⁸ Bandongesha bendi bambile kukwendi ngayi, “Mulongeshi, munapiti tuhu shikati shashishe oho Bayunda bashinga kukupuha mamanya, haya niko kami unakushinga kuya ndi?”

⁹ Yeshu wakumbwile ngayi, “Kati mutena kaliha wekala na bikati likumi na bibili ndi? Muntu nimwendi ukwenda ku mwaana, kupukala wufwako, ndaba uku mona lumuni lwa kano kaye.

¹⁰ Ngoboni muntu nimwendi ukwenda wushiku, ukupukala, ndaba lumuni wufwalwo.”

¹¹ Oho amanishile kwamba ebye, niho ambile kukwabo ngayi, “Muhoni wetu Lazalo unalangana tulo, ngoboni nikuya na kumupindula.”

¹² Bandongesha bendi bambile kukwendi ngayi, “Mwene, ndi nalangana tulo, ukunyongomana.”

¹³ Yeshu watoyelenga bya lufu lwa Lazalo, ngoboni bandongesha bendi bahanganikile ngayi wambilenga bya kulangana tulo twa kukatala.

¹⁴ Niho Yeshu ambile shintwantwa kukwabo ngayi, “Lazalo unafu,

¹⁵ pe ndaba yanenu, niku wahilila aha nabula kwikalako, ngayi mwanga mukulupile. Haya tuyenunga kukwendi.”

¹⁶ Niho Tomashi (ou watumbiwile Mbuyu) ambile ku baminendi bandongesha ngayi, “Tuyenunga na mulongeshi ngayi mwanga tukafwe hamo nendi!”

Yeshu niye ku shanguka na wumi

¹⁷ Oho Yeshu akumine, wawanine ngayi Lazalo wekalakale matena anaa mu shinzimbi.

¹⁸ Mbetani hengile hahepi na Yelushalema, mukala ukushinga kulingana makilomita ahatu,

¹⁹ pe Bayunda babengi bezile kuli Mata na Maliya na kubabengezeka ndaba ya lufu lwa mpanzabo.

²⁰ Oho Mata ayuvwile ngayi Yeshu ulinakwiza, wayile na kumushimbawila. Ngoboni Maliya wekalile mu litala.

²¹ Niho Mata ambile kuli Yeshu ngayi, “Mwene, shinga niko wekala kuno, shinga mpanzami kufwa wufwako.

²² Ngoboni hinge wuluno nikulimuka ngayi nimwasho ukalomba kuli Nyambi, Nyambi ukakupanasho.”

²³ Yeshu wambile kukwendi ngayi, “Mpanzobe ukushanguka.”

²⁴ Mata wamukumbwile ngayi, “Nikulimuka ngayi ukashanguka ha mutena wa kukotoka.”

²⁵ Yeshu wambile kukwendi ngayi, “Ami ku shanguka na wumi. Ou ukukulupila mumwami, ukayoya hinge ndi ukufwa.

²⁶ Kami ou ukuyoya hinga akulupila mumwami, kukafwa wufwako. Unakulupili ebye ndi?”

²⁷ Wambile kukwendi ngayi, “Ingoi, Mwene, ninakukulupili ngayi obe Kilishitu Mwana Nyambi ou ukeza mu kaye.”

Yeshu ukulila

²⁸ Oho Mata amanishile kwamba ebye, wabokele na kwihana mukonzo wendi Maliya na kumuyebetela ngayi, “Mulongeshi unezi, uli na kukwihana.”

²⁹ Oho Maliya ayuvwile ebye, wanguwangu wemanine, wayile kuli Yeshu.

³⁰ (Hashikati shiyo, Yeshu shilolo akume mu munzi, ngoboni wekalile kuyo Mata amuhanganine.)

³¹ Bayunda baya bekalile mu litala na kubengezeka Maliya, oho bamonene eshe akatukile wanguwangu na kututikila ha munkanda bamukonkele. Bahanganikile ngayi ukuya ku shinzimbi na ku lililako.

³² Maliya wakumine haya ha mwanya ekalile Yeshu, oho amumonene, wafunkamine kukwendi hamba ngayi, “Mwene, shinga niko wekala kuno, shinga mpanzami kufwa wufwako.”

³³ Yeshu wamonene Maliya halila na Bayunda kami baya ezile nabo hibalila, wayenene shikuma mu mutima na kukalikiza.

³⁴ Pe wabepwile ngayi, “Kati mwamufunda kuti?” Niho bakumbwile ngayi, “Mwene, yeka umone.”

³⁵ Yeshu walilile.

³⁶ Bayunda bambile ngayi, “Monenu eshe amuhakile!”

³⁷ Ngoboni bamo kukwabo bambile ngayi, “Kati ou muntu kaliha niye watoneshele kashishitwa ndi? Kati shinga kaliha watwesha kumuyavwa ngayi hinga afwa ndi?”

Yeshu ukushangula Lazalo

³⁸ Yeshu hinga ayena shikuma, wayile ku shinzimbi. Lyengile linzolongoma lyafwikiwile na limanya.

³⁹ Yeshu wambile ngayi, “Fwikululenuko limanya.” Mata, mpanza uya wafwile, wambile ngayi, “Mwene, shikati shino uli na kunuka, ndaba kufuma haya afwile kwapitakale matena anaa.”

⁴⁰ Yeshu wambile kukwendi ngayi, “Kati kaliha na kutongweza ngayi ndi ukukulupila ukamona wuwahe wa Nyambi?”

⁴¹ Niho bafukulwile limanya ku shinzimbi. Yeshu watilaminine kuyilu, pe wambile ngayi, “Tate, nikukambilila ndaba unanyuvwu.

⁴² Nalimuka ngayi wanyuvwanga shikati nimwasho, ngoboni namba eshe ndaba ya bantu aba banemana, mwanga ba kulupile ngayi obe wantumine.”

⁴³ Oho Yeshu ambile ebye, pe wabilikizile na lizu lyalinene ngayi, “Lazalo, fumamo!”

⁴⁴ Mufu wafuminemo, maboko na mawulu wendi amangiwile na makwiza amu shinzimbi na lupala lwendi lwazengiwile na likwiza. Yeshu wambile kukwabo ngayi, “Mumangululenu, pe mulehenu aye.”

Bihanganiko bya kuziha Yeshu

⁴⁵ Bayunda babengi baya bezile na kuzingula Maliya bamonene ebye Yeshu atendele, pe bamukulupilile.

⁴⁶ Ngoboni bamo bayile na kutongweza Bafwalishi ebye atendele Yeshu.

⁴⁷ Niho bakankombela ba bakulwane na Bafwalishi behanine bakankuta, pe balyambashanine ngayi, “Tukatenda bishini? Ndaba ou muntu ukutenda bikomokesho byabingi.

⁴⁸ Ndi etu kumulehesha tufwako, muntu nimwendi ukamukulupila. Pe Baloma bakeza na kunongesha Litala lya Nyambi na litunga lyetu!”

⁴⁹ Ngoboni umo wabo lizina lyendi Kayafwashi, ou wengile Mukulwane wa Bakankombela Nimwabo mwaka uyo, wambile ngayi, “Enu kulimuka shamina mufwako.

⁵⁰ Kati ku yuvwishisha mufwako ngayi shashiwahe kukwenu muntu umo afwile bantu kupitakana litunga nimwalyo linonge.”

⁵¹ Kaliha wambile eshe mu shifungo shendi, ngoboni hinga enga Mukulwane wa Bakankombela Nimwabo mu mwaka uyo walubulwile ngayi Yeshu ukafwila mushobo wa Bayunda.

⁵² Kami kaliha nibo tuhu, ngoboni ngayi akungulule bantu ba Nyambi benge umo, baya bapanzanine.

⁵³ Kufuma ha mutena uyo bahanganikile mwakuzihila Yeshu.

⁵⁴ Ndaba ya neshe Yeshu walehele kwenda mwaanancanana mukati ka Bayunda. Ngoboni wafumine na kuya ku litunga lyekalile hahepi na libelelengwa, ku munzi watumbiwile Efulemu, niko akekalile na bandongesha bendi.

⁵⁵ Oho Shimbo sha Bayunda sha Kupitilila shekalile hahepi, bantu babengi bafumine ku minzi kuya ku Yelushalema na kutenda shiheka sha kuliyelesha oho Shimbo sha Kupitilila shilolo shitendiwe.

⁵⁶ Bekalile na kushinga Yeshu, pe oho bakungulukile mu Litala lya Nyambi balyambashanine ngayi, “Kati enu mu kuhanganika nahiti? Kati kwiza ku shimbo wufwako ndi?”

⁵⁷ Ngoboni bakulwane ba bakankombela na Bafwalishi batongwezele bantu ngayi nimwendi muntu ukulimuka oku ali Yeshu, abatongweze ngayi bamukwate.