Yoshuwa 4 - Libuka Lya Kuyela

Ishalela ukuyaka shanukisho sha mamanya

¹ Oho mukoka wa bantu ba Ishalela nimwawo wamanishile kuzabuka mushinzi wa Yondana, Nyambi ya Ngula wambile kuli Yoshuwa ngayi,

² “Hata balume likumi na babili, mulume umo waku mushobo na mushobo,

³ pe ubatongweze ngayi, ‘Shimbenu mamanya likumi na abili amu mushinzi wa Yondana, aku mwanya ou bene banemanini mawulu a bakankombela.’ Batongweze bashimbe mamanya awa, pe bakawayake oku mukatulila mazolo.”

⁴ Niho Yoshuwa ehanine balume likumi na babili aba ahatile ku Baishalela,

⁵ pe Yoshuwa wabatongwezele ngayi, “Yenunga mu Yondana kumbili ya Likwati lya Kulimama kwa Nyambi ya Ngula, Nyambi yenu. Shimbenu muntu na muntu limanya ha bifuzi byenu, limanya limo na limo likwimanina ha mishobo ya Ishalela.

⁶ Awa mamanya anengi shilimukisho shakwanukisha bantu ebye anatende Nyambi ya Ngula. Oho bana benu bakamipula kumbili ngayi, ‘Mamanya awa akutontolola bishini kukwenu,’

⁷ muka batongweza ngayi mema amu Yondana alehele kukunkula oho Likwati lya Kulimama kwa Nyambi ya Ngula bazabukilenga mushinzi wa Yondana. Awa mamanya akonzela kwanukisha bantu ba Ishalela kunebye binamoneke kuno mwaya myaka.”

⁸ Niho balume ba Baishalela batendele, ngonehe eshe Nyambi ya Ngula atongwezele Yoshuwa. Bashimbile mamanya likumi na abili a mukati ka Yondana, limanya limo na limo lyemaninine mishobo likumi na yibili ya Baishalela ngonehe Nyambi ya Ngula atongwezele Yoshuwa, pe bawashimbile na kuwatwala ku munkungwa, pe niko bakawabungikile.

⁹ Yoshuwa washimbile mamanya amina kami likumi na abili na kuwabungika mukati ka mushinzi wa Yondana, oku kwemaninenga mawulu a bakankombela bakakushimba Likwati lya Kulimama kwa Nyambi ya Ngula. Mamanya awa niko ashili nihano.

¹⁰ Ndaba bakankombela aba bashimbilenga Likwati lya Kulimama bemaninenga mukati ka Yondana hantu noho bamanishile kutenda byuma nimwabyo biya Nyambi ya Ngula atongwezele Yoshuwa ngayi bantu babitende. Eshe nisho Moshesha atongwezele Yoshuwa. Niho bantu banyankupile na kuzabuka mushinzi.

¹¹ Oho bantu nimwabo bazabukilile mu nciza, pe bakankombela bashimbilenga Likwati lya Kulimama kwa Nyambi ya Ngula, bazabukile na kutwamina kumbili ya bantu.

¹² Balume ba mishobo ya Lubena na Ngandi na shitika sha mushobo wa Manashe bazabukilengaho kumbili ya bantu ba Ishalela, mu kulishakashakila bya nzita, ngonehe shiya abatongwezele kutenda Moshesha.

¹³ Bantu ba kukuma ku 40,000 balishakashakile bya nzita, bazabukile mu nciza mu mbuwa ya hahepi na Yeliko ku meho a Nyambi ya Ngula.

¹⁴ Ebye atendele Nyambi ya Ngula uya mutena byaleteshele bantu ba Ishalela kupana maleema Yoshuwa kwinga muntu wamunene. Bamulemeekelenga ngonehe balemeekelenga Moshesha mu kuyoya kwendi nimwamo.

¹⁵ Nyambi ya Ngula watongwezele Yoshuwa ngayi,

¹⁶ “Tongweza bakankombela, aba bashimba Likwati lya Kulimama kuzabuka Yondana.”

¹⁷ Yoshuwa watongwezele bakankombela ngayi bazabuke mu mema.

¹⁸ Oho bakankombela baya bashimbilenga Likwati lya Kulimama bazabukile na kulyata ha lukandwa, mema a mushinzi atatikile kukunkula na kuyita kami bibumbo byawo.

¹⁹ Bantu bazabukile mushinzi wa Yondana ha mutena wawulikumi wa ngonda wakutatika, pe batulilile ku Ngilingale, ku nginza yaku mushamuko wa Yeliko.

²⁰ Yoshuwa wabungikileko mamanya likumi na abili ashimbiwile mu Yondana.

²¹ Pe wambile ku bantu ba Ishalela ngayi, “Oho bana benu bakamipula ku matena a kumbili ngayi, ‘Awa mamanya akutontolola bishini?’

²² Niho mukatongweze bana benu ngayi, ‘Ishalela wazabukile ou mushinzi wa Yondana ha limvu lya kuyuma.’

²³ Ndaba Nyambi ya Ngula, Nyambi yenu unayumishili mema a Yondana hantu noho munazabuku, ngonehe shiya kami atuyumishilile mema amu Liwate lya Kufubila hantu noho twazabukile.

²⁴ Ndaba ya neshe bantu nimwabo hano hanci bakalimuke wunene wa ngovu za Nyambi ya Ngula eshe wekala, ngayi mukekale na bowa na Nyambi ya Ngula, Nyambi yenu, mwaya myaka.”