Yoshuwa 3 - Libuka Lya Kuyela

Ishalela ukuzabuka mushinzi wa Yondana

¹ Oho kwashile lumenene shikuma, Yoshuwa na bantu nimwabo ba Ishalela balimenekele kupinduka, bafumine ku Shitimu bayile ku Yondana. Niko bakatulilile kutatilila ngayi bazabuke.

² Oho kwapitile matena ahatu bakakutwaminina bayile na kupita mukati ka munkungwa,

³ pe batongwezele bantu ngayi, “Oho mukamona bakankombela (nibo Balevi) hinga bashimba Likwati lya Kulimama kwa Nyambi ya Ngula, Nyambi yenu, manga mangenu pe mwanga mubakonke.

⁴ Ngoboni hinga mwendela kwakwipi na Likwati lya Kulimama kwa Nyambi ya Ngula, endelenu kwakutali, kantabule kakushinga kulingana mukala wa kilomita yimo kunyima yalyo.” Hinga mwatanga kwikalako kuno, nohobene nibo bakamitongweze nzila mu kuya nayo.

⁵ Yoshuwa wambile ku bantu ngayi, “Liyeleshenu, ndaba nzona Nyambi ya Ngula ukatenda bikomokesho hakati kenu.”

⁶ Niho Yoshuwa ambile kuli bakankombela ngayi, “Katulenu Likwati lya Kulimama kwa Nyambi ya Ngula na kutwaminangaho kumbili ya bantu.”

⁷ Niho Nyambi ya Ngula ambile kuli Yoshuwa ngayi, “Eshe nikutenda lelo shikengisha bantu nimwabo ba Ishalela kukulemeeka kwinga muntu wamunene, pe bakalimuka ngayi nili hamo na nobe ngonehe shiya nekalilenga na Moshesha.

⁸ Tongweza bakankombela, bakakushimba Likwati lya Kulimama kwa Nyambi ya Ngula ngayi, ‘Oho bakakuma ku mushinzi wa Yondana, ba ku fwanina kukunkuluka mu mema na kwimana kwakwipi na shibumbo.’”

⁹ Niho Yoshuwa atongwezele Baishalela ngayi, “Yekenu kuno, pe muyuvwilile ebye akwamba Nyambi ya Ngula, Nyambi yenu.”

¹⁰ Niho Yoshuwa ambile ngayi, “Haya lelo mulimuke ngayi Nyambi wakuyoya uli hakati kenu, kukakwanga ufwako. Oho mu kuya na kulikaka, ukatanda Bakenaani na Bahita na Bahivi na Bapelizi na Bangilingashi na Baamoli na Bayembushi.

¹¹ Monenu Likwati lya Kulimama kwa Nyambi ya Ngula wa hano hanci nimwaho likayangaho kumbili yenu na kuzabuka Yondana.

¹² Haya hatenu balume likumi na babili, mulume umo waku mushobo na mushobo wa Ishalela.

¹³ Oho bakankombela aba bashimbanga Likwati lya Kulimama kwa Nyambi ya Ngula, ou Mwene wa hanci nimwaho, oho bakalyata mawulu wabo mu mema, Yondana ukalehasho kukunkula pe mema akaliketula, akemana likingiwe.”

¹⁴ Oho bantu bafumine mu munkungwa na kuzabuka mushinzi wa Yondana, bakankombela bayile kumbili na kushimba Likwati lya Kulimama.

¹⁵ Eshe shengile shikati sha kuteza oho kwekalile libazi mu mushinzi wa Yondana. Pe bakankombela aba bashimbile likwati ba kunkulukile tuhu mu mushinzi na kulyata mema,

¹⁶ pe mukati ka mushinzi mema alehele kukunkula pe engile likingiwe kwakutali, ku lukena lwa Andama, lwa kunkumo na Zaletani. Nkunkula ya noku kwa yanga mema kukunkuluka mu liwate lya Mushele lyayukukile nimwalyo yukwaa, pe bantu batweshele kuzabuka kwakwipi na Yeliko.

¹⁷ Aha bantu baishalela bendele na kuzabuka hanci ha kuyuma, bakankombela baya bashimbilenga Likwati lya Kulimama kwa Nyambi ya Ngula bemanine ha limvu lya kuyuma mukati ka mushinzi wa Yondana hantu bantu nimwabo bazabukile mu nciza.