Yoshuwa 24 - Libuka Lya Kuyela

Yoshuwa ukwamba ku bantu ku Shekemu

¹ Yoshuwa wakungwile mishobo nimwayo ya Ishalela hamo ku Shekemu. Wehanine bakulwane na bakakutwaminina na bakakuyata na babilolo ba Ishalela, pe bezile ku meho a Nyambi ya Ngula,

² Yoshuwa wambile ku bantu nimwabo ngayi, “Eshe nisho akwamba Nyambi ya Ngula, Nyambi wa Ishalela ngayi, ‘Kushikale, bankakazenu ba Tela na bana bendi babalume, Abulahama na Nahole bekalilenga mu nciza ya Mushinzi wa Yufuleti kuyo balemeshelenga banyambi bashenge.

³ Niho nafumishile Abulahama nkaka yenu mu litunga lya mu nciza ya mushinzi wa Yufuleti na kumuleta mu litunga nimwalyo lya Kenaani. Namupanikile bazukulu babengi. Namupanikile Ishaki,

⁴ kuli Ishaki namupanikile Yakobo na Ishau. Napanikile Ishau litunga lya binkanda lya Endoma kwinga likona lyendi, ngoboni nkaka yenu Yakobo na bana bendi bayile ku Engepita.

⁵ Kunyima yanebye, niho natumine Moshesha na Aloni, pe naletele malwa amanene ha Engepita. Niho namitutwishilemo.

⁶ Nafumishile bankakazenu mu Engepita. Pe Baengepita babatandile na makoloyi hamo na bakakukandama bambishi. Ngoboni oho bankakazenu bakumine ku Liwate lya Kufubila,

⁷ behanine kukwami ngayi nibayavwe, pe nayakile mincimpwe mukati kabo na Baengepita. Nengishile liwate ngayi likunkule mema pe lya kupwile Baengepita. Mwamonene eshe natendele ku Baengepita, pe enu mwekalile mu libelelengwa shikati shashitali.

⁸ “‘Niho namiletele mu litunga lya Baamoli, aba bekalilenga mu nciza ku mushamuko wa Yondana. Bamilwishile, pe namipanikile ngovu za ku bakoma. Mwashimbile litunga lyabo, pe oho mwayile na kulikaka nabalobeshele.

⁹ Niho Mbalaki mwana Zipola, mwene waku Mowambi, walwishile Ishalela. Watumine lizu kuli Mbalaamu, mwana Mbeyola wamulume na kumutongweza ngayi amikute.

¹⁰ Ngoboni nabulile kuyuvwilila Mbalaamu, nohobene shikuto shafutukile mfuywezi, pe mu nzila eye namilamwinine kuli Mbalaki.

¹¹ Mwazabukile Yondana, mwakumine ku Yeliko. Bantu ba ku Yeliko na Baamoli na Bapelizi na Bakenaani na Bahita na Bangilingashi na Bahivi, hamo na Bayembushi bamilwishile, ngoboni namipanikile ngovu za kubakoma.

¹² Oho mwayile na kulikaka nabayakile mu kampwe kaya kabatandile, hamo na bamyene babili ba Baamoli. Mikwale yenu na bipando byenu bya mikunzi kowa shuma mwabitendeshele.

¹³ Namipanikile mafuba aya mwabulile kukuna na minzi yiya mwabulile kuzika. Hano nimo muli na kwikala, pe muli na kulya mikabo yaku mikolobozi ya shinyanca yiya mwabulile kukuna naku mikabo ya olive yaku mitondo yiya mwabulile kukuna.’”

¹⁴ Yoshuwa wambile kami ngayi, “Hayaboni, lemeekenu Nyambi ya Ngula na kumutendela milimo na mutima umo na kwoloka. Fumishenu banyambi aba balemeshelenga bankakazenu mu Meshopotamiya namu Engepita, pe tendelenu milimo tuhu Nyambi ya Ngula.

¹⁵ Ndi mufwako kushinga kutendela milimo Nyambi ya Ngula, lihatilenu mutena walelo ou mukushinga ngayi mukamutendele milimo, ndi mukushinga kutendela milimo banyambi ba bankakazenu mu litunga lya Meshopotamiya hinge banyambi ba Baamoli bamu litunga omu mwazikakale wuluno. Nehiboni ami na ba lupashi lwami tukatendelanga milimo Nyambi ya Ngula.”

¹⁶ Bantu bakumbwile ngayi “Tufwako kukashiya Nyambi ya Ngula na kutendela milimo banyambi bashenge!

¹⁷ Ndaba Nyambi ya Ngula, Nyambi yetu wafumishile batatizetu hamo nanetu mu wulungo wa Engepita, pe twamonene bikomokesho biya atendele. Watulaminenga nimwako oku twayilenga mukati ka mikoka nimwayo omu twapitilenga.

¹⁸ Oho twezilenga na kulikaka mu litunga lino, Nyambi ya Ngula watandile Baamoli nimwabo aba bazikilenga muno. Nohobene netu kami tukatendela milimo Nyambi ya Ngula, ndaba niye Nyambi yetu.”

¹⁹ Ngoboni Yoshuwa wambile ku bantu ngayi, “Kukatwesha mufwako kutendela milimo Nyambi ya Ngula ndaba wenga Nyambi wa kuyela, wenga Nyambi walihungu, kami kukamiyatila wubi wenu ufwako.

²⁰ Ndi mu kushiya Nyambi ya Ngula na kutendela milimo banyambi bashenge, ukamifutulukila na kumi lwisha na kumishushula. Ukamilobesha, hinge ndi ha kutatika wengile wamuwahe kukwenu.”

²¹ Bantu bambile kuli Yoshuwa ngayi, “Byo! Tukatendela milimo Nyambi ya Ngula.”

²² Yoshuwa wambile kukwabo ngayi, “Enu bamwine munengi bapaki ngayi mwa shikuma munalihatili kutendela milimo Nyambi ya Ngula.” Bambile ngayi, “Ingoi, tuli bapaki.”

²³ Yoshuwa wambile ngayi, “Haya fumishenu banyambi bashenge baya muli nabo, pe yakenu mitima yenu nimwayo kuli Nyambi ya Ngula, Nyambi wa Ishalela.”

²⁴ Niho bantu bambile kuli Yoshuwa ngayi, “Tukatendela milimo Nyambi ya Ngula, Nyambi yetu. Tukombatala ndayano zendi.”

²⁵ Nohobene Yoshuwa wamamishile bantu ha mutena uyo, kami kuyo ku Shekemu wabafundizizile na kubapana ndayano za Nyambi ya Ngula.

²⁶ Yoshuwa watikitile mu libuka lya ndayano za Nyambi. Niho, ashimbile limanya lyalinene, pe waliyimikile kuyo ku nceto ya mutondo wa Oka, mu mwanya wa Nyambi ya Ngula wakuzila.

²⁷ Niho kami ambile ku bantu nimwabo ngayi, “Monenu elye limanya! Nilyo likenga wupaki wetu. Nilyo linayuvwu mazu nimwawo aya anamba Nyambi ya Ngula kukwetu. Nohobene nilyo likenga wupaki kukwenu, kumikanisha kufutulukila Nyambi yenu.”

²⁸ Niho Yoshuwa apanzanishile bantu pe bantu nimwabo babokele ku zimbalila za matunga wabo.

Kufwa kwa Yoshuwa na Eliyaza

²⁹ Kunyima yanebye, Yoshuwa mwana Nune, mukamulimo wa Nyambi ya Ngula, wafwile oho uli na myaka 110.

³⁰ Bamufundile hambalila ya limvu lyendi ku Timunati Shela mu litunga lya binkanda lya Efulemu, ku ncelele ya lipili lya Ngashi.

³¹ Shikati nimwasho ayoyele Yoshuwa, bantu ba Ishalela batendelelenga milimo Nyambi ya Ngula, pe oho afwile bazaminine kutendela milimo Nyambi ya Ngula hantu noho shikati osho bayoyele bakakutwaminina aba bamonene nibo bamwine nimwabyo biya Nyambi ya Ngula atendelele Ishalela.

³² Bifupa bya Yoshefwa biya bafumishile bantu ba Ishalela ku Engepita, byafundiwile ku Shekemu, mu shiketu sha litunga liya alandile Yakobo kuli bana ba Hamole, tata Shekemu na mali a shiliva akulingana 100 a muwayawaya wa shiliva. Mfuba yengile likona lya bazukulya Yoshefwa.

³³ Eliza mwana Aloni wafwile. Pe wafundiwile mu Ngimbiya, munzi wa mwanendi Fwinihashi, owe bamupanikile mu litunga lya binkanda lya Efulemu.