Yoshuwa 22 - Libuka Lya Kuyela

Yoshuwa ukutuma bantu ba ku mushamuko ku minzi yabo

¹ Niho Yoshuwa ehanine bantu ba mishobo ya Lubena na Ngandi na shitika sha mushobo wa Manashe waku Mushamuko.

² Wambile kukwabo ngayi, “Munatende byuma nimwabyo biya amilayile Moshesha mukamulimo wa Nyambi ya Ngula, kami munombatala ndayano zami nimwazo.

³ Kunapiti shikati shashinene kuleta naku shikati shino nimwasho, shilolo mukende baminenu Baishalela, ngoboni munekala na kulifulankana kwombatala mazu a Nyambi ya Ngula, Nyambi yenu.

⁴ Haya Nyambi ya Ngula unapaniki baminenu Baishalela ku mwena ngonehe a kulupishile. Nohobene nenu bokenu ku minzi ku litunga lya mu nciza ya Yondana, elye amipanikile Moshesha mukamulimo wa Nyambi ya Ngula.

⁵ Monenu ngayi mukalama ndayano ziya amipanikile Moshesha mukamulimo wa Nyambi ya Ngula. Kami hakenu Nyambi ya Ngula, Nyambi yenu, pe tendenu shifungo shendi na kwombatala kufundiziza kwendi, pe yingenu bakulunga kukwendi na kumutendela milimo na mitima nimwayo na myoyo yenu nimwayo.”

⁶ Yoshuwa wabatandalishile, pe wabatongwezele ngayi baboke, niho babokele ku minzi yabo.

⁷ Moshesha wapanine litunga lya Mbashani ku shitika shimo sha mushobo wa Manashe, ngoboni shitika shamina sha mushobo wa Manashe, Yoshuwa niye wabapanine litunga lya ku mponci ya mushinzi wa Yondana hamo na mishobo yamina, pe Yoshuwa oho amanishile kubatandalisha, wabatongwezele ngayi baboke,

⁸ wambile ngayi, “Bokenu ku minzi yenu na wuheti wenu wawingi shikuma, wa zingombe na shiliva na ngolinde na lubemba na byondo na bivwalo. Muka litapishile na bawushindawenu Baishalela ebye munapukulu ku bamalamo benu.”

⁹ Nohobene bantu ba mishobo ya Lubena na Ngandi na shitika sha mushobo wa Manashe babokele ku minzi yabo. Bashiyile wingi wa Baishalela ku Shilo mu litunga lya Kenaani, pe bayile ku litunga lya Ngiliyande, litunga lyabo elye bashimbile ngonehe abatongwezele Nyambi ya Ngula muli Moshesha.

Kaala katendiwile hahepi na Yondana

¹⁰ Oho mishobo ya Lubena na Ngandi na shitika sha mushobo wa Manashe waku mushamuko bakumine ku Ngeliloti, oho bashili mu nciza ya mponci ya Yondana, bazikile kaala kakanene shikuma kakukomokesha kuyo ku mushinzi.

¹¹ Wingi wa Baishalela bashalile oho bayuvwile ngayi, “Mishobo ya Lubena na Ngandi na shitika sha mushobo wa Manashe banatende kaala ku Ngeliloti hahepi na Yondana mu Kenaani mu litunga lya Baishalela.”

¹² Oho bantu Baishalela bayuvwile eshe, bantu nimwabo bakungulukile hamo ku Shilo, ngayi baye mu kulwisha mishobo yaku mushamuko.

¹³ Niho Baishalela batumine Fwinihashi, mwana mukankombela Eliza, ku bantu ba mishobo ya Lubena na Ngandi na shitika sha mushobo wa Manashe, mu litunga lya Ngiliyande.

¹⁴ Fwinihashi wayile na babilolo likumi, umo waku mushobo na mushobo wa Ishalela. Muntu na muntu hakati kabo wengile mukulwane wa lupashi lwa mavumo a Ishalela.

¹⁵ Bezile ku litunga lya Ngiliyande, ku bantu ba Lubena na Ngandi na shitika sha mushobo wa Manashe, bambile kukwabo ngayi,

¹⁶ Likunge nimwalyo lya Nyambi ya Ngula banamba ngayi, “Kati shumangani eshe mwengakale ba kulungwa nakufutulukila Nyambi wa Ishalela? Munafutilukili Nyambi ya Ngula ha kulizikila aka kaala enu bamwine, mwamufutulukilakale.

¹⁷ Anukenu wubi wetu waku Peyola, oho Nyambi ya Ngula ashushwile bantu bendi na wulweli wakubula kupangiwa nashino shikati tushili kuyanda ndaba ya uya wubi. Kati uya wubi kaliha watupembulwishile ndi?

¹⁸ Kati haya munakukana kukonka Nyambi ya Ngula ndi? Ndi mu kufutulukila na kulwisha Nyambi ya Ngula lelo, niye ukapilamina bantu nimwabo Baishalela nzona.

¹⁹ Haya ndi litunga lyenu linabipi, pe yekenu mu litunga lya Nyambi ya Ngula, omu muli ntanda yendi, mwikale hamo nanetu. Ngoboni hinga mufutulukila Nyambi ya Ngula, hinge kutufutamina ha kutenda kaala kufungila ku kaala ka Nyambi ya Ngula, Nyambi yetu.

²⁰ Anukenu Akani mwana Zela eshe akanine kwombatala ha byuma byafunguliwile kwinga nkombela kuli Nyambi ya Ngula, likunge nimwalyo lya Baishalela lyashushuliwile ha kutenda bya noho. Akani kaliha wafwile ninkayendi ndaba ya wubi wendi.”

²¹ Bantu ba mishobo ya Lubena na Ngandi na shitika sha mushobo wa Manashe bakumbwile bakulwane ba mapashi a Ishalela ngayi,

²² “Nyambi wangovu nimwazo, Mpandashilanga! Nyambi wangovu nimwazo, Mpandashilanga! Niye Nyambi ya Ngula! Ukulimuka ngayi shumangani twatendele nehe, pe tukushinga ngayi nenu kami mulimuke! Ndi twamufutulukili na kubula kulama kukulupila kwetu na Nyambi ya Ngula, hinga mutwitabila ngayi tuyoye!

²³ Ndi twabulile kwombatala Nyambi ya Ngula na kutenda kaala ketu ha kuhokeshela nkombela, hinge kutendesha zintupu za mbuto ya mpeka hinge zintupu za kulilumikila, lehenu Nyambi ya Ngula niyemwine atushushule.

²⁴ Byo! Twatende nehe ndaba twatini ngayi kumbili bazukulyenu bakashilawiza bazukulyetu ngayi, ‘Enu mu kutwesha kutenda bishini kuli Nyambi ya Ngula, Nyambi wa Ishalela?

²⁵ Ndaba Nyambi ya Ngula unatende mushinzi wa Yondana kwinga nginza, mukatiketu nanenu bantu ba Lubena na Ngandi. Enu mufwasho shitapilo muli Nyambi ya Ngula.’ Pe bazukulyenu bakatweshe kukanisha bazukulyetu kulemesha Nyambi ya Ngula.

²⁶ Nohobene tunaziki kaala, kaliha kakuhokeshela nkombela hinge ka kutupwila zintupu,

²⁷ ngoboni ngayi shinge shilimukisho sha bantu betu nanenu naku bihemunwino bya kumbili, ngayi mwa shikuma twalemeshanga Nyambi ya Ngula kumbili ya ntanda yendi ya shizila na zintupu zetu za kuhokeshiwa na zinkombela na zintupu za kulilumikila. Eshe shika kanisha bazukulyenu kumbili kukambanga ku bazukulyetu ngayi ‘Enu mufwasho shitapilo muli Nyambi ya Ngula.’

²⁸ Niho twahanganika ngayi ndi kukambiwa noho, kukwetu hinge, ku bazukulyetu, pe bakambe ngayi, ‘Monenu, bankakazetu bazikile kaala kakulifweka na kaala ka Nyambi ya Ngula. Niko kaliha kengile ka kuhokeshela zintupu hinge zinkombela, ngoboni kenga shilimukisho sha bantu betu nanaba benu.’

²⁹ Mwa shikuma bene, etu kufutulukila Nyambi ya Ngula tufwako, hinge kuleha kumukonka lelo ha kutenda kaala ka zintupu za kuhokeshiwa, hinge zintupu za mbuto ya mpeka hinge zinkombela tufwako. Kukazika kaala kamina ka kupitakana kaala ka Nyambi ya Ngula kaya kemana kumbili ya ntanda yaku meho a Nyambi ya Ngula, Nyambi yetu, tufwako.”

³⁰ Mukankombela Fwinihashi na bakakutwaminina likunge aba bekalile nendi na bakulwane ba mapashi ba mishobo ya Ishalela ba ku mponci, oho bayuvwile ebye bambile bantu ba mishobo ya Lubena na Ngandi hamo na Manashe waku mushamuko, bya bawahilishile ku mitima.

³¹ Fwinihashi, mwana mukankombela Eliza, waba kumbwile ngayi, “Haya tukulimuka ngayi, Nyambi ya Ngula uli hamo nanetu. Shilolo mufutulukile Nyambi ya Ngula, ha kutenda nehe, nohobene haya munalamwini Baishalela kukashushwilo ka Nyambi ya Ngula.”

³² Niho Fwinihashi mwana mukankombela Eliza na bakakutwaminina bashiyile bantu ba Lubena na Ngandi mu litunga lya Ngiliyande, pe babokele ku Kenaani ku baminabo ba Ishalela na kubatongweza.

³³ Ncango zabo zawahilishile Baishalela. Pe bayemezele Nyambi, kaliha babokelele kami kwamba bya kuya ku nzita ngayi bakalobeshe litunga liya bazikile bantu ba Lubena na Ngandi.

³⁴ Bantu ba Lubena na Ngandi bambile ngayi, “Aka kaala kanengi wupaki kukwetu nimwetu ngayi Nyambi ya Ngula, wenga Nyambi” Pe bakatumbile ngayi “Wupaki.”