Yoshuwa 20 - Libuka Lya Kuyela

Minzi ya kutinina

¹ Nyambi ya Ngula watongwezele Yoshuwa kwamba ku bantu ba Ishalela ngayi,

² “Hatenu minzi ya kutinina, yiya nalayile Moshesha ngayi akutongwezeyo.

³ Ndi muntu ukuziha minendi na mapuza ha kwitukilako, ngayi mwanga apanze ku kawushinda wa wuya unafu ukushinga ngayi amuzihe na kubwesha wubi na wubi.

⁴ Ukutwesha kwitukila ku umo wa minzi eye na kuya ku mwanya wa mayatishilo ku menginino a munzi na kutongweza bakulwane eshe byekala. Pe bakamwitabila ngayi engine mu munzi na kumupana mwanya mwa kwikala, ngayi mwanga ekalemo.

⁵ Ndi kawushinda wa wuya unafu u namukonko ngayi amuzihe naku bwesha wubi ku wubi, bantu bamu munzi ku fwanina bafwako kupanika uya muntu kukwendi. Baku fwanina kumukoweza, ndaba unazihi uya muntu na mapuza, kaliha na kupilama.

⁶ Ukekala mu munzi hantu unayatishiwi ku meho a wingi wa bantu, pe hantu muntu ou wengile Mukulwane wabakankombela nimwabo ha shikati shiyo unafu, niho uya muntu akatweshe kuboka ku munzi wendi afumine.”

⁷ Nohobene, ku mponci ya Mushinzi wa Yondana, bahatile Kendeshi mu Ngalileya mu litunga lya binkanda lya Nafwitali na Shekemu mu litunga lya binkanda lya Efulemu na Kiliyati Alemba, hinge Hembuloni mu litunga lya binkanda lya Yunda.

⁸ Mu nciza ya Yondana ku mushamuko wa Yeliko, mu litunga lya kukankama mu libelelengwa, bahatile Mbezela mu litunga lya Lubena na Lamoti mu Ngiliyande mu litunga lya Ngandi na Ngolani mu Mbashani mu litunga lya Manashe.

⁹ Eye yengile minzi ya kutinina yahatiwilile bantu nimwabo ba Ishalela na mapukwenda nimwabo bazika hakati kabo. Muntu nimwendi wakuziha muntu namapuza ukutwesha kwitukila kuneye minzi ngayi apanze ku muntu ukushinga ku muziha na kubwesha wubi ku wubi, pe ndi natinini kuyo, kutwesha kuzihiwa ufwako natatili ku yatishiwa ku wingi wa bantu.