Yoshuwa 2 - Libuka Lya Kuyela

Yoshuwa ukutuma bakakuhokela ku Yeliko

¹ Niho, Yoshuwa mwana Nune, atumine balume babili kufuma ku Shitimu kuwi kuya mu kuhokela, wambile ngayi, “Yenu mu kuhokela litunga, shinene lukena lwa Yeliko.” Oho bakumine mu lukena, benginine mu lukena bayile mu kutulila ku litala lya mbuyama walwiholwiho watumbiwile ngayi Lahambu.

² Niho mwene wamu Yeliko ayuvwile lushango ngayi kuli Baishalela bamo banezi kuno mazolo mu kuhokela litunga.

³ Nohobene mwene wamu Yeliko watumine lizu kuli Lahambu ngayi, “Tutwishila obo balume bali mu litala lyobe ha munkanda, obo banezi mu kuhokela lino litunga nimwalyo.”

⁴ Ngoboni mbuyama waholekele baya balume babili, niho akumbwile ngayi, “Kupwisha, balume bamo beza ku litala lyami, ngoboni kaliha nalimukile oku bafuminine.

⁵ Baya tuhu ha kulela kwa mutena, oho lipangati lyamu lukena shilolo lishinkiwe. Nabula kubepula ngayi bakuya kuti, ngoboni ndi ba kubakonka shawangu, pe bakabawana.”

⁶ Ngoboni Lahambu oho watwalakale bakakuhokela hayilu ya shihoke na kubaholeka ku nceto ya ntende, ziya ayakile ha shihoke sha litala.

⁷ Oho balume batutikile mu lukena, pe lipangati lyashinkiwile. Bayile na kushingashinga bakakuhokela ba Ishalela babakonkele kukakuma naku mwaba wakuzabuka mushinzi wa Yondana.

⁸ Oho shilolo bakakuhokela ba Ishalela balale, Lahambu wakandamine hayilu ya shihoke sha litala,

⁹ pe wambile kukwabo ngayi, “Nikulimuka ngayi Nyambi ya Ngula unamipaniki litunga lino. Nimwabo mwabo muno mu litunga banamitampwa.

¹⁰ Tunayuvwu eshe Nyambi ya Ngula ayumishile kumbili yenu Liwate lya Kufubila oho mwafuminenga mu Engepita. Tunayuvwu kami eshe mwalobeshele bamyene babili ba Baamoli, ba Shihoni na Ongi, aba bekalile ku mushamuko wa Yondana.

¹¹ Pe oho twayuvwileko, twatinine. Nimwetu twabulile ngovu ndaba yanenu, ndaba Nyambi ya Ngula, Nyambi yenu wenga Nyambi wa muyilu na hano hanci.

¹² Haya libezenu mu lizina lya Nyambi ya Ngula ngayi mukayuvwile nceshe ba lupashi lwami, ngonehe shiya namiyuvwili nceshe. Kami mpanenu kalimukisho kamo kaya nikatwesha kumi kulupila.

¹³ Nkulupishenu ngayi mukalamwina batate na bamawa na bampanzami na bayaya babakazi na ba lupashi lwabo nimwabo. Hinga mutuleha ngayi tuzihiwe.”

¹⁴ Balume bakumbwile kukwendi ngayi, “Nyambi mwanga atole wumi wetu kuhingisha mu wumi wobe ndi kutenda ngonehe tukwamba tufwako. Ndi obe kutongwezako muntu enge yani hinge yani ebye tunatendenga ufwako, pe tukatenda kukwobe na nceshe na kwoloka, tukalama shikulupisho shetu kukwobe oho Nyambi ya Ngula akatupana litunga elye.”

¹⁵ Lahambu wekalilenga mu litala lyatendiwilile kumo na kembi ka lukena, nohobene wanyenzumwishile balume na lunyimbwa mu limpananga.

¹⁶ Wambile kukwabo ngayi, “Yenunga ku litunga lya binkanda, kutina bantu ba mwene bakamiwana. Mukaholame matena ahatu, hantu banaboko. Nohoboni mutweshe kuya mu nzila yenu.”

¹⁷ Balume bambile kuli Lahambu ngayi, “Tukalama shikulupisho ngonehe shiya wamba ndi obe kami ukalama ebye twali yuvwashana.

¹⁸ Oho tuka katukila litunga lyobe mutakwe eshe nisho wafwanina kutenda, manga lunyimbwa lwa kufubila ku limpananga elye watu nyenzumwishila. Yingiza batatiyobe na bamandiyobe na bayayizobe, nimwabo ba lupashi mu litala lyobe.

¹⁹ Ndi muntu wamina ukututikila ha munkanda wa litala lyobe, lufu lwendi lukenga mulandu wendi, pe etu kukekalaho na mulandu ha lufu lwendi tufwako. Ngoboni ndi muntu wamina uli nendi muno mu litala ukalemana, pe ukenga mulandu wetu.

²⁰ Ngoboni ndi ukushimika ebye tunatendenga pe netu kukalama shikulupisho shetu eshe wafunga ngayi tukukulupishesho tufwako.”

²¹ Wetabilile pe wabafunzwile. Lahambu wamangile lunyimbwa lwa kufubila ku limpananga oho bayakale.

²² Bakakuhokela bayile mu binkanda, pe baholamine. Oho bantu ba mwene babashingilenga mu zimbalila nimwazo za litunga ha matena ahatu, kaliha babawanine, nohobene babokele ku Yeliko.

²³ Niho baya bakakuhokela babili ba kunkulukile ha binkanda, pe bazabukile mushinzi, niho babokele kuli Yoshuwa. Pe, bamutongwezele byuma nimwabyo biya byamonekele.

²⁴ Bambile kukwendi ngayi, “Kupwisha bene Nyambi ya Ngula unatupaniki litunga nimwalyo. Bantu ba kuyo nimwabo banatutampwa.”