Yoshuwa 19 - Libuka Lya Kuyela

Litunga lyapanikiwile kuli Shimiyoni

¹ Mushobo wawubili uya watambwile litunga bengile ba lupashi lwa Shimiyoni. Litunga lyabo lyakakumine mukati ka litunga liya lyapanikiwile ku mushobo wa Yunda.

² Kukwalyo kwafungiliwile na Mbelishemba na Shemba na Molanda,

³ na Haza Shuwali na Mbala na Ezema,

⁴ na Elitolandi na Mbetule na Homa,

⁵ na Zikilangi na Mbeti Makamboti na Haza Shusha,

⁶ na Mbeti Lebayoti na Shaluheni. Yengile minzi likumi na yihatu, kuyakako na tunzi twazingulukako.

⁷ Kwekalile kami Ayina na Limoni na Eta na Ashani, yengile minzi yinaa, kuyakako na tunzi twazingulukako,

⁸ kuyakako na tunzi nimwato twazinguluka minzi yiya yikakuma naku Mbaalati Mbela, hinge Lama, ku mabukubuku. Elye nilyo lyengile litunga liya batambwile ba lupashi lwa Shimiyoni kwinga likona lyabo.

⁹ Ha kuwana ngayi shitapilo sha litunga lya mushobo wa Yunda shengile shashinene kupitakana eshe bashingilenga. Nohobene mbalila yimo ya litunga lya Bayunda yapanikiwile ku mushobo wa Shimiyoni.

Litunga lyapanikiwile kuli Zembuloni

¹⁰ Mushobo wawuhatu uya watambwile litunga bengile ba lupashi lwa Zembuloni. Litunga batambwile lyakakuminine ku Shalindi.

¹¹ Kufuma kuyo ku nginza yashangwile ku mponci kukakuma naku Malela, pe yakakumine naku Ndembesheta naku kashinzi kaku mushamuko wa Yokiniyamu.

¹² Mu nciza ya Shalindi nginza yashangwile ku mushamuko, yakakumine naku nginza ya Kishiloti Tambola, niho yakakumine naku Ndembelati, kukakuma naku Yafwiya.

¹³ Yafumine kuyo yashangwile ku mushamuko kukakuma naku Ngati Hefwa naku Eti Kazini, kukakuma naku Limoni niho yabokele ku mbalila ya Neya.

¹⁴ Niho yatengulukilile ku ncelele na kululumana ku Hanatoni, pe yakamaninine ku mukulo wa Ifwitahela.

¹⁵ Kufungilako na Katahi na Nahalali na Shimiloni na Indala na Mbetelehema, yengile minzi likumi na yibili na tunzi twazingulukako.

¹⁶ Eye minzi na tunzi twazingulukako, yekalile mu litunga elye batambwile ba lupashi lwa mushobo wa Zembuloni kwinga likona lyabo.

Litunga lyapanikiwile kuli Ishaka

¹⁷ Mushobo wawunaa uya watambwile litunga bengile ba lupashi lwa Ishaka.

¹⁸ Litunga lyabo lyafungilile minzi ya Yezilelu na Keshuloti na Shunema,

¹⁹ na Hafwalayima na Shiyoni na Anahalata,

²⁰ na Labita na Kishiyoni na Embezi,

²¹ na Lemeti na Enganima na Eni Handa na Mbeti Pazezi.

²² Nginza yakakumine naku Tambola na Shahazuma na Mbeti Shemeshi, yakamaninine ku Yondana. Yengile minzi likumi na mutanu na umo na tunzi twazingulukako.

²³ Eye minzi na tunzi twazingulukako yekalile mu litunga elye batambwile ba lupashi lwa Ishaka kwinga likona lyabo.

Litunga lyapanikiwile kuli Asha

²⁴ Mushobo wa mutanu uya watambwile litunga bengile ba lupashi lwa Asha.

²⁵ Litunga lyabo lyafungilile minzi ya Helikati na Hali na Mbeteni na Akishafwi,

²⁶ na Alamu Meleki na Amandi na Mishale. Ku mponci nginza yakakumine naku lipili lya Kamela naku mushinzi Shiho Limbina.

²⁷ Niho yapenzeshele ku mushamuko na kululumana ku Mbeti Ndangoni, ya kakumine ku Zembuloni naku mukulo wa Ifwitahela ku nzila yaku ncelele kukakuma naku Mbeti Emeki na Neyela. Kufuma kuyo, yashangwile ku ncelele kukakuma naku Kambulu,

²⁸ naku Embiloni na Lehombu na Hamoni na Kanahe, kukakuma naku Shindoni.

²⁹ Niho nginza yashangwile kuya ku Lama, yakakumine ku Tile, lukena lwa kembi, niho yashangwile kuya ku Hosha, yakakuminine ku Liwate lya Menditeleniya. Kufungilako Mahalambi na Akizimbi,

³⁰ na Uma na Afweki na Lehombi. Yengile minzi makumi abili na yibili hamo na tunzi twazingulukako.

³¹ Eye minzi na tunzi twazingulukako yekalile mu litunga elye batambwile ba lupashi lwa Asha kwinga likona lyabo.

Litunga lyapanikiwile kuli Nafwitali

³² Mushobo wa mutanu na umo uya watambwile litunga bengile ba lupashi lwa Nafwitali.

³³ Nginza yabo yabalikilile ku Helefwa, ku mutondo wa Oka mu Zananimu, kukakuma ku Andami Nekemba na Yambinelu kukakuma naku Lakumi, yakuminine ku Yondana,

³⁴ niho yashangwile ku mponci ku Azinoti Tamba, kufuma kuyo yakakumine ku Hukoki. Balitabwilile zinginza na Zembuloni ku mabukubuku na Asha ku mponci ku mushamuko wa Yondana.

³⁵ Minzi ya twimbi yengile Zindimu na Zele na Hamati na Lakati na Kineleti,

³⁶ na Andama na Lama na Hazola,

³⁷ na Kendeshi na Endileyi, Eni Hazola,

³⁸ na Yiloni na Mingindala Eli na Holemu na Mbetanati na Mbeti Shemeshi. Yengile minzi likumi na mutanu na yinaa, hamo na tunzi twazingulukako.

³⁹ Eye minzi na tunzi twazingulukako yekalile mu litunga elye batambwile ba lupashi lwa Nafwitali kwinga likona lyabo.

Litunga lyapanikiwile kuli Ndani

⁴⁰ Mushobo wa mutanu na yibili uya watambwile litunga bengile ba lupashi lwa Ndani.

⁴¹ Litunga lyabo lyashimbililile na Zola na Eshitawolu na Ili Shemeshi,

⁴² na Shaalambini na Ayaloni na Itila,

⁴³ na Eloni na Timina na Ekiloni,

⁴⁴ na Eliteke na Ngimbetoni na Mbaalati,

⁴⁵ na Yehundi na Mbene Mbalaki na Ngati Limoni,

⁴⁶ na Meyalikoni na Lakikoni, kuyakako hamo na litunga lya zinguluka Yopa.

⁴⁷ Ngoboni ba lupashi lwa Ndani bawanine ukalu ha kupukula litunga lyabo, pe niho bayile ku ncelele ku munzi wa Leshemu naku wulwisha. Bapukwile munzi na kuziha bantu bekalilemo, niho bawufutwile kwinga wabo. Bazikilemo na kuwu tumba ngayi Ndani nehe lizina lya nkaka yabo Ndani.

⁴⁸ Minzi eye nimwayo na tunzi twazingulukako, yengile ya ba lupashi lwa Ndani eye batambwile kwinga likona lyabo.

Litunga lyapanikiwile kuli Yoshuwa

⁴⁹ Oho bantu ba Ishalela bamanishile kutapishila litunga, bapanikile Yoshuwa mwana Nune mbalila yimo ya litunga kwinga likona lyendi.

⁵⁰ Ngonehe ambile Nyambi ya Ngula, bamupanikile munzi ou anyepele wa Timinati Shela mu litunga lya binkanda lya Efulemu. Watendulwile munzi pe wazikilemo.

⁵¹ Mukankombela Eliza na Yoshuwa mwana Nune na bakakutwaminina mapashi a mishobo ya Ishalela bapanikile eze zimbalila za litunga na kukuna nyela ya kwipula kuli Nyambi ya Ngula ku munzi wa Shilo, ku menginino a ntanda yaku meho a Nyambi ya Ngula. Eshe nisho bamanishile kutapishila litunga.