Yoshuwa 18 - Libuka Lya Kuyela

Kutapishila litunga lyashalileho

¹ Oho bakomakale litunga, likunge nimwalyo lya Ishalela lyatulilile ku munzi wa Shilo na kwimika ntanda ya shikungulukilo ku meho a Nyambi ya Ngula.

² Kuyo kwashalile tuhu mishobo mutanu na yibili ya Baishalela aba babulile kupanikiwa mbalila ya litunga.

³ Nohobene Yoshuwa wambile ku Baishalela ngayi, “Kati mukonzela kutatilila shikati sha kukuma hati noho mutambule litunga liya amipanikile Nyambi ya Ngula, Nyambi ya bankakazenu?

⁴ Mpanikenu balume bahatu ba ku mushobo na mushobo. Nikabatume kuya mu litunga nimwalyo nakufundezeka litunga liya bakashinga ngayi bakawaneko likona lyabo. Pe bakaboka kami kukwami.

⁵ Litunga likatapiwila mukati kabo mu zimbalila mutanu na zibili, Yunda ukekala mu litunga lyendi ku mabukubuku na Yoshefwa mu litunga lyendi ku ncelele.

⁶ Mukatontolola na kutikita eze zimbalila mutanu na zibili za litunga na kubileta kukwami. Pe nikaliyavwisha nyela hahenu ku meho a Nyambi ya Ngula, Nyambi yetu.

⁷ Balevi kukatambula mbalila ya litunga hamo nanenu bafwako, ndaba likona lyabo linengi lya kutenda mulimo wa bakankombela ba Nyambi ya Ngula. Kami mwa shikuma mishobo ya Ngandi na Lubena na shitika sha mushobo wa Manashe batambulakale litunga lyabo lya ku mushamuko wa Yondana, elye Moshesha mukamulimo wa Nyambi ya Ngula apanikile kukwabo.”

⁸ Oho bantu bayile nakufundizika litunga, Yoshuwa wabapanikile kufundiziza okwe ngayi, “Yenunga mu litunga nimwalyo na kulifundizika, pe mukaboke kukwami. Pe muno bene mu Shilo nikamiyipwila kuli Nyambi ya Ngula na kukuna nyela.”

⁹ Nohobene bantu bayile mu litunga nimwalyo, batikitile na ku monesha eshe batapile litunga mu zimbalila mutanu na zibili. Pe batikitile mihoko ya minzi, niho babokele kuli Yoshuwa mu munkungwa ku Shilo.

¹⁰ Yoshuwa wakunine nyela na kubepwila kuli Nyambi ya Ngula, niho apanikile mishobo ya shalileho ya Ishalela mbalila yimo na yimo ya litunga.

Litunga liya lyapanikiwile kuli Mbenjamani

¹¹ Nyela ya holokele ha mushobo wa Mbenjamani, litunga lyabo lyekala mukati ka mishobo ya Yunda na Yoshefwa.

¹² Nginza yabo yaku ncelele yatatikilile ku mushinzi wa Yondana na kukunkuluka ha ncezumuko ku ncelele ya Yeliko hiyikupenzesha kulwa mponci na kupita mu litunga lya binkanda kukakuma naku libelelengwa lya Mbeti Abeni.

¹³ Niho yashangwile na kukunkuluka ku mbalila yaku mabukubuku a Luzi, watumbiwilenga kami ngayi Mbetele, niho ya kunkulukile ku Ataloti Anda, ha lipili ku mabukubuku a ncezumuko ya Mbeti Holoni,

¹⁴ niho nginza yashangwile, ya zingulukile na kululumana ku mponci, kukakuma na ku munzi wa Kiliyati Mbaalu, hinge Kiliyati Yeyalima, munzi owe wengile wa mushobo wa Yunda. Eye yengile nginza yaku mponci.

¹⁵ Nginza yaku mabukubuku yabalikilile ha nkumo ya Kiliyati Yeyalima ku mponci, pe yashangwile na kukuma ku tuheloke twa Nefwitowa.

¹⁶ Niho yakunkulukile ku nceto ya lipili, hahepi na mukulo wa Hinoma, ku ncelele kuya kwakumina mukulo wa Lefwayima, niho yashangwile mu mukulo wa Hinoma, ku mabukubuku a lukena lwa Yembushi, kululumana ku Enilongela.

¹⁷ Pe yatengulukile ku ncelele na kuya ku Enishemeshi, niho yapitakanine kukakuma naku Ngeliloti, kuliyahikiza na nzila ya kukankalala ku Andumimi. Niho nginza yashangwile na kukunkulukila ku limanya lya Mbohani. Mbohani wengile mwana Lubena wa mulume,

¹⁸ pe niho yapitile ku ncelele, ya ncezumuko yakuliyahikiza na mukulo wa Yondana, yashangwile na kukunkuluka mu mukulo.

¹⁹ Yapitile ku ncelele, ku ncezumuko ya Mbeti Hongila na kululumana kulwa ncelele pe yamaninine mu liwate lya Mushele, oku ayitilanga mema mushinzi wa Yondana. Eyi niyo yengile nginza yaku mabukubuku.

²⁰ Nginza yaku mushamuko yengile mushinzi wa Yondana. Eze nizo zengile zinginza za litunga batambwile ba lupashi lwa Mbenjamani kwinga likona lyabo.

²¹ Minzi ya ba lupashi lwa Mbenjamani yengile Yeliko na Mbeti Hongila na Emeki Kezizi,

²² na Mbeti Alamba na Zemalayima na Mbetele.

²³ Na Avivimu na Pala na Ofwila

²⁴ na Kefwalamoni na Ofwini na Ngemba. Yengile minzi likumi na yibili, kuyakako na tunzi twazingulukako.

²⁵ Kuyo kwekalile kami Ngimbiyoni na Lama na Mbeloti

²⁶ na Mizipa na Kefwila na Moza

²⁷ na Lekema na Ilipela na Talala,

²⁸ na Zela na Hayelefwa na Yembushi, hinge Yelushalema na Ngimbiya na Kiliyata Yeyalima yengile minzi likumi na yinaa, kuyakako na tunzi twazingulukako. Elye nilyo litunga batambwile ba lupashi lwa mushobo wa Mbenjamani kwinga likona lyabo.