Yoshuwa 16 - Libuka Lya Kuyela

Shitapilo sha litunga lya Efulemu na Manashe waku mponci

¹ Nginza yaku mabukubuku a litunga lya panikiwile ku bazukulya Yoshefwa ya balikilile ku mushinzi wa Yondana hahepi na Yeliko, ku mu shamuko wa tuheloke twa Yeliko, pe yashangwile mu libelelengwa, kukakuma na mu litunga lya binkanda, mu Mbetele.

² Yafumine ku Mbetele niho yayile ku Luzi na kupita ku Ataloti Anda, oku kwazikilenga Baakite.

³ Niho ya shangwile ku mponci ku litunga lya Bayafwuleti, kukakuma naku mwanya wa ncezumuko ya Mbeti Holoni niho ya shangwile ku Ngeza, yafumine kuyo ya maninine ku liwate lya Menditeleniya.

⁴ Bazukulya Yoshefwa, ba lupashi lwa Efulemu na Manashe ku mponci, batambwileko litunga lino kwinga likona lyabo.

Shitapilo sha Litunga lya Efulemu

⁵ Elye lyengile litunga lya ba lupashi lwa Efulemu, nginza yabo yalambalalile kubalika ku Ataloti Anda ku mushamuko, kukakuma naku Mbeti Holoni waha shinkanda.

⁶ Pe yafumine kuyo yakakumine naku liwate lya Menditeleniya. Munzi wa Mikemetati wekalile ha ncelele yayo, niho yatengulukila ku mushamuko na kululumana ha Tanati Shilo, pe ya shangwile na kululumana ku mushamuko wa Yanowa.

⁷ Kufuma ku Yanowa ya lulumanine ku Ataloti naku Naala, kukakuma naku Yeliko na kumanina ku mushinzi wa Yondana.

⁸ Kufuma ku Tapuwa, nginza yalulumanine ku mponci, kukakuma naku mukulo wa Kana, pe yamaninine ku liwate lya Menditaleniya. Elye nilyo lyengile litunga lyapanikiwile ku mushobo wa Efulemu kwinga likona lyabo,

⁹ hamo na minzi yayinene na yayishe, yiya yekalile mukati ka zinginza za Manashe, nimwayo yapanikiwile kwinga likona ku mushobo wa Efulemu.

¹⁰ Ngoboni kaliha batandile Bakenaani aba bazikilenga mu Ngeza, nohobene Bakenaani bazikilenga hakati ka Efulemu kukuma naku mutena walelo, pe banakutenda milimo yayikalu kwinga bandungo zabo.