Yoshuwa 13 - Libuka Lya Kuyela

Litunga lyashalileho kutambuliwa

¹ Oho Yoshuwa akulumpalile shikuma, pe Nyambi ya Ngula wambile kukwendi ngayi, “Wakulumpalakale shikuma, ngoboni kushili litunga likushingiwa kulitambula.

² Litunga elye linashalako lili na matunga a Fwilishitina na litunga nimwalyo lya Ngeshula,

³ Kuyakako na litunga lya Avivimu kukuma naku mabukubuku. (Litunga likubalikila ku mushinzi wa Shiho ku nginza ya Engepita, kukakuma naku ncelele yaku nginza ya Ekiloni, lyahanganikiwile kwinga litunga lya Bakenaani. Batulela ba Bafwilishitina bekalilenga ku Ngaza naku Ashindondi naku Ashikeloni naku Ngati naku Ekiloni).

⁴ Kushili ku shala litunga nimwalyo lya Bakenaani na Meyala elye lyengile litunga lya Bashindoni, kukakuma naku Afweki ku nciza ya Baamoli

⁵ na litunga lya Bangemba na litunga nimwalyo lya Lembanoni kukuma naku mushamuko, kubalika ku Mbaalu Ngandi, elye lili ku mabukubuku a Lipili lya Helimoni naku nzila ya ncinencine yaku Hamati.

⁶ Elye litunga kufungilako na litunga nimwalyo lya Bashindoni aba bekala mukati ka litunga lya binkanda lya Lembanoni na Mishelefwota Mayima. Nikabatandamo oho bantu Baishalela bakuya na kulikaka. Uku fwanina kutapila litunga mukati ka Baishalela kwinga likona lyabo, ngonehe shiya nakutongwezele ngayi ukatende.

⁷ Hayaboni, tapila litunga lino hakati ka mishobo mutanu na yinaa na shitika sha mushobo wa Manashe enge matunga a likona lyabo.”

Kutapishila litunga lya ku Mushamuko wa Yondana

⁸ Mishobo ya Lubena na Ngandi, hamo na shitika shamina sha mushobo wa Manashe, bashimbile litunga lyabo ku mbalila yaku mushamuko mu nciza ya Yondana, liya abatabwilile Moshesha mukamulimo wa Nyambi ya Ngula.

⁹ Litunga lyabo lyakakumine naku Aloya (ha nkumo ya Mukulo wa Anoni) na munzi wa mukati ka mukulo, kuyakako na zimbuwa nimwazo za Mendeba kukakuma naku Ndimboni.

¹⁰ Nilyo lyakakumine naku nginza ya litunga lya Amoni, kufungilako na zinkena nimwazo eze alelelenga mwene Shihoni wa Kaamoli ou walelelenga mwaka ku Heshimboni.

¹¹ Kukwalyo kwafungiliwile na Ngiliyande na matunga a Ngeshula na Maaka na Lipili nimwalyo lya Helimoni naku Mbashani nimwako kukakuma naku Shaleka.

¹² Kukwabo kwafungiliwile kami na wene wa Ongi mu Mbashani niye tuhu muntu washalile ku Balefwayima, ou walelelenga ku Ashitaloti na Endileyi. Moshesha wakomene bantu aba na kubatandamo.

¹³ Ngoboni, Baishalela kaliha batandile bantu bamu Ngeshula na Maaka. Aba bantu bashili kuzika mu Ishalela.

¹⁴ Moshesha kaliha wapanine litunga ku mushobo wa Levi. Niho bafwaninine kutambula shitapilo sha zinkombela za kuhokeshiwa na mundilo kuli Nyambi ya Ngula, Nyambi wa Ishalela, kwinga likona lyabo ngonehe atongweziwile Moshesha kuli Nyambi ya Ngula.

Litunga lyapanikiwile kuli Lubena

¹⁵ Moshesha wapanikile mbalila ya litunga ku ba lupashi lwa mushobo wa Lubena kwinga likona lyabo.

¹⁶ Litunga lyabo lyakakumine ku Aloya (kunkumo ya Mukulo wa Anoni) na munzi wa mukati ka mukulo uyo, kwafungiliwile na mbuwa nimwayo yazinguluka Mendeba.

¹⁷ Kwafungiliwile kami na Heshimboni na minzi nimwayo yaha mbuwa eye, Ndimboni na Mbamoti Mbaalu na Mbeti Mbaalu Meyoni,

¹⁸ na Yahaza na Kendemoti na Mefwati,

¹⁹ na Kiliyatayimu na Shimbima na Zeleta Shahali waha shinkanda sha mukulo,

²⁰ na Mbeti Peyola na ncezumuko ya Lipili lya Pishinga na Mbeti Yeshimoti.

²¹ Kwafungiliwile na minzi nimwayo yamina yaha mbuwa na wene nimwawo wa Shihoni mwene wa Baamoli ou walelelenga ku Heshimboni. Moshesha wamukomene kufungilako na batulela ba ku Mindiyani, ba Evi na Lekema na Zuli na Hula na Leba. Nimwabo mwabo balelelenga litunga lya Mwene Shihoni.

²² Hakati kanobo bazihiwile ku Baishalela hekalile Mbalaamu mukakubuka, mwana Mbeyola wa mulume.

²³ Yondana yenga nginza yaku mponci ya mushobo wa Lubena. Eye niyo yengile minzi na tunzi otwe twapanikiwile ku ba lupashi lwa mushobo wa Lubena kwinga likona lyabo.

Litunga Moshesha apanikile ku mushobo wa Ngandi

²⁴ Moshesha wapanikile mbalila ya litunga ku ba lupashi lwa mushobo wa Ngandi kwinga likona lyabo.

²⁵ Litunga lyabo kufungilako ba Yaza na minzi nimwayo ya Ngiliyande na shitika sha litunga lya Baamoni kukakuma naku Aloya, elye lyekala ku mushamuko waku Lamba.

²⁶ Litunga lyabo lyabalikilile ku Heshimboni kukakuma naku Lamati Mizipa na Mbetonima, kubalikila ku Mahanayima kukakuma naku nginza ya Ndembila.

²⁷ Mu litunga lya Mukulo wa Yondana kufungilako na Mbeti Halamu na Mbeti Nimila na Shukota na Zafwoni na wingi wa wene nimwawo wa Shihoni mwene wamu Heshimboni. Nginza yabo yaku mponci yengile Mushinzi wa Yondana kukakuma naku mabukubuku a liziba lya Ngalileya.

²⁸ Eye yengile minzi na tunzi twapanikiwile ku ba lupashi lwa mushobo wa Ngandi ngayi linge likona lyabo.

Litunga Moshesha apanikiwile ku mushobo wa manashe

²⁹ Moshesha wapanikile mbalila ya litunga ku shitika sha balupashi lwa mushobo wa Manashe kwinga likona lyabo.

³⁰ Litunga lyabo lyakakumine naku Mahanayima, kwafungiliwile na litunga nimwalyo lya Mbashani, wene nimwawo wa Ongi, mwene wa Mbashani, hamo na minzi nimwayo makumi mutanu na limo yengile ya Yayila mu Mbashani.

³¹ Nilyo kwafungiwile shitika sha Ngiliyande, hamo na Ashitaloti Endileyi, zinkena zazinene za wene wa Ongi mu Mbashani. Elye litunga lyapanikiwile ku shitika sha balupashi batutikile muli Makiya, mwana Manashe wa mulume.

³² Eshe nisho atapile Moshesha litunga lya ku mushamuko wa Yeliko na Yondana, oho ekalile mu mabuwa a Mowambi.

³³ Ngoboni Moshesha kaliha wapanine litunga limo ku mushobo wa Levi mu kulikona. Wabatongwezele ngayi likona lyabo likenga kutambula shitapilo sha zinkombela kuli Nyambi ya Ngula, Nyambi wa Ishalela ngonehe aba kulupishile.