Yona 4 - Libuka Lya Kuyela

Kupilama kwa Yona na nceshe za Nyambi ya Ngula

¹ Ngoboni Yona wabihililile shikuma na kupilama.

² Pe walombelele kuli Nyambi ya Ngula na kwamba ngayi, “Obe Nyambi ya Ngula, kaliha nambile oho shilolo nifume kukwetu ngayi eshe shikatendiwa. Nisho shuma shandeteshele ngayi nezeke kutinina ku Tashishi, ndaba nalimukile ngayi obe wenga Nyambi wa shishemo na nceshe kaliha wapilamanga shawangu kami wekala na shishemo sha mwaya myaka walibelululanga na kubula kutenda shibi.

³ Haya nehe, Obe Nyambi ya Ngula nili na kukulambilila ngayi nzihe tuhu, ndaba shashiwahe kukwami kufwa kupitakana kuyoya.”

⁴ Nyambi ya Ngula wambile ngayi, “Kati unahanganiki ngayi ukutenda shiwahe ha kupilama ndi?”

⁵ Niho Yona atutikile mu lukena, pe wakekalile ku mushamuko wa lukena niho alitendelele shilembalemba. Wekalile mu mubombola washo na kutatilila ngayi amone shumangani shikatendiwa ku lukena luyo.

⁶ Nyambi ya Ngula ou wenga Nyambi wameneshele lutompo, luya lwapanine mubombola Yona ngayi hinga ayuvwa mwaana. Pe Yona wawahililile shikuma nanolwe lutompo.

⁷ Ngoboni oho kwashile lumenemene, Nyambi watumine likoloto kwiza mu kulya luyo lutompo ngayi lulebuke.

⁸ Oho mutena watutikile, Nyambi watumine mpepo yantukumina ya ku mushamuko, pe mwaana watwililile mu mutwe wa Yona owo wamulungwile. Niho apilamine na kwamba ngayi, “Shashiwahe kukwami kufwa kupitakana kuyoya.”

⁹ Ngoboni Nyambi wambile kuli Yona ngayi, “Ukuhanganika ngayi ukwinga shiwahe ha kupilamina olwe lutompo ndi?” Niye wakumbwile ngayi, “Ingoi nafwanina kupilama. Napilama shikuma ngayi nifwe.”

¹⁰ Nyambi ya Ngula wambile ngayi, “Obe ukuyuvwila nceshe lutompo olwo wabulile ku shanga hinge kumenesha, luya lwamenene wushiku, kami lwafwile wushiku wakulundamina.

¹¹ Kati ami kaliha niku fwanina kuyuvwila nceshe Neniva, lukena luyo lwalunene luli na bantu 120,000 baya bakubula kutwesha kulimuka liboko lya shilyo hinge lya shimoho shabo na bimuna byabingi ndi?”