Yona 2 - Libuka Lya Kuyela

Lilombelo lya Yona

¹ Niho Yona alombelele kuli Nyambi ya Ngula ou wenga Nyambi yendi hinga ekala mu livumo lya nyinci,

² na kwamba ngayi, “Nehanine Nyambi ya Ngula mu makando wami, pe wankumbwile nakalokele hinga nekala mu livumo lya kalunga ka bafu, pe wayuvwile lizu lyami.

³ Wanyumbilile mu limpunga lya ku nceto ya mawate, oku anzingulukile mema, mankanyi obe nimwawo ankupwile.

⁴ Niho nambile ngayi, ‘Nayumbiwi kufuma ku meho wobe, nikatilamina kami ku Litala lyobe lya kuyela.’

⁵ Mema ankupwile nashingile kufwa, mampunga anzingulukile, kahuki kampombelele ku mutwe.

⁶ Na kunkulukile ku nceto ya mipishi ya mapili, kami kalunga ka bafu kancinkilile. Ngoboni obe Nyambi ya Ngula, obe wenga Nyambi yami, wapulwishile moyo wami ha kumfumisha mu kalunga ka bafu.

⁷ Oho nalungukile nanukile obe Nyambi ya Ngula, pe malombelo wami akumine kukwobe, mu litala lyobe lya kuyela.

⁸ Obo bakulemesha tunankishi twowa banafutamini nceshe za maleema abo kukwobe.

⁹ Ngoboni ami na lizu lya ku kukambilila, nikapana nkombela kukwobe, eshe na kulupishi nisho nikapana, ndaba obe mwene obe Mukakupulwisha, obe wenga Nyambi ya Ngula!”

¹⁰ Niho Nyambi ya Ngula ambilile nyinci, pe nyinci walukile Yona ku lukandwa.