Yona 1 - Libuka Lya Kuyela

Yona ukubula kwombatala Nyambi ya Ngula

¹ Lizu lya Nyambi ya Ngula lyezile kuli Yona, mwana Amitayi ngayi,

² “Katuka uye ku Neniva, lukena lwalunene, pe ukabilike ndaba ya kuluwa kwalyo.”

³ Ngoboni Yona wakatukile na kutinina ku Tashishi kufuma ku meho a Nyambi ya Ngula. Wayile ku Yopa oko akawanine shishepe shayilenga ku Tashishi, niho ayumbile mali a nzila na kwingina mu shishepe ngayi aye nabo ku Tashishi, kutina Nyambi ya Ngula.

⁴ Ngoboni Nyambi ya Ngula watumine mpepo yayinene ha liwate. Nkuli yengile yayinene shikuma ngayi shishepe shekalile mu wukalu wakushinga kutabuka.

⁵ Bakakuvuwa bekalile na bowa, pe muntu na muntu wakalokelele kuli nyambi yendi ngayi amuyavwe. Pe batatikile kuyumbayumbila ntutu yabo mu liwate ngayi bahehupile. Ngoboni Yona wekalile mukati ka shishepe omo alalile tulo twatunene.

⁶ Niho mukulwane wa shishepe ezile kukwendi na kwamba nendi ngayi, “Ukutontolola shumangani obe muntu watulo nehe? Pinduka, wihane nyambi yobe, kampe ukutuyuvwa ngayi tubule kunonga.”

⁷ Niho balyambashanine umo kuwamina ngayi, “Yekenu tukune nyela, mwanga tulimuke ngayi yani unaleteshe ou wukalu kwiza hahetu.” Niho bakunine nyela, pe nyela yawililile hali Yona.

⁸ Niho bambile kukwendi ngayi, “Tutongweze, wukalu ou ukwiza hahetu ndaba yayani? Watendanga mulimo ngani? Kami ukufuma kuti? Kami ukufuma ku litunga ngani? Kami uli mushobo ngani?”

⁹ Yona wakumbwile ngayi “Nili Kahebelu, kami natinanga Nyambi ya Ngula, Nyambi wa mayilu, ou walengele liwate na litunga.”

¹⁰ Niho bantu bayo bekalile na bowa shikuma, pe niho bambile kukwendi ngayi, “Shuma ngani eshe unatende!” Ndaba bayo bantu balimukile ngayi Yona watininenga ku meho a Nyambi ya Ngula, ndaba wa batongwezele.

¹¹ Nkuli yanenehelenga, pe niho bamwipwile ngayi, “Tukwinga nahiti ngayi nkuli yimwene?”

¹² Wakumbwile kukwabo ngayi, “Nyumbilenu mu liwate, pe liwate likamwena, ndaba nikulimuka ngayi ami naleteshe ngayi nkuli eye yayinene yize hahenu.”

¹³ Ngoboni bakakuvuwa bavuwile shikuma na ngovu kutwala shishepe ku lukandwa, ngoboni shabakwangile ndaba nkuli yanenehelenga.

¹⁴ Nohobene bakalokelele kuli Nyambi ya Ngula ngayi, “Tuli na kukulambilila, obe Nyambi ya Ngula, hinga witabila ngayi tunonge ndaba ya wumi wanou muntu, kami hinga utupana mulandu ha muntu wakubula mulandu, ndaba obe Nyambi ya Ngula watendanga omu unashingili.”

¹⁵ Niho bakatwile Yona na kumuyumbila mu liwate, pe nkuli yamwenene.

¹⁶ Pe bakakuvuwa bekalile na bowa shikuma ku meho a Nyambi ya Ngula. Batupwile nkombela na kulibeza kukwendi.

¹⁷ Niho Nyambi ya Ngula atumine nyinci wamunene kwiza na kumina Yona. Pe Yona wekalile mu livumo lya nyinci matena ahatu na zinciku zihatu.