Yobo 9 - Libuka Lya Kuyela

Yobo

¹ Niho Yobo akumbwile.

² Nikulimuka ngayi shili noho, ngoboni muntu ukutwesha kwinga nahiti wakulunga ku meho a Nyambi?

³ Ndi muntu ukushinga kulikanangana nendi, kutwesha kumukumbula hinge limo ku mayipu a likulukazi afwako.

⁴ Nyambi wenga wangana shikuma, kami wa ngovu, kowa muntu wakutwesha kwimana na kumulwisha?

⁵ Wahenyeshanga mapili kwakubula niwo kulimuka, pe wa wawulululanga mu wukali wendi.

⁶ Nyambi wakankishanga kaye mu mwanya wako, na bishimi byanyenkananga.

⁷ Nyambi ukutwesha kukanisha mutena kututika, na nyenye ngayi hinga zimunika ku wushiku.

⁸ Nyambi ninkayendi niye tuhu watandubwile mayilu, na kwenda ha mankanyi a liwate.

⁹ Nyambi walengele nyenye, Poo na Tola na Nunga na Moyo.

¹⁰ Kutwesha ku yuvwishisha byuma byabinene akutenda tufwako, kami bikomokesho byendi, kutwesha kulabiwa bifwako.

¹¹ Mona, oho Nyambi ukupita hahepi, kutwesha kumumona nifwako.

¹² Ashimba ebye akushinga, yani wakutwesha kumukanisha? Yani wakutwesha kumwipula ngayi, “Kati ukutenda bishini?”

¹³ Nyambi kaliha washintulukishanga wukali wendi, wancancwele bamalamo bendi baka kuyavwa Lahambu, ba kulamba ku mawulu wendi.

¹⁴ Kati nikutwesha kumukumbula Nyambi ndi? Kati mazu akulikanangana nendi niku wawana kuti?

¹⁵ Hinge nibulu Kubipisha, Nyambi nifwako kutwesha kumukumbula, shuma nikutwesha kutenda tuhu kulambilila nceshe.

¹⁶ Hinge noho, niye ukukumbula, kukulupila nifwako ngayi unayuvwililinga kukwami.

¹⁷ Ndaba niye wankamine na makalikiza, ngonehe nkuli mu kunkama na kuhutozola ha kubula mulandu.

¹⁸ Nyambi kunyintabilisha ngayi nikoke mpepo ufwako, ngoboni nalulishi wumi wami.

¹⁹ Kati nikutwesha kulikanangana na Nyambi ndi? Ngovu nimwazo zenga zendi. Kati nikutwesha kumutwala ku nkuta ndi? Yani ukutwesha ku muyata?

²⁰ Hinge ngayi ami nili wakulunga, ngoboni nyambilo yami yikunyata. Hinge ndi nili wakulunga, ngoboni ushili kungwana ngayi nina bipishi.

²¹ Hinge ndi nili wakubula nyanco, nifwako kulifulankana, ngoboni kulaba wumi wami nifwako.

²² Nimwabyo shuma shimo, pe nikwamba ngayi, Nyambi walobeshanga bantu bakwoloka na bakuluwa.

²³ Oho wakubula mulandu akufwa na kubazumuka, Nyambi wahepanga kuyanda kwa muntu wakulunga.

²⁴ Kaye kakupanikiwa kubakuluwa. Wengishile bakakuyata nimwabo wushishitwa. Ndi Nyambi kaliha unashitendele, kati yani boni ukushitenda?

²⁵ Matena ami ali na kwituka shikuma kupitakana muntu walubilo, matena akupita ngoboni kowa byabiwahe ebye niku mona.

²⁶ Wumi wami ukupita ngonehe kulwalumuka kwa wato wa ntebe, ukupita wanguwangu ngonehe ngonga ahukulanga kalumba.

²⁷ Ndi nikwamba ngayi, “Nikuvulama manyengo wami, lupala lwami ku moneka kuyena lufwako nikwinga wakushangama.”

²⁸ Ngoboni natinanga ngayi makando wami nimwawo akambokela, ndaba nalimuku ngayi, Nyambi kukancambisha wufwako.

²⁹ Ndaba ngayi nawaniwakale na mulandu, shumangani nikwonzela kuliyandishila?

³⁰ Hinge ndi nikuyowela mema akuyela shikuma, na kuyowela ku maboko na mulola,

³¹ Hinge noho, Nyambi ukunyumbila mu liteke, hinge bivwalo byami bili na lisheni kukwami.

³² Shinga Nyambi wenga muntu nehe ami, shinga nikutwesha kumukumbula. Shinga tukutwesha kuya ku nkuta na kuyata shambo shetu.

³³ Ngoboni kowa mukakwimanina wakutwesha kupita mukatiketu na Nyambi.

³⁴ Lehasho kuncushula, Obe Nyambi, fumisha muwana wobe kukwami, wukali wobe hinga untinisha.

³⁵ Nohobene nikwamba kwakubula ku mutina, ndaba nikulimuka mutima wami.