Yobo 8 - Libuka Lya Kuyela

Mbilindandi

¹ Niho Mbilindandi waku Shuwahi, wakumbwile Yobo ngayi,

² Kati shikati sha kukuma hati eze ukabwaye, nyambilo yobe yili na kupepoka ngo mpepo?

³ Kati Nyambi ukutengamisha ha kuyata ndi? Kati Mpandashilanga ukukwanga kutenda byabiwahe ndi?

⁴ Ndi bana bobe babipishila Nyambi, pe haya niye unabashushulu ngo kuku bipisha kwabo.

⁵ Ngoboni ndi ukupenza kuli Nyambi, na kulambilila nceshe za Mpandashilanga.

⁶ Ndi obe uli wakulunga na kuyela, pe Nyambi ukeza na ku kuyavwa na kukubweshela, nimwabyo kwinga ncuungu yobe.

⁷ Mabalikilo wobe akamoneka ngo akushepa, kufwekesha naneshe ukekalilamo ku mamanishililo, wufwako kukalifwanikiza na nowo akakubweshela Nyambi.

⁸ Shingishisha taha ku ngana za bashikale, hanganika kupwisha balilongeshele batatizabo.

⁹ Ndaba etu twahemuwa nzona kowa neshe tukulimuka, pe kami matena etu akupita ngonehe mimvulu hano hanci.

¹⁰ Ngoboni lehela bashikale ba kulongeshe, yuvwilila kunebye enze bambe.

¹¹ Matete kukula kwakubula mema afwako, kami afwako kwakubula likundu.

¹² Ndi mema akuyuma, niwo a kutatika kulebuka, akuyuma wangu kupitakana mwila nimwawo.

¹³ Bantu bakubula wunyambi bakufweka ngo owo matete, kulumbeza kwa muntu wakubula wunyambi kwa mananga.

¹⁴ Pe kukulupila kwendi kukaketuka ngo wanda, kukulupila kwendi kunengi ngo kukulupila ku wuntangantanga.

¹⁵ Ukuyendamina ha litala lyendi, ngoboni kukemana lifwako. Ukalikolobela, ngoboni kuka laluka lifwako.

¹⁶ Bantu bababi ba kumena ngonehe nyawe ku mutena, ngonehe nyawe iya yina hanyini mu mfuba nimwayo.

¹⁷ Mipishi yayo yikukolatila ku mamanya, pe yikukwata shikuma ku mamanya nimwawo.

¹⁸ Ndi yikavukuliwako, pe kowa muntu ukalimuka ngayi niko yekalilenga.

¹⁹ Ee, kuya niko ku wahilila bali nakwo bantu bakuluwa, bamina kami hibakwiza na kushimba myanya yabo.

²⁰ Mona, Nyambi wufwako kufutamina muntu wakulunga, kami kukayavwa bantu bababi wufwako.

²¹ Ukakwitabila ngayi uhepe na kuwulumwina kami.

²² Baya ba kuzimba bakayuvwa lisheni, kami ntanda ya bakakuluwa yikashandoka.