Yobo 7 - Libuka Lya Kuyela

Yobo

¹ Wumi wa muntu hano hanci wakukwangisha, ngonehe kuyoya kwa mukamulimo wa shikati shashishe.

² Ngonehe ndungo ukulishoza kwikala mu mubombola, ngonehe mukamulimo ukutatilila ncuungu yendi.

³ Nohobene ami na kuyanda shikati nimwasho. Hinge ndi wushiku nikuwana makalikiza.

⁴ Oho nikulangana, wushiku ukutaliha, nikufutozoka wushiku nimwawo na kushinga ngayi kushe wangu.

⁵ Lutu lwami lunezala na mapila, nilwo luna konkana na likwanya, wufutu ukututika ha bitombo.

⁶ Matena ami ali na kupita kwakubula kulumbeza, akupita sha wanguwangu kupitakana kupambunuka kwa wutonge ha shitondo sha kushintila.

⁷ Obe Nyambi, anuka wumi wami unengi ngonehi mu ku. Matena amawahe nifwako kami kukamonawo.

⁸ Haya bantu bali na ku mona, bafwako kami kukamona. Mukancingancinga ngoboni kukamoneka nifwako.

⁹ Ngonehe likumbi liya lyananganga na kumana, nohobene na muntu uya wayanga mukalunga ka bafu afwako kukaboka.

¹⁰ Kaliha wabokanga ku litala lyendi, pe na baya bamulimuka bakamuvulama nimwabo.

¹¹ Nohobene nifwako kutwesha ku mwena. Niku fwanina kwamba, pe nafwanini kulinyenga ha wumi wami.

¹² Kati shumangani mu kundamina nehe, kati ami mu kuhanganika ngayi ninengi liwate, hinge kayamana wamu liwate ndi?

¹³ Nikulala ngayi nikatale, nikushinga kuhehukila kukukola kwami.

¹⁴ Ngoboni enu, mwantinishanga na milo, kami mwakunyuvwisha bowa na bimono.

¹⁵ Shinene nikushinga ku shikitiwa ha milibu ngayi nifwe, kupitakana kuyoya kwa makando amanene, nikuyuvwa mu lutu lwami.

¹⁶ Nakimwakale wumi. Nakwangakale kuyoya. Nciyenu ninkayami, ndaba moyo wami unafweke ngo mpepo.

¹⁷ “Kati muntu nengi yani ngayi umufulankane? Shumangani ukutulumanina na kupenza kunebye akutenda?

¹⁸ Ndaba wamuhengozolanga kulumenemene na lumenemene. Pe wamwezekanga ha shikati ha shikati.

¹⁹ Kati wufwako kutwesha kutilamina kwashenge, ngayi mwanga nitweshe kumina mate ndi?

²⁰ Ndi natende wubi, haya nikutenda nahiti kukwobe, Obe mukakulama bantu? Shumangani ukunyinga ngo limango lyobe? Shumangani nikwinga muziho kukwobe?

²¹ Kati kutwesha kuyatila milandu yami wufwako ndi? Kati kutwesha kuyatila ebye nikutenda byabibi wufwako ndi? Ndaba wuluno niye mukalunga ka bafu. Ami mukancingancinga ngoboni kukamona kami mufwako.”