Yobo 6 - Libuka Lya Kuyela

Yobo

¹ Niho Yobo akumbwile.

² Shinga makando wami na manyengo wami byafwanikiziwi ha shipimisho,

³ shinga wulemu wawo unapitakana lihekelela lya liwate. Nohobene kwamba kwami kwa maketambo.

⁴ Mpandashilanga unanyaha na mivwi yendi. Pe uhungu wayo unapanzanini mu lutu lwami nimwalwo. Nyambi unakwaliki hahami bya kutinisha.

⁵ Kati Mbongolo wakalokanga oho a kulya mwila ndi? Kati ngombe wamwenanga oho abuyanga mwila wakuyuma ndi?

⁶ Kati sha kulya shikutwesha kuliwa, sha kubula kutoba mushele ndi? Kati utobe ngani uli mumbalila ya kutuba ya lingi?

⁷ Ami kaliha namininanga mate byakulya bya kufweka nahiyo, byakulya mushobo wanahiyo bya nkoleshanga.

⁸ Shinga natambula ebye nikushinga, shinga Nyambi ukumpana ebye nikunyepa?

⁹ Shinga Nyambi shikumuwahilisha ngayi ancancole, shinga natandubulu liboko lyendi a nzihe.

¹⁰ Shinga ebye byangwahilisha, shinga niku wahilila shikuma, hinge ndi nili na kukola kwakunene. Ndaba nikulimuka ngayi shilolo nikane mazu a Wakuyela.

¹¹ Nyala ngani nili nazo za kwinga yoye? Shumangani nishili kutatilila ndi kulumbeza howa?

¹² Kati na bumbiwa ha limanya ndi? Kati lutu lwami lunengi lwa lubemba ndi?

¹³ Nabulakale nyala za kulilamwinisha, kowa noku nikutwesha ku shingila kuyavwiwa.

¹⁴ Ha makando akufweka ngonehe awa, ha ku shingiwa bahoni banceshe, kutina wamina a futamina Mpandashilanga.

¹⁵ Ngoboni enu bahoni bami, muli na ku nyongeza, ngonehe mishinzi ya mema yayumanga, oho mvula naketuku.

¹⁶ Tushinzi tuli na mbundu, tunenzala na makelengo,

¹⁷ ngoboni shikati sha ntukumina bikunyongotoka, pe bibumbo bya mushinzi bikashala bya nyuminine.

¹⁸ Mihoko ya bantu ha kushinga mema yikuyongala, ba kuyambangila mu libelelengwa na kufwilamo.

¹⁹ Mihoko ya bantu ba ku Shemba na Tema ba kushingashinga mishinzi, bayeni ba ku Shemba nabo bana kufwatozoka.

²⁰ Kulumbeza kwabo kukumanina kunkumo ya mishinzi ya kuyuma.

²¹ Enu munafweke yiyo mishinzi kukwami, enu munamono malwa wami amanene pe muli na bowa.

²² Kati ami naminyepele ngayi mumpane bishemo, hinge ndi kumpaninako lizika kanwa lya kunyimanina ku muntu umo ndi?

²³ Hinge mundamwine ku bamalamo bami, hinge kunkuliza ku maboko a bakakunyandisha?

²⁴ Shashiwahe, ndongeshenu ami nikamwena, ntongwezenu ku yuvwishisha eshi ninabipishili Nyambi.

²⁵ Mazu akupwisha enga akukola, ngoboni enu muli na kwamba byowa.

²⁶ Mukuhanganika ngayi nili na kwamba byowa, mazu wami anafweke ngo mpepo, pe boni shumangani mu kukumbwila mazu wami a kulihupwiza?

²⁷ Enu mu kutwesha kukuna nyela yaha banginga, na kulandisha muhoni wenu.

²⁸ Haya ntilaminenu shiwahe, nifwako kwamba mahalo kukwenu.

²⁹ Nikuminyepa ngayi muhanganikeho shiwahe aha ha shambo, hinga mutengamisha. Hanganikenuho wangu, ndaba shambo shami sha kwoloka.

³⁰ Kati mu kuhanganika ngayi nikwamba mahalo ndi? Kati mu kuhanganika ngayi ami kutwesha kuhata, byabiwahe kunebye binabipi nifwako ndi?