Yobo 5 - Libuka Lya Kuyela

¹ Obe Yobo haya yihana. Kati kuli wamina ou ukukumbula ndi? Kati lingeloyi ngani oku ukatwesha kuwana kuyavwiwa?

² Ndaba kapilamina kazihanga muntu wakuyeba, pe lihungu lya zihanga, wakubula ngana.

³ Namono bakuyeba aba bamonekele kutangama, ngoboni na kubabazumuna naku kuta litala lyendi.

⁴ Bana bendi bafwako kukekala shiwahe, mu zinkuta mowa muntu wakubemanina ngayi abalamwine.

⁵ Bakanzala bakalya byakulya bya bakakuyeba, hinge mbuto ya kumena hakati ka mihongela pe bakalinyontwa bakayuvwila mwili wuheti wendi.

⁶ Makalikiza kaliha amenanga, hinge ndi makando kumena hanci afwako.

⁷ Ngoboni muntu kufuma kukuhemuwa, waliletelanga makando niyemwine, mwa shikuma shinengi ngonehe hahe zatintokanga ha mundilo.

⁸ Shinga ami niye obe, shinga natengulukili kuli Nyambi, na kumutongweza shambo shami.

⁹ Milimo yendi ya kukomokesha, kami kutwesha kubiyuvwishisha tufwako, bya kukomokesha atendanga, kami kutwesha kulabiwa bifwako.

¹⁰ Walokeshelanga mvula hanci, kuyitilila mafuba.

¹¹ Nyambi wakatulanga bakakulilimbwilisha, na kuleta kuwahilisha bantu ba kulila.

¹² Ukuvulanganya bifungo bya bantu ba kushoshoka, ngayi ebye ba kutenda mwanga bikwangane.

¹³ Ba kukeya uku bakwata mu ku shoshoka kwabo, pe bihanganiko bya bakakwongeza bikukwangana kutendiwa.

¹⁴ Mincimpwe yikubezilila shikati sha mwaana, hinge mwaana ba kupapatila ngo wushiku.

¹⁵ Ngoboni Nyambi ukulamwina ba kushepwa ku lufu, ukulamwina bakakuyanda ku liboko lya muka ngovu.

¹⁶ Bakuyanda ba kubakalamanisha na kumwenesha bakuluwa.

¹⁷ Uli na mfuywezi muntu ou Nyambi akukalihila, nohobene hinga upopa oho Nyambi Mpandashilanga akukwambila.

¹⁸ Ndaba niye walemekanga, pe kami akupombaho, wakoleshanga, pe kami liboko lyendi likunyongomanisha.

¹⁹ Nyambi ukakulamwina ku makando ku shikati nimwasho, makalikiza kuka ku kabakanisha kami afwako.

²⁰ Ukakuyoyesha oho kapande kakeza, pe kami ukakulamwina ku lufu mu nzita.

²¹ Nyambi ukakulamwina ku mahalo na katungwila, ufwako kukatina, ukukulamwina oho kukwiza kulobeshiwa.

²² Ha shikati sha kulobesha na nzala byakeza, obe ukahepa, kami kukatina tuyamana twa lishaka wufwako.

²³ Mu mafuba wobe mukabula mamanya, batuyamana bamu lishaka bafwako kuka kulwisha.

²⁴ Ukalimuka ngayi ntanda yobe inengi mwanya waku mwena, pe ukalimuka ngayi ha bimuna bobe kowa wakuyongala.

²⁵ Ukalimuka ngayi bana bobe bakenga babengi, pe bazukulyobe bakavula ngo mwila.

²⁶ Ukafwa ha kukulumpala kwobe, ngonehe loto luya lwahokanga hantu shikati sha kuteza shinakumu.

²⁷ Obe Yobo, ebye nimwabyo twabishingishishi, kami tunawana ngayi bya kupwisha. Ubiyuvwe na kubikonkezeka.