Yobo 42 - Libuka Lya Kuyela

Mazu amamaninino a Yobo

¹ Niho Yobo akumbwile Nyambi ya Ngula.

Yobo

² Nikulimuka ngayi obe uli wa ngovu shikuma, kami ukutwesha kutenda byuma nimwabyo ebye ukushinga.

³ Wepwile ngayi, “Kati obe yani ukwipula ngana zami na mazu owa a wulube? Namba byuma biya nikubula kulimuka ha byuma bya kukomokesha shikuma ebye nikubula ku yuvwishisha.”

⁴ Yuvwilila, wantongweza ngayi, “Nikakwipula pe ukumbule mayipu.”

⁵ Nayuvwile oho bantongwezele byobe, ngoboni haya nakumono na meho wami.

⁶ Pe na kulibelula na kufuma muno mulukungu na mu mutoko.

Mamaninino

⁷ Nyambi ya Ngula oho amanishile kwamba kuli Yobo mazu awa, watongwezele Elifwazi waku Temani ngayi, “Namipilamini na bahoni bobe babili, ndaba shilolo mwambe bya kupwisha hahami, ngonehe Yobo mukamulimo wami anamba.

⁸ Haya shimbenu bankunzi mutanu na babili na bana bambelele mutanu na babili mutwale kuli Yobo mukabikombelele kwinga nkombela yenu enu bamwine. Yobo ukamilombelela, pe nika tambula lilombelo lyendi, nifwako kukatenda hanenu kuya na wuleya wenu. Kaliha mwamba bya kupwisha hahami ngonehe Yobo mukamulimo wami anamba.”

⁹ Nohobene Elifwazi waku Temani na Mbilindandi waku Shuwahi na Zofwali ka Namatite batendele ebye abatongwezele Nyambi ya Ngula, pe Nyambi ya Ngula watambwile lilombelo lya Yobo.

¹⁰ Oho Yobo amanishile ku lombelela bahoni bendi bahatu Nyambi ya Ngula wamutangamishile kami na kumupanika mu wingi kabili ngonehe ekalile nabyo mwaka.

¹¹ Niho nimwabo bakonzobendi na bayayizendi na bampanzendi na nimwabo bamulimukile mwaka bezile na kumuzingula na kulya nendi hamo mayambwayambwa mu litala lyendi. Nibo bamoneshele manyengo wabo na kumubengezeka ha wukalu nimwawo uya aletele Nyambi ya Ngula hahendi. Muntu na muntu wamupanikile mali na kambalamunwe ka ngolinde.

¹² Nyambi ya Ngula wafuywelele matena a Yobo amamaninino kupitakana a kutatika, pe wahetele bambelele 14,000 na makamela 6,000 na mapulu 2,000 na bitole ba bambongolo 1,000.

¹³ Wekalile kami na bana babalume mutanu na babili na bana babambuyama bahatu.

¹⁴ Watumbile mwanendi wa mbuyama wa mukulwane ngayi Yemima, wawubili Keziya pe wakanuke Keleni Hapuki.

¹⁵ Kaliha kwekalile bambuyama babawahe hano hanci nimwaho ngonehe bana ba Yobo. Tatiyabo wabapanikile likona hamo na bampanzabo.

¹⁶ Kunyima yanebye Yobo wayoyele myaka 140, kami wamonene bana bendi na bazukulyendi hamo na bana babazukulyendi.

¹⁷ Niho Yobo afwile hinga akulumpala na myaka yayingi.