Yobo 41 - Libuka Lya Kuyela

¹ Kati obe ukutwesha ku hanta litoshi Libiyatani na kahanto, hinge ku manga lulimi lwendi na lunyimbwa ndi?

² Kati obe ukutwesha kutubula lumingo mu muzulu wendi, hinge kutubula mumbanga wendi na kahanto ndi?

³ Kati niye ukonzela kukunyepa nceshe ndi? Kati ukakulambilila na mazu akubomba ndi?

⁴ Kati niye ukatwesha kulimama nobe ngayi akafutuke mukamulimo wobe mwaya myaka ndi?

⁵ Kati obe ukatwesha kufukana nendi ngonehe kayoni kakulela, hinge kumuyaka mu shikongo na kumuletela bakamulimo bobe ba bambuyama kwinga shuma sha kufukanisha ndi?

⁶ Kati bakamikwebo, bakamuheheza na kumutapizila ku bakakulandisha ndi?

⁷ Kati ukutwesha kuyaha shitembe shendi na mulinga, hinge kutubula mutwe wendi na mihwayo ndi?

⁸ Ezeka taha kumukwata, pe hanganika bya ngunga yobe naniye, ufwako kami kukayivulama.

⁹ Mwa shikuma bihanganiko nimwabyo bya kumukoma, kaliha byatweshekanga. Wenga wakutinisha ha kumupenza.

¹⁰ Kowa wamukali shikuma, wakutwesha kumushonkomona. Haya yani wakutwesha kwimana nendi?

¹¹ Kati yani ukutwesha kumulwisha, Kowa muno mu kaye nimwamo ukatwesha ku shitenda.

¹² Leha taha nikutongweze osho byekala bimamo bya Leviatani, na wunene wa ngovu zendi, hinge wuwahe wa shifwekesha shendi.

¹³ Kati ukutwesha kuyuba shikonde shendi sha hayilu, hinge kutubula likebo lyendi eli avwala?

¹⁴ Yani ukutwesha kukamununa mimbanga yendi, yiya ya kwalama mayewe akutinisha?

¹⁵ Mongo wendi wekalile na mihoko ya mambalambambi a likebo, akulimbandika hamo akushuma ngonehe limanya.

¹⁶ Limo na limo lyalinunga kulyamina, pe kowa mpepo yikutwesha kukuma mukati.

¹⁷ Nimwawo alimbandika limo kulyamina, alikwata hamo, kutwesheka kutapululiwa afwako.

¹⁸ Kwamonekanga kumwesha oho acihulanga, kami meho wendi abiluzumukanga ngo mincalala ya kututika kwa mutena.

¹⁹ Milangi ya mundilo yalashekanga mu kanwa kendi, na hahe zatintozokanga.

²⁰ Mu mizulu yendi mwatutikanga wishe, ngonehe wishe wamu nyungu wakubila ha mundilo wa ntende.

²¹ Kwoya kwendi kukubangiza mashanga, pe milangi ya mundilo yikulasheka mu kanwa kendi.

²² Mukoshi wendi uli na ngovu shikuma, pe bantu nimwabo ba kuliwana nendi ba kutina na kulikankila.

²³ Mambalambambi aha lutu lwendi alikwata hamo, nisho enga akushuma ngonehe shondo sha kunwisha.

²⁴ Mutima wendi wakushuma ngonehe limanya, mutima wendi wufwao bowa, wakushuma ngonehe limanya lya kupelela.

²⁵ Oho atumpukanga, hinge bakangovu batampwanga, batinanga na kuboka munyima.

²⁶ Kowa mukwale ukatwesha kumulemeka, hinge mulinga, hinge muvwi, hinge libezi kutwesha kumulemeka bifwako.

²⁷ Kukwendi shondo shinengi shashiboto ngonehe mwila, kami lubemba lunengi lwaluboto ngonehe shitondo sha ku shumpwa.

²⁸ Kowa muvwi ukutwesha kumutinisha, mamanya ba kumupuha akufweka ngo muzungu.

²⁹ Kukwendi mushako ukwinga ngonehe shivutu sha mwila, ukuhepa oho bantu ba kumupuha milinga,

³⁰ Mambalambambi wendi amu livumo enga ngonehe binzoyo byabitwe bya nyungu, niwo atabulanga ndoba hanci oho endanga, na kwingishaho ngo shileyi shinendeho.

³¹ Niye wahelokeshanga liwate ngonehe kubila kwa nyungu, naku litupokesha ngonehe mushashi wa mazi.

³² Omu analikoko mu kubyazima na kufutula liwate kwinga lifulututu lya kutuba.

³³ Howa shuma hano hanci sha kumufwekesha, niye shibumbwabumbwa sha kubula bowa.

³⁴ Walimbwilishanga bibumbwabumbwa nimwabyo bikakuliyemeza, niye mwene watuyamana nimwato tukakuliyemeza.