Yobo 40 - Libuka Lya Kuyela

¹ Niho Nyambi ya Ngula ambile kuli Yobo.

² Kati muntu wakulikanangana na Mpandashilanga ukutwesha kumutengulula ndi, Leha ou ukupanika mulandu Nyambi akumbule?

Yobo ukukumbula Nyambi ya Ngula

³ Niho Yobo akumbwile Nyambi ya Ngula ngayi,

⁴ “Ami nili showa, nikutwesha kukumbula nahiti? Kukezeka kami kwamba shuma shamina nifwako.

⁵ Ebye namba kale byabingi, namba kabili, nikakwata ku kanwa na kubula kwamba.”

Mazu a Nyambi ya Ngula

⁶ Niho Nyambi ya Ngula akumbwile Yobo mu nkuli.

⁷ Haya limange mukunzi ngonehe mulume, nikakwipula, pe ukumbule mayipu wami.

⁸ Kati ukushinga ku monesha ngayi ami na bipishi, kati ushili kumpana mulandu ngayi obe winge wa kupwisha ndi?

⁹ Kati uli na liboko lya ku shuma lya kufweka nanelye lyami ndi? Kati obe ukutwesha kumbyazeka na kuyuvwanika ngonehe lizu lyami ndi?

¹⁰ Ndi noho, pe lihongozole na wunene na kulilundumika kwobe, livwalike obe mwine wulolo na wuwahe.

¹¹ Monesha wukali wobe wawunene, penza ku bakakuliyemeza nimwabo na ku bombatalisha.

¹² Ee, penza kukwabo na ku bafwomona, cancola bakuluwa nimwabo oku bali nimwako.

¹³ Bavumbike hanci nimwabo, buwila zimpala zabo mu shinzimbi.

¹⁴ Niho nika kuyemeza na kwitabila ngayi liboko lyobe lya shilyo likutwesha ku kupulwisha.

¹⁵ Mona, kuli shilengwalengwa Mbehemoti, Ami namulengele, ngonehe nalengele nanobe, niye wabuyanga mwila ngonehe ngombe.

¹⁶ Ngoboni mona nyala ezi ekala nazo mu lutu lwendi, na ngovu ezi zekala mu makana wendi amu livumo.

¹⁷ Mushila wendi wandindimananga ngonehe shemana shitondo sha shinda. Kami makana amu mawulu wendi akushuma.

¹⁸ Bifupa byendi bya ku shuma ngonehe lubemba, na mawulu wendi akushuma ngonehe mikambo ya shondo.

¹⁹ Shenga shibumbwabumbwa sha kukomokesha ku bibumbwabumbwa byami nimwabyo. Ndele tuhu Nyambi ou wamulengele niye ukutwesha ku ziha.

²⁰ Mapili amenanga mwila wakumulelesha, kami niko twafukaninanga tunzama twa lishaka.

²¹ Niye walangananga mu nceto ya bitondo bya mihengela, waholamanga mu likundu mukati ka matete.

²² Mitondo ya mihengela na matoya aku mushinzi, byamuholekanga na kumupana mibombola yabyo.

²³ Kutina mushinzi wankunkula wufwako, ukutulumana mema a Yondana akushabokela ku lupala lwendi.

²⁴ Yani ukutwesha kumuzamwina meho na kumukwata, hinge kumutubula ku muzulu na kahanto?