Yobo 4 - Libuka Lya Kuyela

Ngambolo za kutatika Mazu a Elifwazi

¹ Niho Elifwazi waku Temani akumbwile.

² Obe Yobo, kampe ukupilama ndi nikumankuka na kwamba nobe? Ami kutwesha ku mwena shikati shashitali nifwako.

³ Mona, nka obe unalongeshe bantu babengi, unashumishi maboko a kubula ngovu.

⁴ Oho muntu umo apukalile ndaba ya kubota na kukwanga, mazu obe amushumishile na kumwimika.

⁵ Haya makando ezakale hahobe, wakankamanakale nawo, anakushintikizi, pe wapopakale.

⁶ Watininenga Nyambi, pe nyinkalo yobe yabulilenga shihepwa. Pe haya wafwanini kwinga wakushuma mutima na kwinga wakulumbeza.

⁷ Haya hanganika bya kunyima. Pe utoye muntu wakulunga oho ekalile mu makando.

⁸ Namono bantu balimanga byabibi, na kukuba mbuto ya kuluwa, batezanga biya bana shanga.

⁹ Ha kwoya kwa Nyambi ba kulobeshiwa, ha kulasheka kwa wukali wendi ba kuloba.

¹⁰ Bimbwi bikubuluma na kwona, ngoboni mayewe abo akupokozoka.

¹¹ Babimbwi banakufwa ndaba banabulu mbuyo, pe bana babo nimwabo ba kupanzana.

¹² “Oho lizu lyezile kukwami umwe, matu wami ayuvwile elye lizu lya kuyebeta.

¹³ Lyezile kukwami mu kunkabakanisha mu shimono mu shikati sha wushiku, oho bantu bali mutulo twatunene.

¹⁴ Nakankile na kutina, lutu lwami nimwalwo lwakankile na kutina.

¹⁵ Mpepo yapepwile ku lupala lwami, pe huki zami ku mutwe zalimangile.

¹⁶ Natweshele ku mona shuma shemanineko. Ngoboni kaliha natweshele ku shilimuka ngayi shumangani. Niho nayuvwile lizu lya kuyebetela ngayi,

¹⁷ ‘Kati muntu ukutwesha kwinga wakulunga kupitakana Nyambi ndi? Kati muntu ukutwesha kwinga wakulembuka kupitakana Shakalenga wendi ndi?

¹⁸ Ndi Nyambi kukulupila bakamilimo bendi wufwako, wapananga mulandu hinge ku mangeloyi bendi.

¹⁹ Kati ukuhanganika ngayi niye ukakulupila aba balalanga mu matala akumata, aba babumbiwile ku lukungu ba kutwesha kucancoliwa ngonehe tunzembule ndi?

²⁰ Muntu hamina ukutwesha kwinga wamumi kulumenemene, ngoboni ukufwa kwakubula kulimuka na kubula kukuma mazolo.

²¹ Nimwabyo biya ekala nabyo bikushimbiwa, ukufwa, na kubula kuwana ngana.’ ”