Yobo 39 - Libuka Lya Kuyela

¹ Kati walimuka bampongo baha mapili shikati osho bahemanga ndi? Kati wamonanga eshe ahemanga shineke ndi?

² Kati ukutwesha kulimuka zingonda bekalanga na mavumo, hinge kati walimuka shikati bahemanga ndi?

³ Kati walimuka aha babutilanga na kuhema banababo na ku baleta ha kaye ndi?

⁴ Bana babo ba kulilanga mu mashaka na ku shumankana, bayanga kwakutali, kami kuboka bafwako.

⁵ Yani wapana bambongolo bamu lishaka ngayi balyendelenga? Yani wabashobwele na kubaleha ngayi bapanzane?

⁶ Yani wabapanikile libelelengwa ngayi linge munzi wabo? Pe nabalehele ngayi bekale mu bikula bya mushele.

⁷ Bekalanga kwakutali na minzi ndaba bakana miyoyo, kami kowa muntu wakutwesha ku balela.

⁸ Ku mapili niko ku mabuyilo wabo, oku bayanga na kushinga mwila wakubombola wakubuya.

⁹ Kati ngombe wa lishaka ukutwesha kwitabila kukutendela mulimo ndi? Kati ukutwesha kwitabila kwonzela ku linkuluba ndi?

¹⁰ Kati ukutwesha ku mangaho umo na shikongo na kumulimisha ndi? Hinge kumukokesha shipumpwisho mu mafuba wobe ndi?

¹¹ Kati ukutwesha kuyendamina ha ngovu zendi zazinene na kupenzelela kukwendi, ngayi akutendele mulimo wobe wawunene ndi?

¹² Kati ukupenzelela kukwendi ngayi akutezeleko, na kukukundwila mpeka ku likotwelo lyobe ndi?

¹³ Yimpye wakupulanga mbando zendi na kuliyemeza. Ngoboni yimpye kutwesha kutuka ngonehe kanyange afwako.

¹⁴ Yimpye washiyanga mangi wendi mu limvu, ngayi atukumine na limvu.

¹⁵ Kaliha walifulankananga ngayi mawulu wendi a kutibao, hinge ngayi kayamana wa lishaka ukawatiba.

¹⁶ Kaliha watwalangako mutima ku mangi endi, ngo abaminendi. Kami kaliha walikekulanga ha mulimo wendi anatende ngayi ukubipa.

¹⁷ Ndaba Nyambi niye wamuyuminine ngana, kami kaliha wapanine ku yuvwishisha.

¹⁸ Ngoboni oho atatikanga kwituka, wetukanga wanguwangu, na kuhepa mbishi hamo namuka kukandamaho.

¹⁹ Yobo, kati obe wapanine nyala ku bambishi, na ku bavwika mankumbi ha mikoshi yabo ndi?

²⁰ Kati obe wabengishile ngayi bakilozokenga ngonehe mikumbi, na kutinisha bantu oho ba kupembula ndi?

²¹ Bakufumfula limvu mu mukulo, na kwitukila mu nzita na nyala zabo nimwazo.

²² Nibo bafwako kulimuka kutontolola kwa bowa, kami kowa mukwale ukutwesha kubabwesha munyima.

²³ Bakakukandama banashimbi mikwale, na kubesha kwa milinga na mpula.

²⁴ Bambishi ba kukanka na kubazumuka na kwitukila kumbili, oho mpandula yikuvuma kutwesha kwimana bafwako.

²⁵ Oho mpandula yikuvuma ba kupembula, ba kutwesha ku humba nzita oho shilolo yikume hahepi, kami ba kutwesha kuyuvwa babilolo oho ba kubilika.

²⁶ Kati kankozi walilongeshelasho kukwobe sha kutuka, oho atandubulanga mbando zendi kulumba ku mabukubuku ndi?

²⁷ Kati ngonga watatililanga kukwobe, ngayi umutongweze kutunga lihwa hayilu ya mapili ndi?

²⁸ Ukutendela lihwa lyendi hayilu ya mamanya amatali na kufutula mitwe ya mapili kwinga munzi wendi wakushuma.

²⁹ Oho uli kuyo, niko akutoshela byakulya byendi, watoshanga oho ushili kwakutali,

³⁰ Kuya kuli mituntu ya kufwa, niko bangonga ba kungulukilanga, pe mabutu a bangonga anwanga mukeza.