Yobo 38 - Libuka Lya Kuyela

Nyambi ya Ngula ukukumbula Yobo

¹ Nyambi ya Ngula wakumbwile Yobo mu nkuli.

² Kati obe yani ukwipula ngana zami na mazu owa a wulube?

³ Yimana ulimange ntashi yobe ngonehe mulume, nikakwipula pe ukumbule mayipu.

⁴ Obe wekalile kuti oho nayalile mwimbi wa hanci? Ndi ukulimuka, ntongweze eshi kwekalile.

⁵ Ou wahanganikile aha kakakuma kaye, kati yani ou watandubwile lunyimbwa lwa kufwanikiza?

⁶ Kati byemika zimpangwa ziya za shumisha kaye bishini. Kati yani ou wayakile limanya lya mu nkomi ya kaye?

⁷ Oho nyenye za kulumenemene zembilile hamo, na bana ba Nyambi oho ba kuwulumwina na ku wahilila.

⁸ Kati yani washinkile mapangati a liwate akukanisha mema, oho bikutibika mu livumo lya hanci?

⁹ Kati yani wafwikile liwate na makumbi, na kulivungila mu muyemba wa mincimpwe yayinene.

¹⁰ Kati yani wafundikile nginza ya liwate, na kuliyaka mapangati natupatisho twalyo?

¹¹ Nambile ngayi, “Aha niho lya fwanina kukuminanga, naha afwanina kwimananga mankanyi walyo.”

¹² Obe Yobo, hinga wahemuwila kwekalile shikati shimo oho watongwezele mutena ngayi ututike ndi?

¹³ Kati obe walayelela mwaka mutena kufuma hano hanci, na kunyenkanisha bakuluwa kufuma ku myanya yabo banaholama ndi?

¹⁴ Mwaana wa mutena ukwingisha binkanda na mikulo ku moneka ngonehe shivwalo sha kuvunga.

¹⁵ Mwaana wa mutena ukubeshela shikuma bakuluwa, na ku bakanisha kutenda byabibi.

¹⁶ Kati obe wakumako mwaka kutuheloke twa mu liwate ndi? Kati obe wendamo mwaka mumankuzela a liwate ndi?

¹⁷ Kati kwekalile muntu wamina, ou wakumoneshele mapangati, aya alama kalunga ka bafu, litunga lya mincimpwe ndi?

¹⁸ Kati obe walimuka aha wakuma mwimo wa hanci ndi? Ndi obe walimuka nimwabyo ebye pe nkumbule.

¹⁹ Kati walimuka oku kwafumanga mwaana, hinge oku kwatutikanga mincimpwe ndi?

²⁰ Kati obe ukutwesha ku batwaminina ku myanya yabo, hinge kubatongweza zinzila za kuboka kukwabo ndi?

²¹ Mwa shikuma ukutwesha, ndaba wahemuwile mwaka, kami unekala myaka yayingi shikuma.

²² Kati obe wakumako oku nakongelanga makelengo ndi, hinge wamonako oku nakokengela likandavula ndi?

²³ Ebye nabitentekela kubiwahishila bikati bya makando, na matena a ngunga na nzita.

²⁴ Kati walimukako ku mwanya kwafumanga mutena, hinge ku mwanya waku mushamuko oku kwafumanga mpepo ndi?

²⁵ Kati ou wakabile malomba omu mwapitanga mvula yani, hinge kuhebula nzila ya mishika yani?

²⁶ Kati ou walokeshanga mvula ku litunga kwakubula bantu yani, hinge walokeshanga mvula mu libelelengwa mwakubula muntu yani?

²⁷ Kati ou wazabishanga litunga lya nyuminine, ngayi kumene mwila yani?

²⁸ Kati mvula wekala na tatiyendi ndi, hinge mume wekala na tatiyendi ndi?

²⁹ Kati makelengo atutikanga mu livumo lya yani, kati ou wabelekanga mashika amanene amu mbimbayilu yani?

³⁰ Aya afutukanga mema akulikwata kwinga limanya, oho hayilu ya liwate hana likwata yani?

³¹ Kati obe ukutwesha kumanga bana batuluwe hamo, hinge ku shobola nyimbwa ziya za manga, shibinda na kawa na lusha ndi?

³² Kati obe ukutwesha kutwaminina nyenye, ha shikati na shikati sha mwaka, na kwendesha lwalunene na lwalushe ndi?

³³ Kati ziya ndayano zatwaminina mayilu obe wazilimuka, kami ukutwesha kuzileta hano hanci ndi?

³⁴ Kati ukutwesha kwambila makumbi, ngayi alokeshe mvula na kulokesha libazi aha uli ndi?

³⁵ Kami obe ukutwesha kwambila mimuni ngayi yimweshe, pe yikwiza kukwobe na kwamba ngayi, “Etu bano Hekulu?”

³⁶ Kati yani wayaka ngana mu mutima, hinge kupana ku yuvwishisha mubihanganiko?

³⁷ Kati yani wakeya shikuma ukutwesha kulaba makumbi, hinge kuwayanika hayilu ngayi alete mvula?

³⁸ Mvula niye waleteshanga ndoba ngayi yilikwate?

³⁹ Kati obe ukutwesha kuyombela byakulya babimbwi, kwikutisha bana babo banafu nzala,

⁴⁰ ha shikati baholamanga mu manzolongoma wabo, hinge ha shikati bakubelamina mubilambalili byabo ndi?

⁴¹ Kati yani washingilanga likwangala byakulya, ha shikati mabutu wendi akalokelanga kukwami, na kuyambangila kushinga byakulya?