Yobo 37 - Libuka Lya Kuyela

Elihu

¹ Nkuli yengishanga mutima wami kulwa shikuma,

² Yuvwilila shiwahe wahe ku mushika wa lizu lya Nyambi, na kumbyazeka kuya kukufuma mukanwa kendi.

³ Wamwesheshanga lumuni mumbimbayilu nimwayo, kufuma ku nkumo yimo kukuma ku yamina,

⁴ Kunyima ya kuvuma kwa lizu lyendi kukayuvwanika, na kumbyazeka kwa mushika wa wene. Oho kuvuma kwa lizu lyendi kwayuvwanikanga, kwekalanga kumwesha kwa mimuni.

⁵ Lizu lya Nyambi lyambyazekanga mu nzila ya kukomokesha, watendanga byuma bya kukomokesha biya tukubula kutwesha ku yuvwishisha.

⁶ Wambilanga makelengo a mema ngayi, “wila hanci,” na kutuma mvula wamushe nawa mivumbi.

⁷ Washingishilanga milimo ya bantu kwimana, ngayi mwanga bantu nimwabo balimuke milimo yendi.

⁸ Tuyamana tukuya mu manzolongoma watwo na kwikalamo.

⁹ Mpepo ya nkuli yafumanga ku mabukubuku, mashika afumanga ku ncelele.

¹⁰ Kwoya kwa Nyambi kwabombweshanga mema, na kuwafutula ngayi enge makelengo akulikwata.

¹¹ Wenzalishanga makumbi na mvunyenye, na kupanzanisha mimuni mukati kawo.

¹² Ayanga na kuzinguluka ngo mu shifungo shendi, atendanga biya ambanga Nyambi nimwabyo, hano hanci nimwaho.

¹³ Nyambi hamina watumanga mvula ku shuza bantu, hinge kubamonesha shishemo shendi ha kuyitilila ndoba yabo.

¹⁴ Obe Yobo, tatila taha kashikati na kuyuvwilila, hanganika byuma bya kukomokesha ebye Nyambi atendanga.

¹⁵ Kati obe walimuka Nyambi eshe atumizizanga na kumweshesha lumuni mu makumbi ndi?

¹⁶ Kati obe walimuka eshe anyenzelanga makumbi muyilu ndi? Wenga mulimo wa wutungu wa Nyambi wakukomokesha.

¹⁷ Byo, obe ukutwesha tuhu kuyanda ku ntukumina, oho mpepo ya ku mabukubuku yikukonkana hanci.

¹⁸ Kati obe ukutwesha kuyavwa Nyambi ha kutandubula mbimbayilu, na kuyishumisha kwinga ngonehe shondo ndi?

¹⁹ Tulongeshe ebye tunafwanini kwamba kuli Nyambi, hano tufwazo ngana, nebye twafwanini kwamba hikowa.

²⁰ Kati nimutongweze Nyambi ngayi nili na bya kwamba nendi ndi? Kati muntu ukutwesha kulitabila kuminiwa ndi?

²¹ Haya kowa muntu ukutwesha kupenza ku mutena, kubesha kwawo kwakunene mumbimbayilu, oho mbimbayilu yina yeluluku na mpepo.

²² Wuwahe wa shifwekesha sha ngolinde uku moneka ku ncelele, na kubyazima kwa wuwahe wa Nyambi kukutwingisha bowa.

²³ Mpandashilanga tufwako kutwesha kuhenyena hahepi nendi. Niye wangovu shikuma, kami wayatanga mu kupwisha, pe kaliha wayandishanga bantu.

²⁴ Nohobene, bantu nimwabo ba kumutina. Kami kaliha wayamizizanga bakakulimona ngayi bali na ngana.