Yobo 34 - Libuka Lya Kuyela

Nyambi ya Ngula niye wakulunga

¹ Elihu niho atwalilileho kwamba ngayi,

² “Yuvwililenu mazu ami, enu bantu ba kukeya shikuma, haya bangulenu matu, enu mu kulimuka.

³ Ndaba matu ezekanga mazu na kuwahalulula, ngonehe kanwa kayelanga byakulya.

⁴ Tuyenu tuhate bya kupwisha, ngayi tulimuke mukatiketu byabiwahe.”

⁵ Ndaba Yobo namba ngayi, “Ami mulandu nifwao, pe kami Nyambi nanyangulu binafwanini.

⁶ Kufumishako binafwanini na kulabiwa ngayi nili wa mahalo, bitombo byami bya kubula kutwesha kupangiwa, hinge ngayi mulandu nifwao.”

⁷ Kati muntu ngani wakufweka ngonehe owe mulume Yobo? Mukakunwa mashilawizo ngo mema.

⁸ Washinga kwenda ha muhoko wa bantu bakakutenda byabibi, kami waliwanikanga na bakuluwa.

⁹ Ndaba niye ukwamba ngayi, “Kowa eshe akawanaho, muntu ha kwezeka kukonka shifungo sha Nyambi.”

¹⁰ Haya yuvwililenu taha kukwami, enu bantu bakakuyuvwishisha. Nyambi kaliha wafwanina kutenda byabibi, Mpandashilanga kaliha wabipishanga.

¹¹ Wapananga ncuungu ku bantu kuya nanebye ba kutenda, na kubapana ngo kuntendelo yabo.

¹² Mwa shikuma, Nyambi Mpandashilanga kutwesha kutenda bya kuluwa wufwako. Hinga kuyata na shihota ufwako.

¹³ Yani wapanikile Nyambi ngovu za kulela hanci? Kati kuli muntu wamina wamwimikile ngayi atwaminine kaye ndi?

¹⁴ Nyambi ndi ukushinga ngayi afumishe moyo na wumi,

¹⁵ pe bantu nimwabo bali na wumi, ba kufwa na kufutuka kwinga lukungu kami.

¹⁶ Ndi uli na ku yuvwishisha, yuvwa eshe, yuvwilila kunebye nikwamba.

¹⁷ Kati kuli ou wazimba kupwisha, ukutwesha kwinga kalela ndi? Kati ukunyanca wakulunga na wangovu ndi?

¹⁸ Kati kaliha niye wambanga ku bamyene ngayi, “Uli shihulahuli,” naku shilolo ngayi, “Uli wakuluwa,”

¹⁹ Wabula shihota ku bana ba bamyene, hinge ku haka ba kuheta kupitakana ba kushepwa, ndaba nimwabo niye wabalengele.

²⁰ Bafwanga na ku bazumuna, mukati ka wushiku, bantu batampwanga, kami balobanga. Bakangovu balobanga kwakubula liboko lya muntu.

²¹ Ndaba Nyambi wapenzanga zintambo za bantu nimwazo, wamonanga zinzila zabo nimwazo.

²² Kuli Nyambi kowa mincimpwe, hinge mimvulu ya lufu, oku bakakutenda byabibi ba kuholama.

²³ Nyambi kaliha washinganga kwimika shikati, sha kuyata muntu,

²⁴ Wamanishanga bakangovu kwakubula kuhengola, na kuhingisha bashenge mu myanya yabo.

²⁵ Ndaba walimuka ebye batendanga, pe wafumishanga na ku bancancola ku wushiku.

²⁶ Wakamanga bakuluwa, mwanancanca kumbili ya baminabo,

²⁷ ndaba ngayi banamufutamini, pe kukanuka ndayano zendi bafwako.

²⁸ Ngayi bakandamike bancepwe kulambilila kuli Nyambi, pe wayuvwanga kukaloka kwabo kwakushinga kuyavwiwa.

²⁹ (Nyambi ndi aku mwena nee, yani ukutwesha kumunyanca? Ndi niye akuholeka lupala lwendi, yani ukutwesha kumumona, hinge litunga hinge muntu?)

³⁰ Ngayi mwanga akwangishe bakubula wunyambi kulela, na ku bakanisha kuvwima bantu tuntamba.

³¹ Kati kuli muntu wambile kuli Nyambi ngayi, “Nikukulupisha kukatenda byabibi kami nifwako,

³² ndongeshe ebye nabula ku mona, ndi natendele byabibi, nifwako kukatenda byabibi kami.”?

³³ Kati Nyambi, ukutwesha kukupanika ncuungu, ndi obe ukukana kutenguluka? Lihatile obemwine, kaliha ngayi ami nikuhanganikile, pe ntongweze ebye ukulimuka.

³⁴ Bakakuyuvwishisha bakamba kukwami ngayi, bantu bangana ba kunyuvwilila bakamba ngayi,

³⁵ “Yobo uli na kwamba mu kubula kulimuka, ebye akwamba bya kubula ngana.

³⁶ Yobo shinga unanyanciwi, kukuma ku mamaninino, ndaba ya kukumbula kwendi ngonehe muntu wakuluwa.

³⁷ Ndaba ukuwezelela nkani kuku bipisha kwendi, ukukambilila mu maboko na kutukendula, pe kami unavulishi mazu akukanangana Nyambi.”