Yobo 33 - Libuka Lya Kuyela

Elihu ukukalihila Yobo

¹ Ngoboni, obe Yobo, yuvwilila shiwahe kunebye nimwabyo nikushinga kwamba,

² haya na ku balika kwamba, pe nikwamba ebye bili mushali shami.

³ Mazu wami akupwisha, kami nikwamba ebye nalimuka shiwahe.

⁴ Moyo wa Nyambi niwo wambumbile, Kupumbula kwa Mpandashilanga niko kwampanine wumi.

⁵ Nkumbule, ndi ukutwesha, ntontolwele shambo shobe, mwanga twambole.

⁶ Obe na nami, tunengi shuma shimo ku meho a Nyambi, nimwetu twabumbiwile ha lima.

⁷ Nohobene shuma sha kuntinina wufwasho, kuka kulyatilila nifwako.

⁸ Mwa shikuma nayuvwu ebye munamba, nakonkezekenga shiwahe mazu wenu.

⁹ Obe unamba ngayi, “Ami mulandu nifwawo, nili wakulunga. Ami nili wakwoloka, kami kowa shashibi ninatende.

¹⁰ Nyambi nawana mulandu mumwami, kami nafutukakale kwinga kamalamo kendi.

¹¹ Unamanga mawulu wami na nketwana, pe ukupenzeshesha zinzila zami nimwazo.”

¹² Ngoboni nikukutongweza, obe Yobo, ngayi unabipishi. Nyambi wenga wamunene kupitakana muntu nimwendi.

¹³ Haya shumangani ukulinyengela kuli Nyambi, hakwamba ngayi, “Kukumbula ku mazu ami afwako”?

¹⁴ Ndaba Nyambi wambilanga mu zinzila za kulishiyashiya, ngoboni muntu kaliha watoshanga.

¹⁵ Nyambi wambilanga mu milo na mubimono, ku shikati sha wushiku, oho bantu banalala.

¹⁶ Niye wazikulanga matu a bantu, na ku batinisha oho abashiwululanga.

¹⁷ Nyambi watendanga ebye ngayi bantu balehe kutenda byabibi, na ku bakanisha kuliyemeza.

¹⁸ Nyambi walamwinanga muntu ku kalunga ka bafu, walamwinanga moyo wendi ngayi kutina ukafwa ku mukwale.

¹⁹ Hamina Nyambi wakalihilanga muntu na makolano, na kumwesha kwakunene mu bifupa.

²⁰ Muntu wakukola ukubula nyumwa ya byakulya, hinge byakulya byabiwahe bikumulevumisha ku mutima.

²¹ Lutu lwendi luku kwanzuluka, mu kutwesha ku mona bifupa byendi nimwabyo,

²² niye uli hahepi na kuya ku kalunga ka bafu, na wumi wendi uli hahepi na mukakulobesha,

²³ shinga ngayi kuli lingeloyi, mukakwimanina umo ku mbalila yendi, umo ku makulukazi a mangeloyi ukeza mu kumuyavwa, ou wanukishanga bantu kunebye binabafwanini.

²⁴ Lingeloyi mu nceshe zendi, hakwamba ngayi, “Mushobololenu, niye kukaya ku kalunga ka bafu wufwako, yino niyo ndando ya kumukuliza.

²⁵ Lutu lwendi lukazobelela na ku shumankana kami, pe ukabokela ku wundumbana wendi.”

²⁶ Nyambi ukamutambula oho eze akalombele, ukeza kukwendi na ku wahilila. Nyambi ukabwesha kulunga kwendi.

²⁷ Ukatongweza bantu mu likunge ngayi, “Na bipishile, na kufutula byabiwahe, ngoboni kaliha wabweshelebyo kukwami.

²⁸ Unandamwini ngayi hinga niya mu kalunga ka bafu, niho hano nishili kuyoya.”

²⁹ Nyambi watendanga ebye ku muntu kakengi.

³⁰ Niye walamwinanga wumi wa muntu, kuwu fumisha mu shizimbi, na kumuleha ngayi amone liyeye lya wumi.

³¹ Obe Yobo, haya yuvwilila kunebye nili na kwamba, mwena taha ndehe nambe.

³² Ngoboni ndi uli na shuma shamina sha kwamba, nkumbule. Amba, ndaba nikushinga ngayi winge wakulunga.

³³ Ndi kowa bya kwamba, mwena na kuyuvwilila kukwami, pe nika ku longesha ngana.