Yobo 32 - Libuka Lya Kuyela

Elihu ukukalihila bahoni ba Yobo

¹ Balume bahatu bakwangile kukumbula Yobo, ndaba niye walimonene ngayi wakulunga.

² Niho Elihu mwana Mbalakela muzukulya Mbuzi, wakulupashi lwa Lamu, wapilaminine Yobo ndaba walishambishile niyemwine kupitakana Nyambi.

³ Wapilaminine kami na bahoni ba Yobo bahatu, ndaba kaliha batweshele kuwana nzila ya kukumbula Yobo, hinge ndi nibo bawanine ngayi Yobo unatende shibi.

⁴ Ngoboni Elihu wekalile na kutatilila Yobo kutwala noho nimwabo bamanishile kwamba, ndaba niye wengile kanuke.

⁵ Oho Elihu amonene ngayi balume bahatu bafwako kutwesha kami kukumbula Yobo, wapilamine.

⁶ Elihu mwana Mbalakela muzukulya Mbuzi waku lupashi lwa Lama wambile ngayi, “Ami nili kanuke enu muli bakulwane, nohobene natininga kumitongweza bihanganiko byami.

⁷ Nalyambashanine amimwine ngayi bakulwane bambe taha, pe kami muntu uli na myaka yayingi ukutwesha ku longesha ngana.”

⁸ Ngoboni unengi moyo uya uli mu muntu, kwoya kwa Mpandashilanga, niko kwa panikanga ku yuvwishisha.

⁹ Kaliha ngayi bakulwane nibo tuhu bekala na ngana, hinge ngayi bali na myaka yayingi, nibo tuhu bayuvwishishanga byakwoloka.

¹⁰ Nohobene nikwamba ngayi, “Muyuvwilile kukwami, lehenu taha nami nimitongweze ebye nikuhanganika.”

¹¹ Monenu, nayuvwililinga na kutulisha mutima aha munambanga, pe natatililinga aha munashingishishi mazu aku fwanina kwamba.

¹² Natulumanine na kuyuvwilila ku byambo byenu, ngoboni kowa unatweshe kutontolwela Yobo Kubipisha kwendi, hinge kukumbula ebye anambanga.

¹³ Haya keyenu kutina mwamba ngayi, “Twawana ngana. Lehenu Nyambi akumbule Yobo, muntu kutwesha kumukumbula wufwako.”

¹⁴ Yobo unambanga kukwenu kaliha kukwami, ngoboni nifwako kumukumbula na byambo ebye munamba.

¹⁵ Balume aba babulile na mazu akwamba, pe babulile mwakukumbwila.

¹⁶ Kati ami nitatililenga oho nibo banamwene ndi? Banalehesho tuhu ndaba banabulu bya kwamba.

¹⁷ Haya nami kami nikukumbulako, na kukutongweza ebye nikuhanganika.

¹⁸ Ndaba natimbilili na bya ku fwanina kwamba, kutwesha ku mwena nahiya nifwako.

¹⁹ Ndi nifwako kuwana shikati sha kwamba, pe nikatibika ngonehe mbokoshi ya kwinzala na waine.

²⁰ Nafwanina kwamba ngayi mutima utule, nafwanina kukumbula ha shambo eshe.

²¹ Kowa noku nikawila muneshe shambo, kuyemeza muntu umo nifwako.

²² Ami nalubasho sha kuyemeza muntu, ndaba ndi nikutenda noho Nyambi ukancushulu.