Yobo 31 - Libuka Lya Kuyela

¹ Nalimama na meho wami ngayi, “Nifwako kukapenza kankanga na kulishoza.”

² Kati shitapilo shami shiti kuli Nyambi. Kati likona lyami kuli Mpandashilanga liti?

³ Kati bakuluwa makando kaliha abawilanga, hinge bakakutenda byabibi balobanga ndi?

⁴ Kati Nyambi ku mona zinzila zami afwako ndi? Niye wamonanga zintambo nimwazo eze nikwenda?

⁵ Ndi nayanga na kwamba bya mahalo, hinge ndi netukilanga ku bya kwongeza.

⁶ (Nyambi afwanikize mu kupwisha ha shipimo, alimuke ngayi mulandu nifwao.)

⁷ Ndi nashanuku mu nzila yendi, hinge ndi mutima wami uli na nyumwa nanebye niku mona, hinge ndi maboko wami analambakana na wubi,

⁸ pe mbuto nashanga bayilye bamina, nimwabyo byamena byami bizuliwe.

⁹ Ndi mutima wami walishozanga mukaza ndambo yami, pe natatililile na kuholama ha munkanda wa shipana shendi,

¹⁰ pe shashiwahe mukazami apondelenga byakulya mulume washenge, na kulalanga nendi.

¹¹ Ndaba shikenga shuma shashibi shikuma, mulandu uku fwanina ku shushuliwa na lufu.

¹² Wenga mundilo wahokeshanga na kulobesha, shinga unahokeshe mbuto yami nimwayo.

¹³ Ndi kaliha natendanga shiwahe bakamilimo bami, oho balinyengelenga kukwami,

¹⁴ pe nikatwesha kutenda nahiti oho Nyambi akemana? Hinge ndi nikatwesha kukumbula bishini oho Nyambi akanyipula?

¹⁵ Kati kaliha Nyambi walengele ami na mukamulimo wami ndi? Kati kaliha Nyambi umo ou watulengele ndi?

¹⁶ Ndi nakanine kuyavwa bancepwe, hinge ndi naleteshe bamfwile ngayi bayoye mu makalikiza.

¹⁷ Hinge ndi nalehelelenga banginga bafwa ku nzala oho ami nilya.

¹⁸ (Mu kuyoya kwami kufuma kuwanuke wami na balaminenga shiwahe banginga ngo tatiyabo, mu nyinkalo yami nimwayo ninalama bamfwile.)

¹⁹ Ndi nikuwana muntu umo wakuyanda, muntu wakubula kutwesha kuli landila shuma shimina,

²⁰ ndi kaliha bantandalishile ha kubapana bya kuvwala bya kutendiwa ha wushako waku litanga lyami lya bambelele.

²¹ Ndi nongezele banginga, ngayi mwanga nikashambe ku nkuta,

²² pe maboko wami apamuke ku bifuzi, na maboko wami mwanga apokozoke.

²³ Ndaba eshe shikenga shashiwahe kupitakana kushushula kwa Nyambi, ndaba Nyambi ndi ukandwisha pe kulumbeza kwami kuli kuti?

²⁴ Ndi kuka kulupila mu wuheti nifwako, hinge kwamba ku ngolinde yayiwahe ngayi obe shipata shami?

²⁵ Ndi naliyemezele mu wuheti wami ndaba ngayi maboko wami niwo anawuwana?

²⁶ Ndi nikulemesha mutena, mu kubyazima kwawo, hinge ku ngonda mu wuwahe wendi nimwawo.

²⁷ Mutima wami kaliha wambwatukile na kubilemeeka, hinge ndi kanwa kami kazupeze liboko lyami.

²⁸ Pe kami wunengi wubi waku fwanina kuyatiwa na ku shushuliwa, ndaba kunengi kukana Nyambi wa muyilu.

²⁹ Ndi nawahililile oho bamalamo bami bekalile mu kuyanda, hinge ku wahilila oho bekalile mu malwa.

³⁰ (Kaliha netabilishile kanwa kami ngayi kabipishe, ha ku balombelela ngayi shinga ba kutiwi.)

³¹ Ndi balupashi lwami nimwabo, ba kulimuka ngayi natekeshelenga bayeni na kubapana sha kulya.

³² (Nehanininenga mapukwenda mu litala lyami, pe kaliha nabalehele ngayi balangane ha mbanza.)

³³ Ndi nikuholeka wubi ngonehe bamina batendanga, ngoboni ami kaliha naholekanga wubi,

³⁴ kaliha natinine ebye bakamba bantu babengi, hinge ngayi nimwene na kubula hinge kututikila ha munkanda, ndaba ya kutina makendu a bantu.

³⁵ (Shinga ndi kuli muntu ukayuvwilila kunebye nikwamba! Shinga natikitiho lizina lyami. Mpandashilanga mwanga akumbule. Kamalamo kami shinga natikiti milandu yami ya kunyatisha.)

³⁶ Shinga nayikuliki ha bifuzi byami na kuliyemeza shikuma, na kuyituntika ha mutwe wami ngonehe munana.

³⁷ Shinga natongweze Nyambi byuma nimwabyo ebye nikutenda, na kukatula ntunda kumbili yendi.

³⁸ Ndi mfuba yami yikulilila kukwami, na mashinde akulilila hamo,

³⁹ hinge ndi nalimo byakulya biya byamenenemo kwakubula kuyumba shimina, ndi nazihishile nzala bamwine baya bayilimine,

⁴⁰ pe omo mu mafuba, muya mwamenanga loto mwanga mumene mihongela, muya mwamenanga luku mumene nyawe. Mazu a Yobo anamana.