Yobo 30 - Libuka Lya Kuyela

Yobo ukulila ha makando wendi

¹ Ngoboni haya bali na kuhengamina, aba banengi batwanuke kukwami, batatizabo bengile bihulahuli, pe kaliha natweshele kubaleha ngayi bekale hamo na batuwa balamenga bambelele bami.

² Kati nikawanaho shumangani ha ngovu zabo, aba bengile ba kupopa shikuma.

³ Bengile ba kushepwa na ba kulanduka wushiku mungawungawu, mu myanya ya ku mwena, bambulukutilenga mipishi ya kuyuma.

⁴ Bazulilenga mapukumuna bya kulimenena bya mu libelelengwa na kulya, hinge mipishi ya kukambalala ya mutondo wakukombesha.

⁵ Bantu nimwabo babatandilenga na ku bahewula, ngo bakuya na kuhewula mwizi.

⁶ Babakandamikilenga kuyoya mu manzolongoma, mu mawina akabiwile mu zimbalila za mu manzolongoma.

⁷ Bakalokelenga muyo mu lishaka ngonehe batuyamana, pe balibungikilenga hamo mu nceto ya mapukumuna.

⁸ Bihulahuli bya kubula mazina, na kubula kulimukiwa, bantu batandiwile mu litunga.

⁹ Haya bana babo banakuhengamina munyimbo, kukwabo nengakale showa na ku shengwiza.

¹⁰ Kukwabo nengi wawunyengwe, pe bakwimana kwakutali, oho ba ku mona ba kufwiza.

¹¹ Ndaba Nyambi unancobololo, pe unamanishi nyala. Nibo banafutulukili na wukali nimwawo.

¹² Ku liboko lyami lya shilyo bantu ba mishunga ba kundwisha, banavwimi tunyimbwa ngayi mawulu wami alikolekemo, pe ba kuliwahishila nzila ya ku fwanina kumanishilamo.

¹³ Bakuncinkila nzila, na kuwezelela ku wukalu, ndaba kowa wakubakanisha.

¹⁴ Bakwiza ngo bakakwinginina ha litubwa lya ha limota, pe bakwiza na kulicaba hahami.

¹⁵ Nakomiwi na mutentu. Lileema lyami linayi ngonehe yapepokanga mpepo, na kutumbalala kwami kunapiti ngonehe likumbi.

¹⁶ Haya nili hahepi na kufwa, matena a makando anangwana.

¹⁷ Ku wushiku bifupa byami bikumwesha, kukola kwa kunkelutula kumana kufwako.

¹⁸ Shivwalo shami shengakale minkonyaminkonya, na kukondolola bivwalo byami ha lutu.

¹⁹ Unanyumbili mu ndoba, pe nafutukakale lukungu na mutoko.

²⁰ Ninehana kukwobe, obe Nyambi, ngoboni kunkumbula wufwako. Nikwimana ngoboni kutwalako mutima wufwako.

²¹ Uli na kunyinkalika shilala, uli na kunyandisha na ngovu zobe nimwazo.

²² Unanyakwili mu kakundukundu na kundobesha mu nkuli.

²³ Nalimuku ngayi uli na kuntwala ku lufu, oku ku litala wemikilile bantu babomi nimwabo.

²⁴ Kati muntu uli mu mutoko kutwesha wufwako kwolola liboko lyendi kunyepa shuma ndi? Muntu wakubula kutwesha kutenda shuma shimina.

²⁵ Kati kaliha nalilililenga bantu bekalile mu wukalu ndi? Nakuyuvwila nceshe bakakushepwa ndi?

²⁶ Natatililenga byabiwahe, ngoboni kwezile byabibi. Napenzelelenga ngayi kwize mwaana, ngoboni kwezile mincimpwe.

²⁷ Mutima wami uli na shikeku, matena a makando anancintikizi.

²⁸ Nikwenda mu mincimpwe mwakubula mwaana, nikwimana ha mbanza kunyepa kuyavwiwa.

²⁹ Lizu lyami linahombo na winka, ngonehe ku boza kwa mumbwe na kukaloka kwa yimpye.

³⁰ Shikonde shami shinafutuku ku shipa, shili na ku mamozoka, bifupa byami binahoko na ntukumina.

³¹ Kambuli kami kafutukakale kutuwa mbingo, kami kanamutolilo kana kuyavwa banakulila.