Yobo 3 - Libuka Lya Kuyela

Yobo ukukuta mutena wendi wakuhemuwa

¹ Ku mamaninino Yobo washinkwilile kanwa kendi, pe wakutile mutena ou ahemuwile.

² Yobo wambile ngayi,

³ “Obe Nyambi, ukutiwe mutena uya nahemuwile, ukutiwe wushiku uya nemitiwile.”

⁴ Obe, ufutule uya mutena kwinga mincimpwe, Nyambi, hinga kami ukanuka uyo mutena, kami hinga kuketabilishiwa mwaana kumunika ha uyo mutena.

⁵ Wingishe mutena kwinga wa litutu na mincimpwe ya ku shipa bwii. Mwanga makumbi awufwike, mwanga ku shipa kufwike mwaana wa uyo mutena.

⁶ Fumisha wushiku uyo ha matena a mwaka, kami hinga uketabilisha uya mutena ngayi ulabiwe,

⁷ Wingishe mumba, kwinga wushiku uya wakubula kuyuvwanika kankelenkele kaku wahilila.

⁸ Leha bakamalele ngayi ba kute mutena uyo, baya balimuka shakwambila Libiyatani.

⁹ Ukanishe litota kubyazima, witabilishe uyo wushiku ngayi wushe.

¹⁰ Ukutiwe wushiku uyo ha kunyintabilisha ngayi nihemuwe, ha kunyumbila mu makando na wunginga.

¹¹ Kati shumangani nabulile kufwila mu livumo lya bamawa. Hinge shinga nafwile shikati shiya nahemuwile.

¹² Kati shumangani bamawa banyambikilile? Kati shumangani banyamwishilile?

¹³ Ndaba shinga nafwile hano shinga nili mu ku mwena, shinga nalanganine, hano shinga nili mu kukatala,

¹⁴ kulangana hamo na bamyene na batulela, aba balitendelele myanya eye yafutukakale mapembe.

¹⁵ Shinga nalangana tulo ngonehe bana ba bamyene babalume aba benzalishile matala wabo na ngolinde na shiliva.

¹⁶ Hinge shumangani kati nabulile kuhemuwa hinga nafwa? Ngonehe mbututu wakubula ku mona mutena.

¹⁷ Ndaba mu shinzimbi bakakuluwa kutenda byabibi bafwako, pe bakakukwanga na milimo bakakwanguluka.

¹⁸ Hinge batuyili ba kuwana ku mwena mu lufu, ndaba banapanza ku wukali na ku nyambilo ya ku tokozomoka.

¹⁹ Bantu nimwabo, ba mpupo na bakubula kulimukiwa bali muyo. Bandungo banashoboloko, ku bakakubaheta.

²⁰ “Shumangani sha kulehela baya bali mu wuhonde ngayi bayoye? Ndaba ngani mwaana ukumunikila baya bali mu wunginga,

²¹ naku baya ba kutatilila lufu, ngoboni kwiza lufwako. Shinzimbi kukwabo shikubawahililisha kupitakana wuheti.

²² Ku wahilila bafwako hantu banafu nakufundiwa,

²³ shumangani ukumunikila mwaana ku muntu uya nzila yendi yina holama, Ou Nyambi anavungili mukati.

²⁴ Ha kushinga ngayi nilye, pe hinikulila, kuleha ku shunga nifwako.

²⁵ Ebye natininenga binezi hahami, ebye byantampwishilenga, binatendiwi hahami.

²⁶ Kwikala mu ku mwena nifwako, kukwanguluka kami nifwako, makando kumana afwako.”