Yobo 29 - Libuka Lya Kuyela

Yobo wushili kutwalililaho kwamba

¹ Yobo watwalilileho kwamba.

Yobo

² “Tawee! Shinga nishili ngonehe shiya nekalilenga mwaka ku matena akunyima, kwikala ngonehe shiya Nyambi ankowezelenga.

³ Oho Nyambi ekalilenga na nami shikati nimwasho, lumuni lwendi lwamunikililenga mu mincimpwe.

⁴ Matena owo nekalile shiwahe, oho mfuywezi za Nyambi zekalilenga ha balupashi lwami.

⁵ Oho Mpandashilanga shikati shiyo wekalilenga hamo na nami, kami bana bami nimwabo banzingulukilenga.

⁶ Zingombe zami na bampongo bampaninenga mahwe amengi, kami mitondo yami ya olive ya kulilenga namu mamanya.

⁷ Shikati nimwasho bakulwane baha munzi baliwaninenga, pe nami nekalilenga hakati kabo,

⁸ bandumbana bashanukilenga mu nzila oho ba ku mona tuhu, pe bakulwane bemaninenga kumpana maleema.

⁹ Bakakutwaminina bantu balehele kwamba, balikwatilenga tuhu ku tunwa.

¹⁰ Bantu babalemu shikuma bamwenene, zindimi zabo za kwatilenga mulilakito.”

¹¹ Bantu nimwabo banyuvwile banyemezele, bantu nimwabo bamonene bambile byabiwahe hahami.

¹² Ndaba nayavwile ba kushepwa balililenga, nayavwile banginga aba babulile kwakuya.

¹³ Bantu aba bekalile mu makando amanene shikuma banyemezele, pe nayavwile bamfwile ngayi bembine na ku wahilila.

¹⁴ Shikati nimwasho natendelenga bya kupwisha, milimo nimwayo yengile yayiwahe.

¹⁵ Nengile meho a batushishitwa, na mawulu a bakakupenga.

¹⁶ Nengile tata ba kushepwa, nemanininenga bayeni oho bekalile mu wukalu.

¹⁷ Napokwele mayewe a bantu banguma, na kufumisha bali mu wukalu ku mayewe wabo.

¹⁸ Shikati nimwasho nahanganikilenga, ngayi, nikayoya matena amengi, ngonehe lihekelela.

¹⁹ Nengile ngo mipishi ya mutondo yekalanga ku mema shikati nimwasho, na myahi yawo ya zabanga na mume.

²⁰ Bantu nimwabo banyemezelenga shikati nimwasho, kami nyala zami kaliha zapopele.

²¹ Bantu bamwenenenga oho nababelelenga, na kuyuvwilila shiwahe kunebye nambilenga.

²² Oho namanishilenga kwamba, kowa muntu watweshelanga kwambaho. Mazu wami abawilililenga ngonehe mamata a mvula.

²³ Bantu nimwabo bantatilililenga ngonehe batatilililenga mvula. Bayuvwilililenga shiwahewahe, ngonehe bandimi ba kutatila mvula wa shituwizi.

²⁴ Oho nahepelenga kukwabo hinge ndi babulile kunkulupila, ngoboni lupala lwami lwa ku wahilila lwa bashumishilenga.

²⁵ Nalitwikile byambo byabo na kubiyata, na batwamininine mu nzila ngonehe mwene, atwamininanga bakanzita bendi, nababengezekele ngo mukakubengezeka bali mumalila.