Yobo 27 - Libuka Lya Kuyela

Yobo

¹ Yobo wambile kami ngayi,

² “Nehi Nyambi ayoya, ou unabulu kunyata na kwoloka, na Mpandashilanga ou unalulishi wumi wami.

³ Aha nishili kuyoya, pe kami moyo wa Nyambi ushili mumwami,

⁴ kanwa kami kukamba byambo byabibi kafwako, kami lulimi lwami kwongeza lufwako.

⁵ Nifwako kwitabila ngayi enu mukwamba kupwisha, kami nikatwalililaho kwinga wakulunga hantu nakafwa.

⁶ Nifwako kukaleha kwamba ngayi nili wakulunga, shikeketima shami sha kuyela matena nimwawo akuyoya kwami.”

⁷ Mwanga kamalamo kami enge ngo wakuluwa, na nou ukundwisha enge ngo wakubula kulunga.

⁸ Kati bantu bakubula kukulupila Nyambi, kulumbeza kwabo kukamana, shikati oho akashimba wumi wabo ndi?

⁹ Oho wukalu ukamwizilila, kati Nyambi ukayuvwa kukaloka kwendi ndi?

¹⁰ Kati ukutwesha ku wahilila na Mpandashilanga ndi? Hinge ndi ukutwesha kulombela kuli Nyambi bikati nimwabyo?

¹¹ Lehenu nimilongeshe eshe zaneneha ngovu za Nyambi, na kumi tontwelela ebye Mpandashilanga atendele.

¹² Mwa shikuma, enu bamwine mwalimonene, haya shumangani mukwambila byowa nehe?

¹³ Enu mukwamba ngayi, eshe nisho shitapilo bantu bakuluwa batambulanga kuli Nyambi, na likona elye bantu ba mushunga bakatambula kuli Mpandashilanga.

¹⁴ Nibo ba kutwesha kwikala na bana babengi, ngoboni nimwabo bakazihiwa mu nzita, bana babo bafwako kukekala na byakulya bya kubakonkana.

¹⁵ Obo bakashalaho bakafwa ku wulweli, pe hinge bamfwile babo kukalila lufu lwabo bafwako.

¹⁶ Bakuluwa hinge ndi bakwikala na shiliva ngonehe ndoba, na bya kuvwala byabingi ngonehe mushinzi wa lima,

¹⁷ Bakuluwa bakakungulabyo, ngoboni bantu babawahe bakavwala biya bivwalo, kami bantu bakulunga bakatapa yiya shiliva.

¹⁸ Bakuluwa hinge ndi bakazika matala, akafweka ngonehe wuntangantanga wa kantanga, hinge shilawu sha mukakubinga mafuba.

¹⁹ Bakuluwa ba kulala ha wulili hinga benga ba kuheta, pe oho bakapinduka bakawana wuheti wabo nimwawo unamana.

²⁰ Mutentu ukabawila ngonehe libazi lya ku bazumuna. Nkuli ya wushiku yikabakatula.

²¹ Mpepo yaku mushamuko yikabapepula, na kubafumisha ha minzi yabo.

²² Yikapepokela hahabo na kubula nceshe, oho bakezeka shikuma ngayi bapanze.

²³ Mpepo yikakwashela, bakabatanda na milozi ku myanya yabo.