Yobo 26 - Libuka Lya Kuyela

Yobo

¹ Niho Yobo akumbwile ngayi,

² “Unayavwa muntu wakubula ngovu, na kulamwina maboko a muntu wakupopa.

³ Unabele muntu wakubula ngana, pe unamupana kalimukisho.

⁴ Kati yani ukuyuvwa kwamba awa mazu nimwawo? Kati moyo wayani ou unamba mumwobe?”

⁵ Myoyo ya baya bali mukalunga ka bafu yili na kukanka, na byuma nimwabyo byekala ku nceto ya mema bili mu wukalu.

⁶ Kalunga kabafu kekala muhelengwa ku meho a Nyambi, pe oku kowa wukalu wafwikiwa.

⁷ Nyambi watandubwile liyilu lya ku ncelele mumbimbayilu, na kunyenzelesha hanci ha wuntangantanga.

⁸ Nyambi niye wenzalisha makumbi na mema, na kuwakanisha ngayi hinga atibika ndaba ya wulemu.

⁹ Niye wafwikanga ngonda na likumbi lyendi.

¹⁰ Niye watapulwile mwaana ku mincimpwe, na kufunda shifunda hayilu ya mema.

¹¹ Zimpangwa ziya zemika liyilu zanyenkananga, zakomokanga ha kuyuvwa kukaliha kwa Nyambi.

¹² Zengile ngovu zendi ziya zamweneshele liwate, na wutungu wendi wanongeshele Shilengwalengwa Lahambu.

¹³ Wengile moyo wendi uya wayelulwishile liyilu, lyengile liboko lyendi liya lyazihile Litoshi uya washingile kupanza.

¹⁴ Ngoboni ebye binengi mbalila yanebye anatende, nayuvwilengabyo tuhu mu tuyebetelo. Ngoboni yani ukutwesha ku yuvwishisha mishika ya ngovu za wunene wa Nyambi?