Yobo 24 - Libuka Lya Kuyela

Yobo ukwipula Nyambi ha kubula kushushula bakawubi Yobo

¹ Kati shumangani Mpandashilanga, a kubula kulama matena akuyata? Kati shumangani baya bamulimuka bakubula ku mona matena endi?

² Bakawubi ba kuyiba ndoba ha kuhenyesha zinginza, ngayi bawane litunga lyalinene, bayibanga bambelele na kubayaka mu matanga abo.

³ Bayangulanga banginga bambongolo babo, pe kami bakwatanga nkunzi wa mfwile hantu nayumbu mukuli.

⁴ Bakatandanga bancepwe mu nzila, pe ba kuyanda ba kuholama.

⁵ Nohobene bancepwe balifweka na bambongolo ba mu libelelengwa, ba kufwatula byakulya mu libelelengwa lya nyuminine, kwashenge kowa oku ba kutwesha kuwana byakulya bya bana babo.

⁶ Bayanga na kuteza mu mafuba owo abula kwinga abo, na kupupulula mu mafuba a mikabo ya shinyanca a bantu bakuluwa.

⁷ Ku wushiku balangananga lutulutu, kubula bya kuvwala, kowa bya kulifwika bya mashika.

⁸ Bazabishiwanga ku mvula uya walokanga ha mapili, pe betukilanga ku mbalila ya mamanya na kushinga kwa ku yuwama.

⁹ Bantu bakuluwa bahukulanga banginga bakuyamwa, pe ba kushimba bana ba bancepwe na ku bakwatilamo kwinga shihingo ku mukuli.

¹⁰ Bancepwe bakwenda nahiya muhelengwa, kwakubula bya kuvwala, ba kutezela baminabo byakulya, oho nibo bakwikala na nzala.

¹¹ Bakuzonga mazi ku olive, kwakubula kwitabilishiwa kuyelako, bakuzonga mikabo ya shinyanca, ngoboni nibo hibafwa linyontwa.

¹² Mu minzi mu kuyuvwanika ku shunga, kwa bantu banalemana na bakushinga kufwa, ngoboni Nyambi kupana mulandu muntu afwako.

¹³ Ku bali bantu aba ba kukana mwaana, ku shinga kwendamo bafwako, hinge ku konka mu nzila ya mwaana.

¹⁴ Oho kwashakale, muka kuziha baminendi, ukukatuka ukuya na kuziha wakushepwa, kukuma ku wushiku ha kwinga mwizi.

¹⁵ Mukawumambe ukutatilila wezi, ukufwika lupala lwendi ngayi kubule muntu wakutwesha kumumona.

¹⁶ Ku wushiku bezi ba kutubula matala, ngoboni kukuma ku mwaana ba kuholama kutina mwaana.

¹⁷ Ndaba mu mincimpwe shikuma kukwabo pe kunashi, bya kutinisha wushiku nibyo bahoni babo.

¹⁸ Mukwamba ngayi, “Muntu wakuluwa ukukupuliwa ku libazi, mafuba wendi akukutiwa mu litunga nimwalyo, kami kowa ukuya mu mafuba wendi a shinyanca.

¹⁹ Ngonehe makelengo a mema akunyomena hanci na ntukumina, nohobene na mukawubi ukunyomena mu litunga lya bafu.

²⁰ Hinge ndi mandiyendi ukamuvulama, mapila akatangalala ha kumulya, nohobene nisho shikatendiwa ku mukawubi.”

²¹ Bakutenda shibi ku bambuyama bakubula bana, kami bafwako kuyuvwila nceshe bamfwile.

²² Ngoboni Nyambi ukutangamisha nyinkalo ya bakangovu, hinge ndi bakwikala shiwahe ngoboni bafwako ku kulupila mu wumi wabo.

²³ Nyambi wabalamanga, naku bayavwa ngayi bekale shiwahe, ngoboni meho wendi ali mu zinzila zabo.

²⁴ Ha shikati shashishe bantu bakuluwa bakuya mpupo, ngoboni kami ba kulebuka ngonehe nyawe, bawanga ngonehe lipumpwa lya mbuto yiya ba kuteza.

²⁵ Ndi kaliha shilinoho monesha ngayi nili wa mahalo? Kami monesha ngayi ebye nikwamba kaliha bya kupwisha?