Yobo 23 - Libuka Lya Kuyela

Yobo

¹ Niho Yobo akumbwile ngayi,

² “Nishili kulinyenga lelo kami kuli Nyambi. Ndaba liboko lyendi hahami linandemene.

³ Shinga nikulimuka kwa kutwesha kumuwana, hinge nikutwesha kukuma oku ekalanga!

⁴ Shinga nikatwala shambo shami kukwendi, na kutwala ntongawushi zami nimwazo na kulikanangana nendi.

⁵ Shinga nikalimuka eshe akankumbula, shinga nikayuvwishisha ebye akushinga kwamba kukwami.

⁶ Kati Nyambi ukulikanangana na nami na ngovu zendi nimwazo ndi? Byo, ukayuvwilila oho nikamba.

⁷ Kuyo muntu wakulunga ukalikanangana nendi, Mukakuyata shinga ukawana ngayi mulandu nifwao mwaya myaka.”

⁸ Monenu, hinge ndi nikuya ku mushamuko, Nyambi kumuwana nifwako. Hinge ndi ngayi niye ku mponci, Nyambi kumumona nifwako.

⁹ Namushingashinga ku ncelele, kumumona nifwako, oho nikushengezela ku mabukubuku, unaliholeke kumumona nifwako.

¹⁰ Ngoboni Nyambi ukulimuka nzila eye nili na kwenda, ndi ukunyezeka, ukangwana ngayi nili wamuwahe ngonehe ngolinde.

¹¹ Nikukonka nzila ya Nyambi eye anahata, pe kuyambangila nifwako.

¹² Shikati nimwasho nikutenda ebye Nyambi akuntongweza, ngoboni na lama mazu wendi kupitakana sha kulya sha mutena ha mutena.

¹³ Niye kaliha wafutukanga, yani ukutwesha kumubweshamo? Ebye ashinganga kutenda nibyo atendanga.

¹⁴ Niye ukatenda ebye ayongwele hahami, biyongola ebye bimo tuhu mukati kabiyongola byabingi alinabyo.

¹⁵ Nohobene nikuyuvwa bowa kumbili yendi, nahanganika ebye nimwabyo pe nikukanka.

¹⁶ Nyambi unapopeshe mutima wami, Mpandashilanga niye ukuntinisha.

¹⁷ Nifwako ku mwena ndaba ya mincimpwe, hinge ndi ngayi mincimpwe yinashipishi ha meho wami.