Yobo 22 - Libuka Lya Kuyela

Ngambolo za wuhatu Elifwazi

¹ Niho Elifwazi waku Temani akumbwile ngayi,

² “Kati kuli muntu ou watweshele kuyavwa Nyambi ndi? Kupwisha muntu wakukeya ukutwesha kuliyavwa niyemwine.

³ Kati Mpandashilanga wawahililanga ndi wakutenda byabiwahe? Kati kuli ebye awanangaho ndi obe ukubula nyanco?

⁴ Kati ndaba ya kumutina oho akukalihila, naku kuyatisha?

⁵ Kati wubi wobe kaliha unavulu ndi? Kowa mamaninino ku wubi wobe.”

⁶ Ndaba washingile ngayi kawushinda kobe akuhingishile ebye atambwile kukwobe, wamuyangwile bivwalo byendi kwinga kalamisho.

⁷ Wayuminine mema ku baya bayuvwile linyontwa, pe wakanine kupana byakulya baya bafwile ku nzala.

⁸ Ngoboni muntu wa ngovu nakono litunga, pe muntu ou wekalile na maleema ukuzika mu litunga.

⁹ Watandile bamfwile kuya mabokoboko, kami wekalikile banginga na shilala.

¹⁰ Nohobene tuntamba tunakuzinguluku, kami wanguwangu unenzala na bowa.

¹¹ Mincimpwe yinanenehe shikuma kutwesha ku mona wufwako, kami libazi linakukupulu.

¹² Kati Nyambi kaliha uli kwakutalitali kuyilu? Kupitakana hinge nyenye zekala muyilu.

¹³ Ngoboni obe ukwamba ngayi, “Nyambi ukulimuka bishini? Niye unaholekiwi na makumbi ukutwesha nahiti kutuyata?

¹⁴ Makumbi amaliti akumukwangisha ku mona, wendangananga ha nginza ya mayilu na mbimbayilu.”

¹⁵ Kati obe ukatwalililaho kwenda mu nzila yobe ya mwaka, nzila iya bendelenga bantu bakuluwa ndi?

¹⁶ Hinge ndi shikati shabo kaliha sha kumine, libazi lya ba kupwile.

¹⁷ Aba bantu bambile kuli Nyambi ngayi, “Fuma kukwetu Kati Mpandashilanga ukatwesha kutenda bishini kukwetu?”

¹⁸ Ngoboni wengile Nyambi ou wenzalishile, matala wabo na byuma byabiwahe. Ami nifwako kwitabila bihanganiko byabo.

¹⁹ Bantu bakulunga oho ba kushimona bakuhepa, bakubula mulandu ba kubahengamina.

²⁰ Bakamba ngayi, “Monenu bamalamo betu banalobeshiwi, nimwabyo bashiyile bikahokeshiwa.”

²¹ Haya Obe Yobo, lipane kuli Nyambi, ukuwana ku mwena na kutangama.

²² Tambula kufundiziza okwe akukupana, na kulama mazu wendi mu mutima wobe.

²³ Ndi ukuboka kuli Mpandashilanga, na kutenguluka kufuma ku bya kubula kulunga, nimwabyo biya bikakwendela shiwahe mu litala lyobe.

²⁴ Ndi ukashiya nyumwa yobe ya mali, ndi ukuyumbila ngolinde yobe yaku Ofwila ya ku shama mu mushinzi.

²⁵ Mpandashilanga niyemwine ukenga wuheti wobe. Ukenga shiliva yobe yiya yakuhatiwa!

²⁶ Pe ukonzelanga ku wahilila muli Mpandashilanga, na kukatwila mutwe obe kuli Nyambi.

²⁷ Ukalombela kukwendi, pe niye ukakuyuvwa, ukalama luhaho alihahile.

²⁸ Nimwabyo ebye ukatenda ukatangama, na lumuni lukamunika mu nzila yobe.

²⁹ Oho bantu ba kumibwesha hanci mukwamba ngayi, “Ndaba ya kuliyemeza”, kami ukupulwisha bakakulilimbwilisha.

³⁰ Ukalamwina hinge muntu wakubula mulandu, Ukakulamwina ndi ebye ukutenda bya kupwisha.