Yobo 21 - Libuka Lya Kuyela

Yobo

¹ Niho Yobo akumbwile ngayi,

² “Yuvwililenu shiwahe kunebye nili na kwamba, pe awa mazu enge kubengezekiwa oku nikushinga kukwenu.

³ Mpenuko shikati sha kwamba, pe namanisha kwamba, munkendule ndi mukushinga.”

⁴ Shambo shami kaliha nikushamba ku muntu, haya shumangani nikubula kutulila mutima.

⁵ Penzenu kuno kukwami na kulikomokela, kwatenu ku tunwa twenu.

⁶ Oho nikuhanganika ebye bya holoko kukwami, nikulikomokela na kukanka.

⁷ Kati shumangani Nyambi ayitabilishanga bantu bakuluwa ngayi bayoye, na kubetabilisha ngayi batumbalale na kukula kwinga batukulukazi?

⁸ Bali na bana babo aba banalilelele, na bazukulyabo ba kukulila ha meho wabo.

⁹ Mapashi abo akwikala shiwahe kwakubula wukalu, hinga batanga kukamiwa na muwana wa Nyambi.

¹⁰ Zingombe zabo nimwazo zalikandamanga na kufumbata, pe zahemanga shiwahe kwakubula wukalu.

¹¹ Bana babo bashambanga ngo bana babambelele,

¹² ba kushinda ku nyimbo za tumbuli na tuhanzi, na ku wahilila kumushumina wa kanamutolilo.

¹³ Bakwikala shiwahewahe mu wuheti, kami bayanga mu kalunga ka bafu mu ku mwena.

¹⁴ Bakuluwa bakwamba kuli Nyambi ngayi, “Fuma kukwetu, tufwako kushinga kulimuka zinzila zobe!

¹⁵ Kati owo Mpandashilanga nengi yani ngayi tumulemeshe? Tukawanaho bishini ha kulombela kukwendi?”

¹⁶ Mona, kati kutangama kaliha kuli mu liboko lyabo ndi? Ngoboni ami nifwako kwitabila bihanganiko byabo bya kuluwa.

¹⁷ Kati kanga lumuni lwa muntu wakuluwa lukazimiwa? Hinge ndi kanga makando akabezilila? Kati kanga Nyambi anashushulu ba kulwa na wukali?

¹⁸ Kanga banafweke ngonehe mwila ukupepoka na mpepo, hinge ngonehe lukungu lukupepoka na kakundukundu?

¹⁹ Mukwamba ngayi, “Nyambi washushulanga mwana ndaba ya wubi wa tatiyendi.” Byo. Nyambi ashushule bababi niyemwine, mwanga balimuke ngayi unatende nehe ndaba ya wubi wabo.

²⁰ Mwa shikuma, bakawubi bawane kashushwilo kabo, balehenu banwe ku wukali wa Mpandashilanga.

²¹ Kati muntu ukulifulankana bana bendi oho niye unafu ndi? Oho matena wendi anamana.

²² Kati muntu ukutwesha ku longesha Nyambi ndi? Ou wayatanga hinge bali mu myanya ya hayilu.

²³ Bantu bamina bafwanga hinga benga ba kuheta, ukwikala shiwahe na ku mwena mu matena endi akuyoya.

²⁴ Lutu lwendi lukuleliwa shiwahe, pe kami minconco yamu bifupa byendi, hinga yekala shiwahe.

²⁵ Wamina mu kuyoya kwendi, ku wahilila wufwako, ukufwa na mutima wa makando.

²⁶ Ngoboni nimwabo, mfwilo yimo bakafwa, pe ba kufundiwa na kubumbiwa ku mapila.

²⁷ Monenu, nilimuka bihanganiko byenu na byabibi muli nabyo mu mitima.

²⁸ Mu kuyipula ngayi, “Kati litala lya muntu wamunene hano lilikuti? Na munkungwa wa muntu ou watendelenga byabibi ulikuti?”

²⁹ Kati kaliha mwepwilenga bakakwenda ndi? Kati wufwako kulimuka wupaki banalete ndi?

³⁰ Ha mutena wa makalikiza, muntu wakuluwa afwako kukashushuliwa, ha mutena wa mushunga ukapanza.

³¹ Kowa muntu wakalihilanga wakuluwa, hinge kubweshela byabibi nimwabyo anatendenga.

³² Oho akutwaliwa na kufundiwa, shinzimbi shendi shikulamiwa.

³³ Makulukazi a bantu ba kumutwala na kumufunda, kami ba kufunda shiwahe.

³⁴ Haya enu mukwezeka kumbengezeka na byowa, kukumbula kwenu nimwako kaliha kwa kupwisha.