Yobo 20 - Libuka Lya KuyelaZofwali 1 Niho Zofwali waku Namatite akumbwile ngayi, 2 “Obe Yobo, ukumpilamisha. Haya kwihala na kukukumbula nifwako. 3 Ebye ukwamba bya lihandu kukwami, ngoboni kuya na ku yuvwishisha kwami nikulimuka eshe niku ku kumbula.” 4 Mwa shikuma hiwulimuka ngayi ku balika kubikati bya kumwaka, oho muntu atatikile kuyakiwa hano hanci, 5 kowa muntu wakuluwa wekalile na ku wahilila shikati shashitali, na ku wahilila kwa bantu bakubula wunyambi kwa shikati shashishe. 6 Hinge ndi wekalile na mpupo ya kukuma na kuyilu, na mutwe wendi kukuma ku makumbi. 7 Ngoboni ukapepuliwila kwakutali ngonehe lukungu. Obo bamulimuka bakakomoka na kwamba ngayi, “Kati unayi kuti?” 8 Ukavulamiwa ngonehe mulo, kukamoneka kami wufwako. Ee, kukamoneka kami wufwako ngonehe shimono ku wushiku. 9 Aba bamumonene kukamumona kami bafwako, kukamoneka ku mwanya oku azikilenga ufwako. 10 Bana bendi babalume bakabwesha ebye ayibilenga ku bancepwe. 11 Lutu lwendi lunenzala na nyala za wundumbana wobe, ebye bikaya nendi mu lukungu. 12 Hinge ndi byabibi bikuyuvwanika wutobe mukanwa kendi, pe ha kubiholeka ku nceto ya lulimi lwendi, 13 hinge ndi niye kushinga kubilapula mukanwa kendi wufwako, 14 hinge noho mu livumo lyendi ebye a kulya bikufutuka byabilulu. Bikwinga byabilulu ngonehe eshe wekala wuhungu wa mpili. 15 Wawananga wuheti, ngoboni walukanga wuheti ou aminine. Nyambi ukwingisha livumo lyendi ngayi liluke wuheti. 16 Ebye aminanga binafweke ngo wuhungu wa mpili, pe uya uhungu ukamuziha. 17 Afwako kukamona mishiinzi ya wushi, hinge mishinzi yikukunkula mahwe. 18 Kukalya ku litengela lya milimo yendi wufwako, niye kukekala na shikati sha kulikuwa wuheti wendi wufwako, 19 ndaba wayandishilenga na kukenda ba kushepwa, ndaba unakunanina matala awa abulile kuzika. 20 Muntu wa mutongo washinganga byuma nimwabyo, ngoboni kwikuta nanebye akushinga afwako. 21 Oho alyanga, kowa shuma shashalangaho, nohobene, kutumbalala kwendi kukamana. 22 Hinge ndi ukaheta, ukatamwa. Makando amanene akamuwila. 23 Oho akushinga kulya, Nyambi ukamuwishila wukali wa mundilo, ngonehe mvula oho ali na kulya. 24 Oho akezeka kupanza ku shitwa sha shondo, ngoboni muvwi wa lubemba ukamuziha. 25 Muvwi ukapita mampulwa mu lutu lwendi, nohobene, munanga wawo wawutwe ukazubumuka ha lutu lwendi, pe mutentu ukamwizilila. 26 Byuma nimwabyo ebye akongelenga bikanongeshiwa, Mundilo ukumuhokesha, ukahokesha nimwabyo biya byekalile mu litala lyendi. 27 Bya muyilu bikaholola wubi wa nou muntu, bya hano hanci bikamufutulukila. 28 Ha mutena wawukali wa Nyambi, libazi likakukulukisha litala lyendi, wuheti wendi nimwawo ukaloba. 29 Eshi nisho shitapilo sha muntu wakuluwa, na likona elye Nyambi amupanikile. |
Libuka Lya Kuyela © Bible Society of Zambia, 2020.
Bible Society of Zambia