Yobo 2 - Libuka Lya Kuyela

Shatana ukwezeka Yobo kami

¹ Kwekalile kami mutena umo oho bana ba Nyambi baliholwele kuli Nyambi ya Ngula, Shatana kami naniye wekalile hakati kabo.

² Nyambi ya Ngula wepwile Shatana ngayi, “Kati ukufuminina kuti?” Shatana wakumbwile ngayi, “Ninendenga hanci, niyimo, nibokomo, niyimo, nibokomo.”

³ Nyambi ya Ngula wepwile Shatana ngayi, “Pe unatosho mukamulimo wami Yobo ndi? Kowa muntu hanci wakumufweka, wakubula nyanco na kulunga, wakutina Nyambi na kubula kutenda shashibi. Wankandamikile ngayi nikwitabilishe ku mulwisha ha kubula mulandu, ngoboni nihano Yobo wushili wakulunga ngonehe mwaka.”

⁴ Shatana wakumbwile Nyambi ya Ngula ngayi, “Muntu ukutwesha kupana byuma nimwabyo ngayi mwanga ayoyenga pelee.

⁵ Ngoboni ndi ukwolola liboko lyobe na kukwata ha lutu lwendi, pe ukakuhandula mwaanancanana!”

⁶ Nohobene Nyambi ya Ngula wambile kuli Shatana ngayi, “Mona, niye uli mu ngovu zobe ngoboni hinga umuziha.”

⁷ Shatana wafumine ku meho a Nyambi ya Ngula pe watutulukishile bitombo ha lutu lwa Yobo nimwalwo ku balika ku mawulu kukuma naku mutwe.

⁸ Yobo wayile na kwikala ha lilala lya mutoko kami washimbile shinzoyo sha nyungu sha kuliyuwisha ha bitombo byendi.

⁹ Mukazendi wambile kukwendi ngayi, “Kati ushili kwinga wakulunga ngonehe mwaka ndi? Shumangani ukubula kuhandula Nyambi ngayi mwanga ufwe?”

¹⁰ Yobo wakumbwile ngayi, “Uli na kwamba ngonehe bambanga bambuyama bakubula ngana. Oho Nyambi akututumina byuma byabiwahe tukubitambula. Tukutwesha nahiti kulinyenga oho akututumina makando?” Mu makalikiza amonene Yobo kowa shuma ambile sha kuhandula Nyambi.

Kwiza kwa Bahoni ba Yobo

¹¹ Bahoni ba Yobo bahatu bengile ba Elifwazi waku munzi wa Temani, Mbilindandi wa mu litunga lya Shuwahi na Zofwali wa mu litunga lya Namatite. Oho bayuvwile ngayi Yobo uli na kuyanda shikuma, bahanganikile kuya na kumubengezeka.

¹² Oho bashili tuhu kwendela kwakutali bamonene Yobo ngoboni babulile kumulimuka. Oho bamulimukile batatikile kulila na kukwizoka. Batabwezele bivwalo byabo mu wunginga nakufukwela lukungu muyilu na ha mitwe yabo.

¹³ Niho bekalile nendi matena mutanu na abili mwaana na wushiku na kubula kwamba lizu, ndaba bamonene eshe ayandilenga.