Yobo 19 - Libuka Lya Kuyela

Yobo

¹ Niho Yobo akumbwile ngayi,

² “Kati mukashimba shikati sha kukuma hati na kunyandisha, na kunyuvwisha kukola na mazu wenu?

³ Mukuhandula ha shikati na shikati, kami kuyuvwa lisheni mufwako.

⁴ Hinge ndi mu kupwisha ngayi nabipishi, pe enu shikumikolesha nahiti ku mutima?

⁵ Kati enu mu kuhanganika ngayi muli babawahe kumpitakana ndi? Pe munashimbi makando kwinga wupaki wa mulandu wami.

⁶ Kati kutwesha ku mona ngayi Nyambi niye wunatende eshe mufwako ndi? Niye unamanyiki lunyimbwa ngayi ankwate.

⁷ Hinge ndi nikukaloka, kowa wakunkumbula. Nikunyepa ngayi wamina anyavwe, ngoboni kowa wakuyata mu kupwisha.

⁸ Nyambi nashinki nzila yami, pe kutwesha kupitamo nifwako, unafwiki nzila yami na mincimpwe.

⁹ Unanyangulu maleema nimwawo na kumanisha mpupo yami.

¹⁰ Niye nampumpulu lutu nimwalwo, ku nciya hinishundana. Wunavumbulu kulumbeza kwami ngonehe mutondo.

¹¹ Nyambi unampilamini, na kuncimba ngo nili umo wa bamalamo bendi.

¹² Watumanga bakanzita bendi mu kundwisha, bakukaba mateke nakuzingwilisha munkungwa wami.”

¹³ Nyambi unengishi bawushinda wami ngayi bankane, pe kami nafutukakale muyeni ku bandambo bami.

¹⁴ Bawushinda wami banantini, bahoni bami banamvulama.

¹⁵ Bayeni bezilenga na kunzingula banamvulama, bakamilimo bami ba kunyinkalika ngo muyeni. Pe nafutukakale lipukwenda kukwabo.

¹⁶ Nehana mukamulimo wami kukumbula wufwako, nalambililanga ngayi antendele milimo.

¹⁷ Hinge mukazami kutwesha kwimana hahepi na nami wufwako, hingebene aba nahemuwa nabo, banakukana kwiza kwakwipi na nami.

¹⁸ Batwanuke bakuhengamina oho ba ku mona. Oho nikwenda, bakwamba mazu amabi.

¹⁹ Bahoni bami baha mutima ba kutilamina kukwami na wunyengwe, baya nahakile shikuma banamfutulukili.

²⁰ Shikonde shami shinakakatili ha bifupa byami, natweshe tuhu kupanzishako tuhu wumi wami.

²¹ Nyuvwilenuko nceshe, enu bahoni bami, nyuvwilenuko nceshe. Liboko lya Nyambi linangwishili hanci.

²² Shumangani mu kunyandishila ngonehe akuntenda Nyambi? Kati shilolo muhuputuke kuneshe munanyandishi ndi?

²³ Shinga kuli umo ukutwesha kwanuka mazu wami, shinga atikitiwa mu libuka!

²⁴ Shinga kuwamangula na ncinzo ha limanya, na kuwatikita ngayi akekale mwaya myaka.

²⁵ Ndaba nikulimuka ngayi mukakukuliza wami kwali, kami ha kukotoka ukeza mu ku ndamwina.

²⁶ Hinge oho shikonde shami shaliwa kale nimwasho, na lutu lwami luno nikamona Nyambi.

²⁷ Nikamumona na meho wami amimwine kaliha wamina. Nikamumona na meho wami awa, mutima wami uli na kutatilila owo mutena.

²⁸ Ngoboni enu mukwamba ngayi, “Haya tukutwesha nahiti kumuyandisha?” Ndaba mupishi wa shambo uli mumwendi.

²⁹ Ngoboni haya tinenu mukwale, ndaba wubi ukuleta wukali wa Nyambi, mwanga mulimuke ngayi kuli kuyata.