Yobo 16 - Libuka Lya Kuyela

Yobo

¹ Niho Yobo akumbwile ngayi,

² “Nayuvwa mwaka byabingi bya kufweka ngonehe ebye, nimwenu munengi bakakubengezeka kuleta wunginga.

³ Kati mazu wenu akubwaya kumana afwako ndi? Hinge ndi ebye bikumipilamisha ngayi mukumbuleko bishini?

⁴ Ami kami nikutwesha kwamba ngonehe enu, shinga ngayi enu niye ami. Shinga nifwako kumyambila mazu akumikolesha ku mutima. Nakumipukumunina mutwe.

⁵ Shinga namishumankanishi na mazu wami, na kumibengezeka ngayi mukatuluke.”

⁶ Ngoboni kowa kuyavwa kunebye nikwamba, kami hinge ngayi nimwene, kutulisha kungwima kwami kufwako.

⁷ Mwa shikuma Nyambi, unamanishi ngovu. Unalobeshe ba lupashi lwami nimwabo.

⁸ Wamangakale, ou wengakale wupaki kukwami. Bifupa byami bikwimana kupana wupaki wakundwisha.

⁹ Nyambi unampampolo na kuntapa hakati, unampilamini na kulikekenya ku mayewe, unalushwili meho kukwami na wukali.

¹⁰ Bantu ba kutokomokela kukwami, ba kunzinguluka na kunkama mbanda ku lupala.

¹¹ Nyambi unampana ku bantu bakubula wunyambi, unanyumbili mu maboko a bantu bakuluwa.

¹² Nayoyelenga shiwahe, ngoboni Nyambi wankwatile ha mukoshi, pe wampumpwele na kuncancola. Nyambi unantende kwinga limango lya kupuhila,

¹³ pe mivwi nikupuhiwa, yikwizilila noku noku. Yinantubulu ku mashiye kami ku monesha nceshe afwako, wayumbili hanci ndulu yami.

¹⁴ Ukundemeka ndemekee, ukundwisha ngo kanzita.

¹⁵ Nikulila hinga navwala bivwalo binatungiwi ha bicancolo, na kwikala mu lukungu.

¹⁶ Meho ami anafubili na kulila, pe nkopyo zami zina zimbazimbi na kukabalala,

¹⁷ hinge ndi nifwako kutenda mushuga, lilombelo lyami lya kuyela.

¹⁸ Obe hanci, hinga ufwika mukeza wami, hinga uleha kulila kwami ngayi kukwanguluke.

¹⁹ Hinge hano, mona, paki yami uli kuyilu, kwali muntu umo muyilu ukunyimanina.

²⁰ Bahoni bami ba kunkendula, ngoboni meho wami, akuvwisha mihozi kuli Nyambi.

²¹ Nikushinga muntu wakunyimanina kuli Nyambi, ngonehe muntu alambilililanga hali muhoni wendi.

²² Kunashala tuhu myaka yayishe, pe nikaya mu nzila iya nikabula ku boka.