Yobo 15 - Libuka Lya Kuyela

Ngambolo za wubili Elifwazi

¹ Niho Elifwazi waku Temani akumbwile ngayi,

² “Obe Yobo, kati muntu wangana wafwanina kubwaya bya wuleya, bya kufweka ngo mpepo yaku mushamuko ndi?”

³ Kowa muntu wakukeya ukutwesha kwamba ebye ukwamba, hinge kulilamwina niyemwine na mazu a kubula kuyilamo.

⁴ Ngoboni ukukwangisha bantu kutina Nyambi, na ku bakwangisha kulombela.

⁵ Wubi wobe uli na kuliholola munebye ukwamba, uli na kwezeka kulishashila na mazu akukeya.

⁶ Mazu amukanwa kobe niwo akukunyanca, kaliha ami. Nyambilo yobe niyo yikukuyata.

⁷ Kati ukuhanganika ngayi obe muntu wakutatika kuhemuwa ndi? Kati Nyambi oho abumbilenga mapili obe oho wahemuwa kale ndi?

⁸ Kati obe wayuvwile bihanganiko bya maholekela bya Nyambi ndi? Kati ngana zekala tuhu kukwobe ninkayobe ndi?

⁹ Kati kuli shuma walimuka eshe twabula kulimuka etu ndi? Kati bishini wayuvwishisha ebye twabula ku yuvwishisha?

¹⁰ Etu twalilongeshele ngana zetu ku bakulwane bazimvwi, bantu bahemuwile oho batatiyobe shilolo bahemuwe.

¹¹ Kati kubengezeka kwa Nyambi kukwobe kunashepe ndi? Hinge mazu akwambiwa kukwobe na shishemo.

¹² Bishini unalukukili mutima, na ku lushula meho wobe?

¹³ Oho ukufutulukila Nyambi na kumwambila awa mazu amabi.

¹⁴ Kati muntu niye yani, ngayi enge wamuwahe? Kati muntu wahemuwa ku mbuyama ukutwesha kwinga wakulunga kuli Nyambi ndi?

¹⁵ Mona, Nyambi kaliha wakulupila hinge mangeloyi bendi ou nengi wa wunyengwe nawa ku bola,

¹⁶ muntu kutenda wubi ngo ukunwa mema.

¹⁷ Obe Yobo, haya yuvwilila, nikutontwelele, ebye namona nikukutongweza.

¹⁸ Ebye bashimikilile bantu ba kukeya, kowa ebye baholekele kunebye bayuvwile ku batatizabo.

¹⁹ Kukwabo tuhu, nibo bapanikiwile litunga, kaliha kwekalile muyeni mukati kabo.

²⁰ Muntu wakuluwa ou wayandishanga baminendi, naniye ukekala mu makando shikati sha kuyoya kwendi.

²¹ Mazu akuyuvwisha bowa akayuvwanika mu matu wendi, pe bezi bakamulwisha oho akuhanganika ngayi uli shiwahe.

²² Niye wufwako kukulupila ngayi ukaboka ku mincimpwe, niye uku fwanina tuhu kufwa,

²³ kami makubi ali na kumutatilila ngayi alye mutuntu wendi. Halimuka ngayi mutena wa mincimpwe uli kumbili yendi,

²⁴ malwa na makando bili na kumuletela mutentu, anafweke ngonehe mwene aliwahishanga kuya ku nzita.

²⁵ Ndaba unafutulukili Nyambi, na kuhandula Mpandashilanga,

²⁶ ukukatula likebo lyendi na ku shindumukila Nyambi.

²⁷ Ndaba lupala lwendi lunafwikiwi na mazu, na mavumo wabo akuneneha,

²⁸ ngoboni ukukona minzi ya ku shiwuka mwaka, na kunanina matala mwakubula bantu, ndaba yikalobeshiwa yiya minzi mu nzita.

²⁹ Kukaheta shikati shashitali wufwako, kunebye akaheta kowa shikalaluka.

³⁰ Kukapanza ku mincimpwe wufwako. Ukafweka ngonehe mutondo uya unahokeshiwi na mundilo na ntemo zawo zikapepoka na mpepo.

³¹ Hinga alyongeza ha kukulupila mu byuma byowa, pe byowa bikenga shitapilo shendi.

³² Oho shikati shilolo shikume ukalebuka, pe myahi yendi, kukazobelela yifwako.

³³ Niye ukafweka ngonehe mukolobozi wa shinyanca, ukupulumuka mikabo oho yishili yayibihu, ngonehe mutondo wa olive uya ukupulumuka ntemo.

³⁴ “Bantu bakubula wunyambi kukekala na bazukulu bafwako, kami minzi yinazikiwi na lizika kanwa, mundilo ukayilobesha.

³⁵ Bakwimita wubi na kubeleka mishunga, mavumo wabo analibalakanya kutenda byabibi.”