Yobo 14 - Libuka Lya Kuyela

Yobo

¹ Muntu wakuhemuwa ku mbuyama, wekalanga matena amashe, ngoboni kuyoya kwa kukabakana.

² Wakulanga na kulebuka wanguwangu ngonehe maluba. Wakulanga ngonehe mumvulu, kukamoneka kami wufwako.

³ Obe Nyambi, kati ukutwesha kupenza ku muntu wanehe? Hinge kumuleta hambili yobe mu kuyatishiwa ndi?

⁴ Yani ukutwesha kufumisha shuma sha kuyela ku shuma sha kubula kuyela? Kowa hinge umo.

⁵ Matena a muntu anengi a kulaba, obe ukulimuka matena na zingonda, obe wemikile mwaka, kowa wakutwesha kuzifutula.

⁶ Hinga umupenza mulehe nahiya ninkayendi, mulehe alikuwe kuyoya kwendi kwa kukabakana.

⁷ Kuli kulumbeza ku mutondo uya unatemiwi, ndaba niwo ukutwesha ku shanguka na ku tundula kami.

⁸ Hinge ndi mipishi yawo yinakulu shikuma, kami shishinzi shasho shikafwila mu limvu,

⁹ shayuvwa mema shikamena ngonehe ntombola yayikata.

¹⁰ Ngoboni oho muntu ukufwa, pe niwo mamaninino endi. Oho ukumina moyo, pe haya niye uli kuti?

¹¹ Ngonehe mema amu liziba alehanga kwenda, na maziba ayumanga mema,

¹² na muntu ndi ukulangana, kukapinduka kami wufwako, ndele oho mayilu akamana, bantu kukapinduka bafwako hinge kukatampuka mutulo bafwako.

¹³ Nikushinga ngayi obe ukaholeke mukalunga ka bafu, ndehe niholame hantu wukali wobe unamana, niho ukemike shikati sha ku nyanuka.

¹⁴ Ndi muntu unafu, kati ukatwesha kuyoya kami ndi? Ngoboni ami nikatatilila ha bikati byabiwahe, nikatatilila hantu shikati sha makalikiza shinamana.

¹⁵ Nihoboni ukehane pe nika kumbula, pe ukawahilila na nami shibumbwabumbwa shobe.

¹⁶ Niho ukalabe zintambo zami nimwazo nikenda, ngoboni wufwako kukapenzelela wubi wami.

¹⁷ Ukawuyatila na kuwu yaka kwakutali, ukafwika Kubipisha kwami nimwako oku natendele.

¹⁸ “Ngoboni nehi mapili akawila hanci pe akawululuka, kami hinge mapili a mamanya akahenyeshiwa.

¹⁹ Mema akuhutozola mamanya, na mvula wamunene ukakukulula limvu, nisho obe kami walobeshanga kulumbeza kwa muntu.

²⁰ Ukafwomona muntu pe ukamutandila kwakutali. Ukakonyangalisha lupala lwendi na lufu.

²¹ Ndi bana bendi babalume ba kuwana maleema, ngoboni niye kukawalimuka wufwako, hinge oho banahanduliwi kutongweziwa wufwako.

²² Wayuvwanga tuhu kukola kwa lutu lwendi, na manyengo amu mutima wendi.”