Yobo 13 - Libuka Lya Kuyela

¹ Mona, meho wami anamono ebye nimwabyo, matu wami anabiyuvu na kubiyuvwishisha shikuma.

² Ebye mu kulimuka, nibyo nami kami nikulimuka, enu kumpitakana mufwako.

³ Ngoboni shambo shami nikashamba kuli Mpandashilanga. Nikushinga kwamba na Nyambi ha shambo shami.

⁴ Ngoboni enu mwafwikanga wulube wenu na mahalo, munengi ngo banganga baya bakubula kuyavwa shimina.

⁵ Shinga taha munamwene, shinga muntu wamina unatweshe kuhanganika, ngayi muli na ngana.

⁶ Haya Yuvwenu kunebye nikushinga kwamba, yuvwililenu kunebye nikulambilila.

⁷ Kati mu kutwesha kwambilako Nyambi ndi? Hinge kwamba bya kumwongeza ndi?

⁸ Kati mukwezeka ku monesha shihota kuli Nyambi ndi? Kati Nyambi mu kutwesha kumukananganina byambo ndi?

⁹ Ndi Nyambi ukumihengola, kati mukawaniwa hinga mwenga babawahe ndi? Kati mu kuhanganika ngayi mu kutwesha kwongeza Nyambi ngonehe mwongezanga bantu ndi?

¹⁰ Mwa shikuma ukamikalihila, ndi mukamonesha shihota kuwi.

¹¹ Kati ngovu zendi kukamiyuvwisha bowa zifwako ndi? Kati kukamitampwisha zifwako ndi?

¹² Byambo bya kubela kwenu binengi byowa ngonehe mutoko, nkani zenu zikushanyozoka ngonehe lima.

¹³ Mwenenu pe mpanikenu shikati sha kwamba, pe lehenu bikunyizilila bizenga tuhu hahami.

¹⁴ Shuma ngani nikuliyakila mu malamo, na kushimba wumi mu maboko wami.

¹⁵ Mwa shikuma ndi Nyambi ukunziha, pe kulumbeza kwami kunamana, hinge noho ni kutontolola shambo shami kukwendi.

¹⁶ Hinge noho kulambilila kwami kukandamwina, ndaba kowa muntu wakuluwa ukutwesha kupenza kuli Nyambi.

¹⁷ Haya yuvwilila shiwahe ku mazu ami, eshe nikuwatontolola.

¹⁸ Naliwahisha kale ku shimika shambo shami, ndaba nikulimuka ngayi nikashambishiwa.

¹⁹ Yani ukutwesha kunkananganisha? Ndi shili noho pe nikamwena ngayi nifwe.

²⁰ Obe Nyambi, nikunyepa byuma bibili, pe nifwako kuka kuholama kukwobe.

²¹ Fumisha liboko lyobe hahami, kutina nitampwa.

²² Nyihane pe nika kukumbula, hinge ndehe taha ami nambe pe ukankumbula.

²³ Haya wubi ngani ou ninatende? Shumangani nabipishi? Kati nikuyatishiwa na mulandu ngani?

²⁴ Shumangani ukuholekela lupala lwobe kukwami? Shumangani ukunyikalika ngo kamalamo kobe?

²⁵ Kati uli na kwezeka kuntinisha ndi? Ami nili showa ngonehe libizi. Kati obe ukutwesha kulwisha shivutu sha lutende lwa kuyuma ndi?

²⁶ Unampana milandu yayikalu, hinge milandu eye natendele ha wanuke wami.

²⁷ Ukumanga nketwana ku mawulu wami, wapenzanga mu zinzila zami nimwazo, ukukonkezeka myanza yami nimwako oku nikuya.

²⁸ Nohobene muntu washanyozokanga ngonehe shitondo sha ku bola, ngonehe shikobelo shinaliwi ku tuzembule.